بلد تعيش دائما في رحلة البحث عن هدف التعادل + تحديث

تحديث : مبروك عليكي يا مصر
مبروك ضرب ولادك في السودان وقلة الأدب
مبروك
أه يابلد حكومتها حرام حتى فيها تلبس طرح
مدبحة في السودان للمصريين
احنا المصريين بقينا بنندبح زي الفراخ أم أنفلونزا طيور

عجيبة قوي البلد دي
تعيش حالة دائمة اسمها في رحلة البحث عن هدف التعادل
طب شوفوا التاريخ
وخدوا منه مثالين
ويا مكتر الأمثال عليكي يا مصر

يدخل الهكسوس بعجالاتهم
ويوصل صلفهم إنهم يطالبوا أصحاب البلد بإسكات صوت أفراس النهر
علشان دي افراس غتته
بتصحي ملكهم الحرامي من النوم
وساعتها تبدأ مصر رحلة البحث عن هدف التعادل
علشان تخرج المعتدي بعد كااااااااااااااااااااام سنة

تيجي دولة معتدية لا تتعدى تفه في جبين التاريخ
وتهاجمنا سنة 1967 وتدينا هجمة مُكن
وتاخد سينا كده في ساعات
وتضرب مطارات
وتكسر طيارات على الأرض
وتقتل أسرى لسه مخدناش بتار دمهم لحد النهاردة
وساعتها
نعمل ايه يارجالة؟
ندخل في رحلة البحث عن هدف التعادل

فريق زي الفل
وهو الأقوى والأحسن وصفوفه مكتملة
ينزل استاد المريخ يعمل عمايل عجيبة
عجيبة يابشر
فريق استعبط استعباط سخيف
لحد ما الجزائر تجيب جون
وساعتها
نعيش شوط وتلت واحنا فين؟
ندخل رحلة البحث عن هدف التعادل

حزينة على فرصة تأهل لجنوب أفريقيا
مع إن أقصى أمانينا كانت ماتشين هناك ونرجع بخيبة الأمل اللي راكبة جمل
ما طبيعي
لأننا مبنعملش غير رحلة البحث عن هدف التعادل
أقصى شيء كنا ها نقعد نبحث عن عدالة تنزل على إستاد باليرمو
دايما مستنين عدالة تسقط على نفوخنا
شعب نسي كلمة السعي
شعب مبقاش شايف نفسه أبدا مهاجم
شعب نسي إزاي بيتلعب الشطرنج
شعب بقى بيكره خطة نابليون

حزينة على أوراسكوم تليكوم ومبنى مصر للطيران اللي اتدغدغوا في الجزائر
لكن حزينة أكتر كتير على ترويع المصريين وخراب بيوتهم هناك ومحاصرتهم ولا كأنهم مقيمين عند بني صهيون

حزينة على حكومة بايعانا ورافضة ترد لنا كرامتنا قصاد أي تعدي في أي دولة عربية أو أجنبية
حكومة شايفة إنها مش مستعنية تطلع بس تقول كلمتين رد شرف لينا
إحنا كده كده شعب بننسى بسرعة
وكده كده ملناش لازمة وشعب سلبي وخانع ومضروب على قفاه

حزينة على 80 مليون مصري على الأقل 60 مليون منهم فعلا ها يباتوا النهاردة مقهورين
ربنا يهونها عليكي يا مصر
ياللي مش بتلحقي تفرحي أبدا
ولا بتعيش لك فرحة

مش حزينة خالص لا على تعدي الجزائرين
ولا هجوم السودانين السخيف شمال ويمين
مش متمنة طبعا لا ليبين ولا تونيسين
هم دول بجد دولتين؟
هاتوا ميكرسكوب علشان تشوف شعوبهم العين

أنا من زمان عارفة إن قصة الشقيقة والأخوة والهطل ده محدش بيردده غيرنا
طظ في الأخوة
وطظ في البيت بيتك اللي طلعلي ليلة ضرب المصريين يقول لي عشرين مرة الأخوة الجزائرين
والشقيقة الجزائر
والأشقاء الجزائرين

أيوة أنا شايفة إنه شيء محزن إننا ننسى إخوة الدين والدم علشان ماتش
بس طالما شعب بحكومته نسيوا
إحنا منعملش عمو الوصي الكبير العاقل الصامت المتأمل اللي بيلعب يوجا في مناخيره

لأ نفضل عقلاء ولكن يكون عندنا دكر واحد في الحكومة دي يرد بكلمة
كلمة واحدة عن المهازل اللي حصلت شمال ويمين للمصريين
والأمة العربية دي أمة مقطعة الأوصال
بتعاني مظاهر الإحتضار الأخير
والأمة العربية مش أمي
أنا أمي نايمة زعلانة جوه

أنا وبعدي الجدول

تدخل بيتها وتقابلها نسمة باردة

لا تشعر بأي أمان

أو صفاء

أو صدق تام مع النفس

خارج جدران هذا البيت

ما دخلته يوما إلا وحمدت الله على نعمه

"الحمد لله الذي أغناني عن سؤال الخلائق أجمعين

الحمد لله أني أجد السكينة في هذا البيت

الحمد لله حمدا كثيرا إنه حائط آمان ضد نكد البشر اليومي

الحمد لله إنه حلو قوي كده يارب"

تدخل مرهقة

بتعبير آخر منتهية الصلاحية

ولكن المهام لا تنتهي

لازم أرتب أوضة النوم

وأوضة الليفنج

جري قبل ما يوصلوا

لازم أحط الأكل يسخن

ولازم أشيل ولاد إبني العرايس "القتلاء كما تسميهم" وأرتبهم

ولازم ألحق أخد حمامي وأتبرفن

تنظر للوظائف اليوم بفتور

تخلع حذائها وتمشي حافية

تشعر ببرودة الأرض وتبتهج وكأنها حصلت على مسكن فوري

تنتقل من برودة الأرض إلى دفيء السجاد

تتكور على الفوتيه وتستمتع بشعاع الضوء الخافت المتسلل من بين ستائر منزلها

قومي يالا

لازم تجهزي ها يدخلوا بعد شوية صغيرين

تمرد داخلي

مش عاملة حاجة

تأخذ حمامها وتنظر لكل ما حولها بفتور

تاخد حمامها اللي يكمل حالة الإنشكاح والتسكين المضاد للآلام

تأخذ حمامها وتتجاوز كل المهام التي تقوم بها قبله أو بعده

هي مش تعبانة جسديا بس

هي عندها ملل

هي زهقانة

هي الوحيدة اللي مش قادرة تاخد أجازة

هي من البشر الغير روتينين

هي مزاجية الطبع بشكل مبالغ فيه

اللي حولهم الجواز لآلة في جدول

آلة إن أختل أدائها إختل الجدول كله

هي مش بتحب الجداول

بتشتغل بمزاج

وشغلها أصلا شغل كله مزاج

بتحب شغلها

هي مش بتحب الجداول

بتطبخ وتقوم بأعمال المنزل

هي بتكره أعمال المنزل

وبتكره غسيل الجمعة علشان لبس المدارس

وبتكره يوم الشغالة مع انها مش بتعمل معاها حاجة

هي مش بتحب الجداول

أعجب وظيفة في حياتها إنها بتذاكر لولادها

إذا كانت هي أصلا مش بتذاكر لنفسها إلا لما يجي المزاج

إذا كانت عمرها ما ذاكرت حتى ليلة الإمتحان إلا لو كان فيه مزاج

ومع هذا كل يوم لازم إجباري تذاكر معاهم

هي مش بتحب الجداول

تاخد القرار المصيري

تقعد على الفوتيه

تستمتع بصوت الفراغ حواليها

والنسمة الباردة اللي جوا البيت

تمد رجليها على الكرسي

وتقرر

ها أخد أجازة

مش عاجبهم؟

تعبانين؟

جعانين؟

وراهم واجبات؟

وراهم مهمات؟

وراهم اللي وراهم

ها أخد أجازتي

ها أشحن

.

.

.

.

ساعة بس

إن كانت وظيفتي كزوجة وأم فخر ونعمة

إن كنت أهواهم وأعشقهم

إن كان إلتزامي الشخصي يمنعني إني أقصر في شيء من واجباتي حتى وإن كرهته

ساعة لن تقلب نظام الحكم

ساعة تأخير في الجدول

يارب ما يزعلوا

يارب ما يكشروا

مش بحب البوز المقلوب

دي كلها

كلها

كلها

ساعة بس

إجتماع جمعية المرأة المتوحشة السري "1"

سلسلة بوستات لبنات حواء بس

أي راجل ها يندس بينا هنا ها نبندجه

شايفاك ياللي بتقرأ في الضلمة هناك من ورا اللينك

بهيج .. طير إنت

بما إني مش ها أعرف أجمع كل صديقاتي المدونات في إجتماعاتنا نحن نسوة جمعية المرأة المتوحشة

فقد قررت وضع بعض نقاط اتفاقنا في الجمعية لعلها تفيد اللي لسه – يا عين أمهم – ها يتجوزوا

الحقيقة ها أديكم يجي 60 بوست كده

بالشفا

أولا يا بنات جمعية المرأة المتوحشة دي في الدول المتقدمة كان ها يكون اسمها جمعية المرأة العاقلة

بس هنا في مجتمعنا الذكوري عادي وطبيعي جدا تكون اسمها جمعية المرأة المتوحشة

حيث كل ذات عقل لا تتنازل عن حقوقها مقابل أداء واجباتها لازم يبقى اسمها المتوحشة

عادي

متوحشة متوحشة واللي عاجبه

تعالي بقى أديكي البلاوي اللي استفدنا منها بعد الجواز

جوازي وجواز كل الولايا عضوات الجمعية

وهنا يحضرني أن أقول إن ولله الحمد والفضل والمنة

لم تفشل عضوة منا

وكلاتنا عملنا بيوت إلى حد ما ناجحة

ومشينا الرجالة على العجين ملخبطوش

بس برضه الشهادة لله هم رجالة بكل المقاييس كويسين

يعني إحنا ما عملناش من الفسيخ شربات

ولا صنعنا المعجزات

كل راجل من دول كان جدع

فوجد ست جدعة معاه

اجدع من ميت راجل

وبشنب ودقن كمان

لأ نتكلم جد بقى

ها أقول لكن شوية حاجات كده تخلي الحياة الزوجية آخر بهججة وآخر سعادة

ملحوظة مهمة: التجارب دي لن تصلح اطلاقا مطلقا البته لو كنتي ناوية تتجوزي راجل بالإسم .. ولا يحمل من الرجولة نصيب أكتر من خانة ذكر في البطاقة

1- الحب جميل .. بيعمل سحابة روز في أحمر على العين .. فهل تأكدي من خلال التصرفات أنك مقبلة على الزواج من راجل جدع .. إبن أصل .. متربي .. ذو مستقبل واعد .. يعرف من أمور دينه وصلته بربه أكتر من قراءة الفاتحة؟

لو كانت الإجابة آه .. كملي قراءة التجارب النسوانية الآتية

لو كانت الإجابة مش متأكدة .. خدي وقتك وأوعي تستعجلي .. محاكم الأسرة ولقب مطلقة مش سهل في مجتمع ذكوري بشع

لو كانت الإجابة ده وحش وكخة يا ستيتة وغيور وعصبي ومعفن ومش بيستحمى بس "بعبه" .. إمشي يا بت من هنا أنا مرارتي متستحملش عِلل

2- أولا أكبر مشكلة بعد ما تدخلي بيت العدل إنك بتكوني محتاسة حوسة الطور اللي سابوه في الغيط

1. 
   

   لا قالوا ليه هو ها يحرث ولا ها يدور ساقية
   

وبما إنك بتحبي لدرجة التنويم المغماطيسي

وبما إنك خايفة من الفشل

وبما إنك عاوزة ترضي حبة العين ونور الفؤاد "سي دعبس" بتعملي أعمال "زينة" حبيبة هركيوليز

شهر .. إتنين .. سنة بالكتير وتهمديييييييييي

وتباني يا خايبة على حقيقتك

وإنك سيدة الأنتخة الأولى

ده غير الملاحق اللي ها تيجي لك نتيجة الجواز

زي سنية دعبس

وبرعي دعبس

والله أعلم ها تعملي كام ملحق لسي دعبس

دي تساهيل بقى

والعيال عزوة

وإغلبيه بالعيااااااااااااااااال .. ويغلبك بالمال

مع إن حسب الظروف الصحية والإقتصادية الآنية

إنتي ها تكوني شبه عقيمة وهو مفلس محلتوش اللضا

"إوعي تعملي كده يا به منك ليها .. ده أنا بهزر .. العيال تجيبي منهم اللي تعرفي تربيهم .. مش الشارع هو اللي يربي والا النادي"

نصيحة الجمعية: إشتغلي بالعقل من أول يوم .. إعملي عمل قليل مستمر خير من كثير منقطع .. لأن الزوج فعلا بيحبط جدا لما يلاقي "بيونك ومن" في عصر الجواز الأول وست محتاسة وكسولة في العصور الجليدية التالية

عادي إنك تكوني مش متعلمة حاجات كتير عند ماما .. وعادي جدا إنك تطوري عن بيت مامتك وتحطي أحلامك في بيتك

شغل البيت صدقيني يا زينات صدقي يا أوختشي مش صعب خالص

وخديها من واحدة كانت مأنتخة عند مامتها

بس فيه أمور أساسية من غيرها ميبقاش بيت يبقى اصطبل خيل

زي نضافة البيت ونضافتك الشخصية

دول مش رفاهية

حتى لو بيتك في حارة القرد عطفة أم سماعين

النضافة دي مهديء للأعصاب

ترتيب العفش وترتيب كل شيء بفن مش بياخد وقت كتير اصلا

ولو مش عندك مقدرة لشغالة قسمي البيت على أيام الأسبوع ها تاخدي كل يوم نص ساعة للبيت "حجرة واحدة" .. وأصلا بيوت النهاردة كلها قد علبة الكبريت

لو عندك مقدرة لشغالة .. هي ها تنضف بس وكل مدة .. لكن اللي ها يحافظ على النظافة دي والترتيب هو انتي .. وزي ما تعودي جوزك وولادك ها يتعودوا

آه يا أوختشي جوزك على ما تعوديه وابنك على ما تربيه

قطيعة

الكارثة المحققة في النظافة الشخصية

هو إحنا أصبحنا أشخاص نكره الصابون؟

إيه النيلة اللي بتحصلي لو ركبت المترو الأنفاقي على الصبح دي؟

ستات معفنة رائحة ولبسا وحتى الجزمة مستخسرة تلمعها

ستات معفرة ومجفرة وشكلها يقطع الخميرة من مصر كلها مش من المترو بس

أمال في البيت .. اللي هي سعادتها بتعتبره خلوة بتكون عاملة إزاي؟

ها ترد عليا "البه" حسنية وتقول يا أبلتي ما هو والعيش والعيشة واللي عايشنها

يابنتي يا حسنية هو أنا بقول لك حاجة؟

ما أنا عارفة إن العيشة بقى لونها بلاك

أنا بقول لك النضااااااااااااااااافة

دي حاجة ببلاش كده

أنتم نسيتوا نصائح المرأة العربية اللي درسناها في ثانوي؟

دي كنز

"فالتفقد لمواضع أنفه وعينه .. فلا تقع عينه منك على قبيح ولا يشم إلا أطيب ريح"

ويحضرني في هذا الموقف قول الست الوالدة

الست اللي متاخدش حمام قبل ما تدخل السرير تبقى معفنة

يا سلاااااااااااام حكم يا ناس

حكمة هذا الجزء

أنت ريحانة بيتك .. إن تحولتي إلى فجلة .. فلا تلومي زوجك إن أصبح جوعضيض .. وجاله دربكه في بطنه .. ما إنتي مجرد فجلة

لو يستاهل .. أحبيه يا حواء

الحاجات دي منقولة بس آخر حلاوة بصراحة

الرجل صندوق مقفل ومحكم الإغلاق
ومفاتيحه في أحد المحيطات
ولكنه شفاف في عيني امرأة تفهم الرجال

الرجل يحاول دائما ان يخفي حاجته للمرأه .. وكلما حاول ان يقول لا أحتاجك يخطيء ويقول أحتاجك

الرجل .. أفديه بكل شي أملكه وأعطيه كل شي .. مقابل فقط .. أن ينزع قناع القسوة المرسوم على وجهه من قديم الأزل

الرجل الغبي.. هو من يجعل المراه تكرهه
فياخذ منها اقل مما يريد
ولكن الذكي هو من يجعل المرأه تحبه
فيأخذ منها أكثر مما يريد

قلب الرجل كسفينه تبحث عن موانيها

المرأه الذكيه هي التي تسكن تلك السفينه

ولاتكون الموانيء التي تبحث عنها

لسان الرجل.. قد يرفعه في عين المرأه إلى السماء وقد يخسف به إلى سابع أرض

حينما ارى قسوة الرجل .. اتمنى لو ان لي قلبا من حديد

لان مشاعري حينها بلا فائده

ولكن حينما يكون حنونا ومحب اتمنى لو ان لي قلبين

لأعطيه أكثر مما يتوقع

الرجل بطبيعته صامت .. ولكن لعينيه لغتا

لايفهمها إلا امرأه تفهم الرجال

نصف الكلام لايقال لرجل

وربعه مستحيل ان يقال

والربع المتبقي يجب التفكير فيه

يتمرد الرجل ويكره المراه التي تعطيه كل شي بسهوله .. وبلامقابل

ويعشق المراه التي تعذبه بصعوبتها وتاخذ المقابل

أغبى الغبيات من النساء هي التي تعامل الرجل كما تعامل المرأه

عندما تأتي المراه بقلبها الصادق

والرجل بعقله المتفاهم ويجتمعان

سيكونان جسدا رائعا

ولكن ..ليت الرجل يقدر عاطفية المرأه

وليت المراه تقدر عقلانية الرجل!!

واخيرا اروووع رجال الارض

هو من يعيش بعقل رجل وقلب امراه

سعاد الصباح قالتها قديما الرجل الشرقي يتمنى أمرأته

بعقل رجل

وقلب امرأة

وقوة ......... حصاااااااااااااااااااان"

عاوزني أحبك يا أدم؟

شكرا جزيلا لكل اللي علق على بوست د. مصطفى محمود وربنا يرحمه رحمة واسعة .. اعذروا انشغالي وربنا يعينني ويعينكم ويخلي اليوم 48 ساعة .. يبارك فيه يعني :)

------------------

علشان أحبك يا أدم؟

لازم تفهمني صح

أنا
من أنا؟
أنا أغلى ورود الحياة .. جعلني الله كم من المشاعر والحنان يمشي على قدمين لأجل خاطر عينيك .. ما بين شلالات دموعي وألمي وصرخات حماستي وسعادتي تعيش أنت حياة لا يعرف الملل لها طريق .. وتجد طريق لمدح نفسك وثباتك العاطفي

عاوزني أحبك؟ إعرف أننا نسير في الحياة بمحركات مختلفة .. أنا أختلف لأكمل نقصك .. وأنت تختلف لتكمل نقصي .. "عاشق ومعشوق" .. إختلافي مش "معيبة" ولا شيء أُعير به بل هو أمانك في هذا العالم

عاوزني أحبك؟ إعرف إن قيراط حب وحنان وأمان منك يساوي فدان عطاء مني مباشرة .. روحي وعروقي ودمائي تتغذى على حنانك .. فإن أنت وجدت مني الجفاف فلا تلومن إلا نفسك .. نسيت الوردة وهي في طريقها للذبول
أغبى الرجال هو الذي لا يعرف كيف يجعل المرأه تعشقه وتهيم به

عاوزني أحبك؟ إعرف إن جسمي لما بيتعب أعصابي بتتعب .. وبما إن حياتنا مشوار طويل مرهق جدا فلا تنسى أني أشكو لأن جسدي أنهكته مشاوير الأيام فلا تهمل شكواي .. طبطبة إيدك وكلمة طيبة ودعوة حلوة وابتسامة لذيذة بتخليني زي الحصان أرجع أشيل معاك الحمول ببساطة وبكل طيب خاطر
مايلفت انتباهي كثيرا هو الرجل الحساس.. لندرته.. بينما لا يلفت انتباهي ابدا الرجل القاسي .. لوفرته

عاوزني أحبك؟ إعرف إني بطبيعتي بحب الهدايا وإن رخص سعرها .. أنا حواء أعشق الهدايا .. هي جزء من حنانك الذي قلت أنه غذاء روحي وعروقي والدماء .. معي تناسى الكلمة الخالدة "هو أنا بعمل كل ده لمين؟"

عاوزني أحبك؟ تناسى في وجودي الغباء الذكوري في إظهار أنك معشوق النساء .. أقلب النغمة .. إظهر حبك لي وأني عندك بألف امرأة .. أعلم أنك كاذب .. ولكن أعلم أنك لن تتركني فعلا لأجل ألف امرأة .. كل كلمة ولها رد يساويها في المقدار ويضادها في الإتجاه وربما تثير غيرتي في وقت نفاذ صبري على ألعابك الصبيانية

عاوزني أحبك؟ أنا أعشق بأذني .. أسمعني الكلمات الجميلة .. إرضي غرور الأنثى .. إلبس ثوب الخبير حتى وان لم تكن هو .. أحب كلمات الغزل والغيرة ................ منك فقط


عاوزني أحبك؟ افتح لي قلبك وروحك ساعات قليلة في اليوم .. لي أنا فقط .. أنت حبيبي الأثير .. أنت الصاحب الذي تتصاغر بجواره هامات بقية البشر .. أنا أعامل الناس بجسدي يوما كامل والروح معك انت فقط .. عاوزة اسمعك وتسمعني .. شحن بطاريتي معتمد على كلامي معاك وليس على الأموال والعطايا وتحملك للمسئولية فقط
المرأه دائما جاهزه للعاطفه بينما الرجل قليلا مايكون كذلك .. وهذه حكمه إلاهيه خفيه وربما ............. ابتلاء

عاوزني أحبك؟ أوعى تخون .. عاوز تشوف وحوش الأفلام الأسطورية الخيالية؟ .. خون .. ضربتك بخنجر ألن تتألم؟ لا تضربني بخنجر الخيانة وتطلب مني أن أتفهم طبيعتك .. تركت كتير من رفاهية طبعي لأجل خاطر عيون الحبيب
الرجال جميعهم كالجبال ..ولكن من الجبال ما يتفجر من حجارتها الانهار وبعض الجبال لايؤثر فيه لاعوامل تعريه ولاعوامل تغطية

عاوزني أحبك؟ كلمتك بالنسبة لي ميثاق .. صعب اتخيل إنك قاصر عن تنفيذ وعودك .. وعدتني يوماً أن تكون أماني فمن الطبيعي أن لا أتوقع إلا حضن حنان وأمان

عاوزني أحبك؟ أعشق الصراحة .. وأقصر طريق بين نقطتين الخط المستقيم .. لا تجتهد في تمريني على فك ألغازك – يا سيد ألعاب الشطرنج- ثم تطلب مني أن أحسن الظن بك لاحقا .. أجيد فك الألغاز وأفهمك عن ظهر قلب .. ولكني أحترمك صريحا


عاوزني أحبك؟
حبني يا آدم بطبيعتك الأولى
حبني يا آدم كأنك آدم

.

.

.
تجد حواء الأولى بلا رتوش

"المكتوب بالأحمر منقووووووول وعجبني"

المعلم الأول

عمري ست سنوات
كنا في ليبيا
نجلس على الكراسي الجلد .. مازلت أذكرها
تأتي موسيقى ناي عفت
تشير ماما علامة "هسسسسسسسسسس"
اجلس أنا وأخي بجوارها ويبدأ مصطفى محمود الحلقة
"العلم والإيمان"
نفهمه قليلا
نشاهد فيلم علمي

روعة
روعة
نستمتع به فوق الخيال
ندعو الله أن يطول الفيلم التسجيلي من كتر روعته
ينتهي ونحن نسبح الله
تأتي خواطره بعد الفيلم
بها الكثير من السكينة والفهم والإيمان .. نفهمه قليلا

تبدأ أمي في سرد قصة د. مصطفى محمود
وأنه في طريق الإيمان واجه الكثير من العسرات


أمسك كتاب من كتبه

أقلد أمي
أتحاشى أن أحرك العلامة التي وضعتها أمي عند ما أنتهت من قراءته
حتى لا تغضب مني
أقلب صفحات "رأيت الله" بتأني
لا أفهم شيء
ولكني أُكبر هذا الرجل
بعدها بسنوات أقرأ "حوار مع صديقي الملحد"
وتبدأ مرحلة جديدة مع قراءة الكتب

حوار مع صديقي الملحد أخذني لعالم أخر ونوعية أخرى من القراءة


تمر السنون
ويختفي الرجل وراء ستار
بلد أعلنت الحرب على العلم والعلماء
فيتخذ لنفسه خلوة وأفتقده وأفتقد خواطره وأفلامه بشده
مازلت على إعجابي به

تمر سنون وأسمع أنه من القرآنين
الذين ينكرون السنة بكل كتبها
أتعجب
ولا أعلم هل هذه حقيقة أم خيال

أدعو الله أن يهديه سواء السبيل ويكتبه من أصحاب الخاتمة الحسنة
ومازلت على إعجابي به

د. مصطفى محمود
أنت أول من شاهدتك عالما
أنت أول من أحببتك عالما
أنت أول من أحترمتك عالما
أنت و د. جوهر في "عالم البحار" من علمتوني قيمة العلم
عندما كان التلفزيون أداة علم وثقافة عالية

اللهم أرحم د. مصطفى رحمة واسعة وتجاوز عنه
اللهم تقبل منه الحسنات وتجاوز عن اللم والسيئات وأرفع شأنه وأعل قدره
لأنه كان لكثير منا .. المعلم الأول

الي ممعهوش ما يلزموش

كنت ماشية كالعادة وسط الزحام المريع

وباسمع نجوووووووووووووم إف إم

الموضوع المطروح

اتقدم لك شاب وعاجبك وكل شيء تمام بس امكانياته ميجيبش شبكة

هل توافقي على إنه يأجر شبكة علشان منظره قدام الناس؟

والا الشبكة لكي اساسية؟

والا ها تعملي إيه؟

انا قلت ايه العبط دول؟

مؤكد طالما هم افترضوا انه راجل كويس والمشكلة كلها شبكة إن البنات ها يقولوا لهم

"يا متخلفين ويأجر شبكة أصلا ليه؟ والناس يهمونا في إيه؟ كفاية إني ها أخد راجل كويس"

قلت يمكن يكون الرد "هل رجل طيب يساوي بضع أوقيات من الذهب؟"

قلت يمكن يكون الرد "أه أوافق وبكرة ربنا يكرمه ويجيب"

الإجابات الصادمة "وكتير جدا ردوا مش قليلين ابدا"

اللي ممعهوش ميلزموش

أءجر عريس أرخص

easy come easy go ودي مثلا عشرين تعليق

مش ها أتنازل عن اي شيء من حقوقي واللي عاجبه

مفيش حاجة بتيجي بعد الجواز وبعد العيد مش عارفة بيهببوا ايه في الكعك

وكل تلاتين ماسج تيجي واحدة تقول

ياخد حبيبي يانا ياما ياخد حبيبي "يا إيجار"

المهم الراجل مش المهم الشبكة وبكرة ربنا يكرمني بأحسن منها

فيه واحد رد بماسج وقال ها أجيب لها شبكة صيني ب 200 جنيه وتبقى توريني ها تعمل إيه

هو حصل إيه؟

مكنتش اعرف إن الشبكة بتتأجر

مكنتش أعرف إن فيه شبكة صيني ب 200 جنيه وإن الخداع ممكن يوصل لكده

مكنتش أعرف إن رجل حقيقي يساوي دهب وألماظ

ده أنا تخلفت صحيح عن الركب

وبقيت ستيتة تخلف عقلي

يا واخدة القرد على شبكته

ها تبيعي الشبكة ويبقى القرد على تنطيطه

لو لم أكن هنديا لتمنيت أن أكون موزمبيقيا

موبيل بيرن ع الصبح
يوووووووووووه
ميت مرة قلت مش بحب حد يقومني على موبيل غير حبيبي بس
وغير مسموح لجموع الهنود الإتصال بيا قبل ما اخد الإستمورننج
ببساطة حبيبي ممكن يتحمل صوت الجحوش بتاعي على الصباح
كمان بيجده حلو كمان
إزاي؟
كرم ربنا بقى .. الله يخليكم مش عاوزة حسد .. اهو ربكم بيراضي وبيستر بقى
يارازق الزهرة في حضن الجبل من فوق

ستيتة: ألو أيوه يا نونا
نونا: قومي يا ستيتة النهاردة عندنا حذف واضافة في الإرشاد الأكاديمي
ستيتة: الله يخرب بيت الجودة .. أنا كنت ناوية أطبخ النهاردة .. العيال نسيوا طعم الأكل
نونا: يووووووووووه قومي بقى وتعالي ها ناخد الإستمورننج "جمعاااااء" .. ما احنا صيع وها نقعد نستنى الطلبة
ستيتة: طيب .. أقوم أخد أي كافين يمكني من السواقة وسط الأبقار الوحشية وأجي أخد القهوة "جمعاء" معاكم

قاعدين مستكنيصين وشوفنا ها نطلب كيماويات إيه لشغلنا علشان نكتبها ع الكمبيوتر .. بحيث نبعتها للعميد .. يرفضها .. ونشتريها على حسابنا
طيب وبنبعتها ليه اساسا؟
ده سؤال يابني .. علشان يرفضها .. يعني نحرمه من إنه يكتب لا توجد ميزانية؟
نكبت الراجل؟
نخليه عنده حاجة في نفس يعقوب يروح يخلصها من الولية في البيت؟

دخل كريم
كريم: صباح الخير يا دكتور
ستيتة: أهلا كركر .. ها يا كركر أؤمر .. عاوز تحذف إيه يا حبيبي؟ عاوز تضيف مين يا ضنايا؟
كريم: عاوز أحذف النبات يا دكتور وأخد الفيزيا
ستيتة: هات النتيجة يا ولدي بتاعتك ووريني العار
الله يا ما شااااااااااااااااء الله
كريم .. انت ساقط فيزيا أولى كلها ترم أول وتاني
كريم .. يخرب بيتك ده انت ساقط رياضيات ترم تاني
انت عاوز تاخد فيزيا ليه يا حبيبي؟
كريم: بحب الفيزيا يا دكتور وها أدخل قسم كيميا فيزيا إن شاء الله
ستيتة: هي مسئلة حب يا حبيبي؟ إنت عقلك مش رياضي يا بابا .. يبقى خليك في البيولوجي .. وأهو اللي يفشل في الكيميا بيشتغل في الأحياء على رأي محمد هنيدي

كريم متزمر وحاله بيقول وانت مالك يا ولية انتي مجرد تمضي الورق زي أي حمار في الكلية دي وتخلصيني

ستيتة: إنت جاي من الكويت يا بابا
كريم: لأ سعودية
ستيتة: آه وقلت لي بتحب إيه بقى؟ الكيميا؟
جايب مقبول فيها
الفيزيا ساقط
الرياضة فاشل
يخرب بيتك ده حتى حقوق الإنسان أنت ساقط فيها ياض .. الله أنا مش شايفة أيد ابوك يعني معلمة على قفاك؟
كريم: لأ ما أنا خلاص ها أركز وها أبقى أخر فل وأخر بهججة .. وبابا في الخليج مش فاضي يعلم عليا
ستيتة: هو بابا عادي؟
كريم: آه عادي
ستيتة: وماما؟
كريم: عادي جدا
ستيتة: خلاص يا ولدي انا ها أحذف لك وأضيف لك بس أبقى تف على دقني لو طلعت من عندنا .. ما تحول كلية سهلة ياض .. ده ناس زمان مسمعوش كلامي وضيعوا في العلوم عمرهم
كريم: اصلي يا دكتور مش بحب الحفظ .. مش بعرف أحفظ
ستيتة: على أساس إن الفهم عندك شغال؟

بص يا كركر إنت في مقام ابني بعد الشر يعني
الواد متنح وبيضحك

أنا راي أنت ضيعت سنتين ومعدلك سيء جدا وشايل مواد على ضهرك .. وأنا برضي ربنا كمرشد أكاديمي بقبض 145 جنيه بحالهم .. اسمع مني .. أنت فاشل علوم .. حول يابني انت راجل يعني عاوز تخلص .. ووراك جيش زي أي توتو وسوسو .. ثم تشتغل .. وتلاقي واحدة ترضى ببنطلونك الواقع وتتجوزك .. وتجتهد إنت وهي تجيبوا لينا عيال زي الفل

كريم: يا دكتور بقول لحضرتك بابا في الخليج

ستيتة: معلش يابني العتب ع الجزر يعني بابا ها يجهز العروسة وانت داخل بالمجهود؟ طيب دي كده فرجت .. كده تاخد العشر سنين بتوعنا وانت ضميرك مرتاح .. واحنا كمان ضميرنا مورتاااااااااااح

يا جماعة مفيش شيء اسمه بحب كذا من ثانوي أدخله
واحد جاي من ثانوية معادلة .. يعني لا كان علمي رياضة ولا علمي علوم .. حب مدرس الكيميا في ثانوي وشرحه واسلوب معاملته .. يجي يقول لي بحب الكيميا؟

يا بابا ساقط فيها تروح لشيء تاني ..

تسقط ليه عشرين مرة؟

والسنة تجيب فيها معدل يدخلك السجن مش بيت العدل
دخلت جربت شيء ووجدت إن إختيارك خاطيء متعافرش

إلا لو واثق إنك فعلا كنت مقصر وتقدر بالإجتهاد تتجاوز عثراتك
متقدرش؟

تحول كلية تانية على طول

دخلت كلية ولقيت عقلي مش ماشي فيها .. هو مش شغل بقر .. يبقى مش ميولي
أحول وأفلح في كلية تانية

مش اقعد اتحجج .. ومرة اقول اصلي مركزتش .. والتانية اقول الدكتور مستقصدني .. واخر المهازل الدكاترة مش بيفهموا ده انا بعرف احسن واكتر منهم

مش مهم انك بتحب علوم .. المهم تفلح ان شا الله في معهد القطن

كتكوا القرف مليتوا البلد

مشي كريم ومسيكنا قافية الرجالة بتوعنا على ما يهل علينا بقية العيال

وهنا هل عليا محمود موباجو "من دولة جزر القمر الشقيقة" اللي لا يتحدث العربية ولا يعرف الإنجليزية وبيتكلم فرنساوي وجايب قريبته تترجم لي طلبات سعادته .. السنة اللي فاتت قلت لقريبته علوم غلط ومش ها يفلح في مصر إلا في آداب فرنساوي .. برضه بصت لي على إني حمار ببردعة

والسنة دي الواد ساقط وبيعيد أولى .. كلهااااااااااااااااااااااااااا

صبرني يارب

هل فكرت أن وجود "الرأس القديم" ربما كان نعمة؟

يخطر على بالي ساعات كده إن وجود "الرأس القديم" على رأسها ربما كان نقمة من أعمالنا السودة وأن الله لا يغير ما بقوم حتى يغيروا ما بأنفسهم

وفي بعض الأحيان أقول لنفسي هل فساد الرأس القديم ومعاونيه أرحم؟

أم فتنة طائفية تأكل الأخضر واليابس؟

محدش يقول لي مفيش فتنة طائفية الله يخليكم

محدش يقول لي أن فئات الشعب متصالحة مع بعض وبتصحى كل يوم تبوس في بعض وتحضن

مقالات اليوم السابع التي تتعمد إثارة المسلمين

أو المسيحين

أو كليهما

موجووووووووووووووووووودة

واللي مش عارف اللينك يقول لي علشان أخليه يدخل يشوف أي مقال عن الأديان بياخد كم تعليقات قد إيه .. وبتوصل التعليقات فيه بين الطرفين لإنحطاط إلى أي درجة .. وكأن الجريدة تتعمد وضع مثل هذه الفقرات الإخبارية أو التحليلية لإجتذاب الحروب الكلامية بين طوائف الشعب العاملة

شيء يغث النفس حقيقي ويوضح كم المخاطر اللي منتظرة فتح باب حتى تطل في شكل قبيح على هيئة حروب فعلية

عشر سنوات بإذن الله وتأتي مئوية ثورة 1919

هل كانت الوحدة الوطنية فيها دعابة؟

هل تم تزيف كل الصور لإظهارنا بنسيج واحد؟

أم كنا فعلا شعب متحضر راقي يحترم إختلاف الآخر؟

يابلدي متى أصبحت بكل هذا التطرف والكراهية بين أبناءك؟

http://www.shorouknews.com/Columns/Column.aspx?id=143126

ده لينك مقال علاء الأسواني في جريدة الشروق

انت أحد فئات ثلاث

إما سيعجبك تحليل الموضوع في المقال وتجد نفسك من الفئة التي لا ترغب في وصول متطرف للسلطة

وتعلم يقينا أن وصوله سيجعل من بلدك أفغانستان بطالبانها

أو الصومال بجماعاتها

ولم يتسيدوا سدة حكم في بلد إلا خربوه ولله الحمد

وفي نفس الوقت تأخذ المقال مجرد دون تحليل كاتبه .. بل بتحليل ما كتب فقط

وكأنك لا تعرف الكاتب

هو مجرد كلام يستاهل التحليل والإعجاب بمنطقيته

إما لن تتفاعل مع المقال على أساس أن البلد بها من المشكلات ماهو أهم من جسد المرأة

وأن المرأة مقهورة من زمان في مجتمع ذكوري يرغب في تكفينها حية إن استطاع

ضمانا لهرمونات ذكوره وعفافهم العالي

وإن بلاش نفتح باب مين له حقوق

الحقوق كتير بس مين اللي يطولها

الحقوق كتير بس النفس اللي تاكل

وإما ستثيرك عبارة "المتطرفين أو الوهابين" تلقائيا

وتبدأ في الهجوم على العلماني ابن اللزينة علاء الأسواني

خريج المدارس الفرنسية الأرستقراطية

واللي كمل تعليمه في أمريكا

وتبدأ في نقد المقال وصاحبه واللي خلفوه

وإن روح شوف العريانين وملكش دعوة بينا يابن ......

ياللي مطلع عينينا وعاوزنا أمريكا .. طظ فيك

الأهم من المقال للأسف مئة مرة .. ومن كاتبه عشرة آلاف مرة

تعليقات القراء

اللي لما تدرسها حلو قوي كده

ربما قلت

من بات آمنا فى سربه معافا فى بدنه يملك قوت يومه فقد حاز الدنيا

وربما كان بقاء بعض الرؤوس أمانا لشعب كامل من الغوغاء

إن وجد فرصة حول دولة ذات حضارة قديمة ووكسة حديثة إلى غابة

السؤال

هل تظن أننا شعبا يستطيع حمل أمانة شورى وديموقراطية حقيقية؟

هل إجابتك "بنعم" تعني أنك على يقين تام أن اجابتك ليست من قبيل كلام الإستهلاك المحلي؟

للمثقفين والمحللين: هل فعلا مصر آمنة من حروب أهلية في حالة تغير اهل الحكم وتغير فلسفتها السياسية تماما؟

متنسوش إني بتعلم منكم كلكم .. وعنواني مش عارفة

"ملحوظة: لست علائية اسوانية وعندي مئة نقد على ما يكتب علاء الأسواني مش من ناحية الفضيلة بس ولكن من ناحية الحقائق والشخوص ومنطقية الأحداث في رواياته .. ولكن هذا المقال أحترمه جدا .. ببساطة في المقال بيقول الفضيلة تنبع من الثقافة والتربية والأخلاق .. ببساطة بيقول اتربوا وربوا عيالكم وده كفيل بجلب الفضيلة للمجتمع"

(.........)

هذه النقط أترك للقراء الحرية يحطوا مكانها الشتيمة اللي يحبوها .. الكلمة اللي تخطر على بالهم .. أصلي مؤدبة ولو على صفحات المدونة .. بس اللي جوايا كتير يبقى لازم أكتب .. والنقاط اسيبها لتخيلكم

قصة شوبير ومرتضى وهبة غريب بها كم من السفالة والإنحطاط والكيد مما لا يتصوره انسان

اصلا انا عارفة ان الشعب كله بيشتم
وعارفة ان ناس كتيرة عديمة الرباية
وبيجدوا الشتيمة وخاصة القبيحة تعبير على أنه واد توتي فروتي ومجبتهوش ولادة

وكلنا عارفين إن نص رجالة البلد "وخاصة اللي ربنا غناهم وأداهم شبعة بعد جوعة" مصاحبين .. والنص التاني يتمنى بس ربنا مكتبش ليه

بس نفسي أفهم حاجة .. لما تطلع هبة غريب في برنامج 48 ساعة لتنفي انها (.........)

وتقول إن اللي عملته لحساب شخصية اعلامية ترغب في الكيد لشوبير "الي هو منص طبعا" .. وان شوبير بيهددها يضيع مستقبلها "ده على أساس إنها ها يكون لها بعد كده مستقبل مشرف ماهو شعب (...........) بقى"

ولما نشوف الإنسانة الوحيدة اللي بتقلب الدال تاء والجيم كاف بتنفي إن اللي في المكالمة صوتها
يبقى (.........) ليها ولشوبير ولمرتضى وللحزن الوطني والمجلس الموقر وللبلد اللي قانية أمثال هذه الآفات .. لأ وايه دول الزبدة بتوع البلد والإعلام

حزني فعلا على شوبير .. لأن ببساطة "شئتم أم أبيتم" الكبار عارفين وسامعين بلاويه من مدة .. لكن الصغيرين بيحبوه ويحترموه ويجدوه نموذج مشرف
http://www.youtube.com/watch?v=Qy8VjzWLc1I&feature=player_embedded
اللينك ده لرب الصون والعفاف وهو بيعلمنا الفضيلة .. أبلة أبلة فضيلة .. واك واك .. واك واك واك وااااااااااااااااك واك
----------------------------

قال إيه يا سيداتي أنساتي

لحد ما نشوف موضوع سادتي "على رأي أبو حفيظة"

الأخ الرفيق محمد منير سوف يحمل علمي مصر والجزائر في الحفلة اللي قبل المبارة بيومين
وده ليه يا ولاد؟
ليه؟
لأننا أمة واحدة
الأمة "العرضية"
وإديها برامج عن عدم التعصب .. وإننا لازم نبقى كول آخر حاجة .. وإننا الشقيقة الكبرى ماركة قشطة خالص
طب وأعمل إيه أنا في اللينك ده
http://www.gemyhood.com/2009/10/blog-post_17.html
صحيفة جزائرية نزلت المانشيت "سنتزوج مصر في اليوم المشهود" وحسن شحاتة لابس عروسة ومدربهم هو العريس

وجريدة الشروق نزلت الصورة برضه
صورة تحرق دم الزواحف ذوات الدم البارد

ولو كانت الصحيفة دي هنا كانوا هرونا عشرين توك شو عن
أن هذا لا يجوز
تذكروا أننا نسيج واحد
يا حبايبي إنسوا اللاعب الجزائري اللي فقأ عين طبيب مصري زمان وهربوه لبلده
(..........)

إيه القصة بالضبط .. هي وصلت إن الشقيقة الكبرى يتقال عليها كده؟
طب بذمتكم مش لي حق اقول (............) للوحدة والأمة والكلام الإنشائي ده

إيه قصة الشقيقة الكبرى اللي قرفونا بيها دي؟

لأ ميهوبي الجزائري قال إيه ها يحتج لدى مصر على اللي الصحافة المصرية عملاه وهجماتنا الشرسة على الجزائر "سكتنا لل (..........) دخل بحماره"

يالهوي ده الشقيقة دي مبقاش لها كرامة مع أي شخص من الأشقاء "المصغرة" خالص .. وصلنا لزنا المحارم
وعليه فأنا مع أبو حفيظة .. سيداتي آنساتي لحد ما نشوف هي البلد دي فيها سادتي وألا خلصوا

القصة مش مباراة .. القصة غصة في القلب تتبع كل حدث واهانة لمصر عند الأشقاء المصغرة شمال ويمين

لما ألمسك حلوة الحياة من غير هموم

رأيتك أمس واحتضنا بعضنا بقوة .. لك وحشة
جاء صوت من خلفي يقول أنه لا يصح أن أحتضنك
أقررت بخضوع وابتعدت
تركت حضنك وتركتني ونحن نضحك بصفاء
ويضحك صاحب الصوت أيضا

ماهذا الصفاء؟
هذه ليست دنيا صفاء ورضا؟

وسألتك: "مش ممكن نرجع لبعض تاني"
أجبتني بنفس بسمة الرضا
"مش ممكن يا حبيبتي .. مينفعش خلاص"

تضحك لي نفس ضحكة الرضا .. وأضحك لك برضا ممزوج بألم
صحوت من نومي .. وسادتي مبللة بدموعي
أبحث عنك سريعا بلهفة وخوف
جاءتني البشرى
أنت مازالت في حضني .. لن تفارقه صحوا أو نوما
لن تفارقه مهما أجتهد غبائي وخوفي في ابعادك
من أين لك بكل هذه الطيبة؟

أتيت لك بقلبي على أوراق
حبنا تتوسطه دائما الأوراق
ودائما تتدخل الأوراق كوسيط وتخبرك ما يعجز عنه اللسان

أنا عاوز أشوفك قولي آه وبلاش تلوم
لما ألمسك حلوة الحياة من غير هموم
احساس غريب لما تغيب مبينتهيش
بيقولي ليه قسمة ونصيب وإزاي هاعيش؟
في الحلم دايما بفتكر لمسة إيديك
وأزاي بيحضن القمر ضحكة عينيك

حملت لي الأوراق الوردية البشرى
"عمرنا ما ها نبعد عن بعض ..نبعد عن بعض ازاي واحنا روح واحدة في جسدين"

هاأشهيصكم وأرفع روحكم المعدنية .. وناكل من بيتنا

أنا قلت بلاها مناقشات بيزنطية

وبلاها حب علشان شيما عندها حساسية اليومين دول

وجبت لكم شيء من قبيل التيكنو .. الراب .. الهيفي ميتل

تشغولوها وتقعدوا تهزوا كتفكم زي محمد هنيدي في صعيدي في الجامعة الأمريكية لما قعد جنب غادة عادل وهز كتفه وقال "منورة يا ست الكل"

عيشوا شوية مع البتاعة دي وها أفتح التعليقات لأني سمعت حالا من صبصب إن إبني الأنتيخ أبو العيليه ها يقدم فيا بلاغ

والله أنا بس اشفق عليكم من أن أضيع وقتكم الثمين مع تخاريفي

اختك حبيبتك .. طارق فاروق

أرسلتها للي جيجي حبيبتي صاحبة مدونة جيجي والعالم

وهي جديرة بالقراءة مرات ومرات

للأسف كثير من الناس يكون آخر علمه بأخته يوم عرسها أو بعد ذلك بيوم أو يومين.. وبعدها تصبح في عالم النسيان

سلّمها للرجل (زوجها) وتوكل على الله، متخيلا أنها الآن في ذمة رجلها، وأنه لم يعد له دور في حياتها.. وقع العقد، وسلّم البضاعة، وانتهت المهمة

*******

أختك.. تزيد حاجتها لك حتى لو أنها تزوجت، فهي بحاجة أكبر لعطفك، استشارتك، بث همومها لك، تثبيتك ونصحك لها

أختك.. بسؤالك عنها وعن أحوالها تسعدها وتنعشها وتحييها

تقول إحداهن واصفة حالها عند زيارة أخيها لها: أحس بأنني انتفض من الفرحة بزيارته وسؤاله عني، وأبدأ طوال الليل أتكلم عن أخي أمام زوجي، وأتكلم عن حنان أخي وطيبته .. نوع من الفخر والاستعداد لأي طلق ناري من الزوج فلا بد من الكيد البسيط

فهي تفتخر بإخوانها.. وكأنها تحذر زوجها من الإساءة لها فإخوانها موجودون

وأخرى (مسكينة) تقول: أضطر إلى الكذب على زوجي!! فأخبره بأن أخي يسلم عليه.. اتصل اليوم وسأل عني

*******

أختك.. بسؤالك عن أحوالها وزوجها، والاطمئنان على نفسيتها وحقوقها.. تشعر بأن حقها قد أتاها، وأن الخير ما تعداها

سلام وسؤال ودعوة طيبة منك؛ تجعل من أختك ملكة زمانها في ذاك اليوم

أختك.. لو الموبايل رن برقمك، تبدأ تتكلم معك بصوت عالي، ليسمع زوجها وحموتها أن لها أخ حبيب عضيد يسأل عنها، وأسد يقف بجوارها يتفقدها بين الحين والحين، فرِحة، فخورة بك.. ولسان حالها يقول: أنت لي ملاذ لو ساءت الأحوال يا أخي

*******

أختك.. لا تأخذك الزوجة، والأولاد، ومشاغلك عنها، فهي بك تعتز، وبك تقوى، وبك تشعر بأن الدنيا فيها خير وسلام

أختك.. يكبر قدرها عند زوجها، ويحسب لك ألف حساب .. ويزداد احترامه لك

*******

تحدثنا كثيرا عن حقوق الوالدين - الزوج – الزوجة – الطفل ...، واليوم نذكّر بالأخت المنسيّة

أختك.. ليس لها عنك بديل

حبيبتك ومن ريحة أمك

*******

صفحات في مذكرات فتيات الهنود الحمر .. الحلقة الثانية

"ياصحابي يا أهلي يا جيراني .. نظرا لضيق وقتي الشديد وإني فعلا مش عارفة أعلق عندكم رغم قراءتي لكل سنتوفه بتكتبوها .. فقد قررت الآتي
1- قفلت التعليقات عندي وكفاية انكم لما أوحشكم تسلموا علي من خلال ميلي الشخصي .. أما المجاملات التعليقية فدي أنا تعبت منها .. ومؤكد أنا في الويك اند ها اروح لكم كلكم لأني بحق بحبكم جدا في الله
2- ميلي هو nariman_mido2008@yahoo.com وما تتعبوش نفسكم لو انتم كمان مش فاضين .. كده كده من القلب للقلب رسول من غير ما تقول
3- منعت نفسي منعا باتا عن قراءة أي موضوع يكئب .. أنا بحب الفرفشة وبحب أي موضوع يثير مركز التفكير بس .. أما الكآبة فالحكومة كفيلة بها ليلا ونهارا
4- أنا أكتب بعضا من قناعات شخصية .. بعضا من تهييس إكتئابي "اللي بحاول إني لا أنقله لكم اللي فيكم مكفيكم" .. بعضا من أفراح حياتي وما أكثر أفراحي .. ممكن ساعات تفهموا وممكن أكون تعبانة لدرجة الغموض

5- أدعوكم بشكل مكثف للدعاء لحبيبتنا وأم الكل "أم مالك" ربنا يشفيها ويخليها لأمثالنا .. لأن كلمتها الطيبة الرقيقة الضاحكة العاقلة سابت أثر حلو في كل فرد فينا .. وعاوزين نلاغيها كده في مدونتها لحد ما تزهق من الرقاد وتنط تقعد على الكمبيوتر تكلمنا

عندما ألقت النسر المحلق بالسر الغريب
استهجنت الزهرة البرية هذا الحب باندفاع ظاهر
بينما رسمت رأس الحكمة نظرة مصطنعة من اللا مبالاة على وجهها
ولم تنفعل الواقفة بقبضتها من الأساس لأنها تعرف كل الأسرار وتعلم تفاصيل هذا الحب من أول "هالو أند هاو أر يو .. مرورا بأيام وشهور من المقاومة بين المحبين .. نهاية بانهيار المقاومة واعتراف جيمي بوقوعه في غرام النسر المحلق اللي اصلا بتحبه من أول نظرة ولله الحمد"

رأس الحكمة: ليه يابنتي الأستمورننج المهبب ده .. هو مش كفاية عليا رئيس الجلسة " الوجة العبيط المستعبط"؟ وجوزي "الفارس المأنتخ"؟ كمان يانكيز؟ من كتر الهنا ها نستورد من بره .. كتهم نيلة بره وجوا

الزهرة البرية: وبعدين جوزك طيب الله ثراة "رجل القبيلة الطويل" كان قمر اربعتاشر .. يعني لو متجوزة واحد شبه جوزي "الغيظ المحتدم" كنت فهمت إنك عاوزة تنتقمي من الهنود الحمر وتغيري الصنف .. لكن دا الراجل كان قمر وعسل يمشي على الأرض .. أي نعم طلع عينك .. بس ده حال طبيعي خالص في الهنود الحمر .. ده كان من أجود الأصناف اللي في السوق

ناولت الواقفة بقبضتها غليون السعادة للنسر المحلق اللي خدت تقريع ولوم "مخدوش حمار في مطلع"
وبدأت هي كمان جولتها: العجيب في الأمر إني متفهمة جدا لوحدتك .. وكمان بحترم اختياراتك إنت حرة تماما في حبك .. قلبك ده ملكك وانتي حرة فيه .. لكن الجواز موضوع تاني خالص يا نسورتي .. يعني علشان وحيدة ونفسك في حيطة تروحي تستورديها؟ وبعدين كل اللي انتي محتاجاه إيه بذمتك؟ مش واحد يحرث الأرض ويصطاد الأبقار ينظف الأحصنة ويحمي القبيلة ويحضر معاك افراح صحباتك الأنتيخ؟

النسر المحلق: ياسلام .. وهي المهام دي مش بيعملها غير الهنود الحمر؟ وإيه يعني لما أستغل رجل يانكي في كل هذه الأغراض .. وأخد بونص إني بحبه وبيحبني ومتفاهمين

الواقفة بقبضتها: إنتي حبتيه صح؟ خلاص استوب هير .. إرجعي القهقرى .. ها تلاقي في الهنود الحمر هندي ابن ناس .. نعرف قرعة أبوه منين .. لما تكوني متغاظة تعرفي تطلعي غيظك بدون الإضطرار لمترجم .. وها تحبيه برضه وينفع في كل الأغراض السابقة
وبعدين يا حبيبة قلبي ده النكد هنا على قفا من يشيل .. نروح نجيبه استيراد ليه بس؟
ده غير إنه عديم الحضارة .. أنتي هندية .. هنود هاي هاي هاااااااااااااي .. انا بعشق الهنود الحمر ولا اعترف برجالة غيرهم .. بس خدي بالك انا قلت من الأول أنا أحترم فروقنا الفردية .. إحنا بس بنحذرك علشان قلبك ما ينجرحش .. كفاية جراح

النسر المحلق أخذت وجه هجومي نتيجة ان الواقفة بقبضتها سخرت من حبيب القلب من جوا: كلام متخلف وقديم .. أنا عارفة إن حبك "للأخلاق الرائعة" زوجك هو اللي مخليكي متمسكة بالهنود الحمر .. لكن جوزك حالة استثنائية يا ماما .. كتكم القرف هنود حمر ايه؟ .. بكرشهم وقرعتهم ونفختهم الكدابة وفقرهم ومرضهم وذكوريتهم الشرقية المعفنة ومظهريتهم اللي لا هي دين ولا أصول ولكن حقوق مكتسبة عاوزين يحتفظوا بيها؟
هنود حمر إيه ده تعليمكم حاله متردي وساستكم بيشغلوكم كل شوية في فرقعة إعلامية علشان بدل ما تناقشوا زمن الوكسة والخيبة التقيلة تقعدوا تحاربوا بعض على طواحين الهوا؟ بذمتك ده زمن تفتخري فيه إنك من الهنود الحمر؟
دي الإجتماعات العقيمة – زي اللي احنا فيه ده - مش ممكن تكون غير عند هنود حمر .. الرئيس "الوجه العبيط المستعبط" بقاله ساعة كاملة بيعدد في مميزات جامعتنا عن سائر جامعات الهنود الحمر .. مميزات؟ ده إحنا كلنا كده على بعضنا خيبة بالويبة

الواقفة بقبضتها: خدي بالك من لغة الحوار .. ببساطة إنتي بتكلمينا بلغة أنتم وليس نحن .. يعني حضرتك عندك انفصام وعاوزة نكون احنا حاجة وحضرتك حاجة .. اظن دي مشكلتك الحقيقية .. إنتي اتولدتي في قبيلة تعاني من وكسات حضارية آنية .. وحضرتك عاوزة في العقل الباطن تنفصلي عنها وتنتمي لأي مجتمع آخر .. تفتكري ده سبب كافي لوهم حب بيانكيز معفن لمجرد إنه أحد علماء المجتمعات المتمدنة؟
أعلم علم اليقين أن الهنود الحمر في آخر منحنى الإنحطاط الحضاري والثقافي .. أعلم تمام العلم أنهم خدوا من كل العلوم الدينية والدنيوية قشرتها وأعتبروها سبوبة .. أعلم أن هويتهم وشخصيتهم المستقلة تعاني سرطان الإنتماء للغير سواء للغرب بانحلاله أو للشرق بتزمته وتطرفه .. ومع هذا فلكل منحنى ايام هبوط وايام صعود .. وبما إننا في أسفل وأرزل أيام الهبوط فأنا على ثقة من إن شيء ما ها يتغير .. بس ساعتها إياني وإياك تيجي تغني معانا حلوة بلادي السمرا بلادي الحرة بلادي الفلة بلادي

النسر المحلق: بقى اليانكيز ملهومش حضارة؟ طظ .. خدتوا ايه بالحضارة اللي قاعدين تنعقوا عليها كما البوم .. مش دي نعرة كدابة شوية سيادتك؟ دول مستعمرينك بكل معنى الكلمة ومن غير جنود .. وحضارتك مضمحلة وعلى وشك الإنتهاء .. وهم العلم والثقافة والذوق والطريقة السوية في معاملة النساء .. وقبل ما تجمعي قبضتك يا واقفة بقبضتها أنا بتكلم عن أغلبية وقوانين ومليش دعوة بحالات فردية .. لأ مش كده وبس أنا بتكلم عن شخص حبيته واحترمته أكتر من أي شخص مر في حياتي .. أنا عمري ما شفت حب حلو كده .. ولا احترام لمشاعري وعاداتي وثقافتي كده .. وها أتجوزه ها أتجوزه ها أتجوزووووووووووووووووووووو

رأس الحكمة: لعلمك أنا أقدر أناقشك بموضوعية وأخليكي تعرفي حجم الكارثة اللي إنتي حاطة نفسك فيها .. لكن ببساطة حالي هو حال كل الهنود الحمر الوسطين اللي لسه عندهم بقايا عقل .. فاهمين الغزو الغربي خطر إزاي .. ومش معترفين أصلا بالغزو الشرقي التطرفي القميء اللي بيعاني أهله نفسهم من بلاوي مجتمعية كتيرة نتيجة لتطرفهم .. ولكن مثلي مثل غيري نعاني من احباطات كرهتنا في الكلام
نعاني من وكسات وازمات خلتنا نردد المقولة الخالدة مفيش فايدة
روحي إرمي نفسك في حضن اليانكيز .. بس يابنتي زي ما الشيوعية واتحادها سقطوا بين ليلة وضحاها .. تأكدي أن اليانكيز على نفس الطريق سائرون

واليانكيز بيغيروا كل شيء حسب المصالح ولم نجد لهم ثباتا .. وحكمتهم الخالدة بلدك فين يا يانكيز؟ اللي ها أطلع فلوسها وبترولها وخيراتها وأترك أهلها بورقة التوت
بتتكلمي عن حقوق النسوان؟ دول ميعرفوش معنى حقوق الإنسان علشان يدوا حد حقه .. دي واجهة إعلامية مزيفة تغر اللي فعلا وحقا معندوش انتماء لثقافته
لن يتبقى في هذا العالم إلا أهل حضارة أصلية وإن عانوا من وكسات .. لن يستمر على ظهر هذه الدنيا إلا أصحاب عقيدة حقيقية .. وانت عارفة لو كان هذا اليانكي صاحب عقيدة حقيقية ما غير ملته ليتزوجك .. العقيدة تثبت أكثر كلما واجهت عواصف

الزهرة البرية: موافقة على الجوازة بشرط واحد

النسر المحلق: ومين طلب موافقتك يا منيلة؟ .. سديتوا نفسي عن هذا الإتحاد الكونفدرالي العاطفي .. وإيه شرطك إن شاء الله؟

الزهرة البرية: يتهبب يشرب من نيلها .. ثم يقف يغني لها .. ثم نأكله ملوخية بمبيدات مسرطنة من اللي أهله موردينها

رأس الحكمة: طيب فهمنا انه يشرب من نهر الأجداد الملوث .. أهو يبقى عشرة برضه ويطبع علينا .. وممكن يغني لها .. بلدك فين يا جحا؟ اللي فيها النسر المحلق .. لكن المسرطنة دي يا حبي استوردها فاسدي الهنود الحمر من الرعاع راغبي أكل الحرام وهو ماله؟

الزهرة البرية: هو كده .. لازم نديله الجنسية .. يا إما ها أستعدي عليهم رجال القبيلة يقطعوه شرايح بوفتيك عجالي

رأس الحكمة: اتوكسي يا زهرة انتي .. هم عارفين يقفوا على حيلهم؟ دول خلصوا يا ماما .. مش شايفة العاهات اللي حواليكي؟ بتبصي فين يا بت يا عبيطة؟

الزهرة البرية: بس تصدقي إنها ضربة معلمة بجد .. كل ما عيل من ولاد الهنود دول يروح بعثة يرجع لينا ببت من شوارع اليانكيز تخلف منه عيلين وتجري على سفارتها .. وتهرب بالعيال ويقعد هو ينعي ولده ويبيع كازوزة .. ويقول لك دول احلى بنات .. جميل خالص إحنا كمان لينا أمل في اليانكيز ذوي الشعور الصفراء والعيون الخضراء والمجانص والتراي سيبس والباي سيبس اللي من غير نفخ وحقن .. أحمدك ياااااااااااارب

أنهار الجميع ضحكا على هبل الزهرة البرية .. وتغير موقفها حسب المصالح المرسلة .. من الهجوم الفجائي للإستكنياص العشوائي .. مشكلة الزهرة البرية مشكلة أغلب الهنود الحمر الآن .. معاهم معاهم .. عليهم عليهم

الواقفة بقبضتها: شوفي إحنا ضحكنا كتير وهزرنا كتير .. بس أنا واثقة إنك في لحظة عقل ها تشوفي الكارثة اللي إنتي مقدمة عليها .. الحب قدر ومش بإيد حد .. واللي بيتفلسف فيه اصلا محبش أو ذو مظهر مصطنع بيحب يحافظ عليه .. لكن الزواج ده إلتزام مجتمعي كبير وانتي مش صغيرة .. الظريف كمان إنه هو نفسه مش صغير لا سنا ولا مقاما ومؤكد عارف إن الإختلافات اللي بينكم مستحيل رأب صدعها .. ربنا يهديكي يا نسر

ماهو تحليقك بره القبيلة ده اللي ودانا في داهية

فين أيام سي السيد أبو شنب الي كان شاكم أمينة وفي نفس الوقت بيطبل لزنوبة .. إيييييييييييييييه دنيا

صفحات في مذكرات فتيات الهنود الحمر .. الحلقة الأولى

وجب قراءة هذا البوست أولا لفهم بوست النهاردة
http://mosh3arfa7aga.blogspot.com/2009/05/blog-post_08.html
واللي معندوش وقت ميتعبش نفسه
دول مجرد هنود ذوي ثقافة مضمحلة قاربت الإنحدار والإندثار

دخلت ثلاث فتيات من الهنود الحمر إلى خيمة الإجتماعات
هذه الإجتماعات ستستمر ليومين كاملين

وحسبي الله ونعم الوكيل

يتفنن رئيس القبيلة في ذل اعضاء القبيلة اثناء انعقاد هذه الإجتماعات الحلزونية
التي لا تفيد ولا تضر

ولا يأتي من ورائها إلا صداع لا تنفعه عشبة الهنود الحمر السحرية أم نص جنيه المسماه "أسبو نيلة"

أو العشبة الغالية من صنف "بنادول هباب"

وعندما يبدأ الرئيس المرتدي "ريشاته وعقود أسنان حيواناته وجونالاته في الكلام المكرر الكتير .. ينام أغلب أفراد القبيلة حتى ينهي كلامه .. ويقوموا ليشاركوا المنافقين الطامعين في مناصب "المية خمسة واربعين جنيه" التصفيق الحار اللي يجيده كل اعضاء قبيلة الهنود الحمر منذ نعومة أظافرهم

أنتخت "رأس الحكمة" يمينا وتوسطت الجلسة "الزهرة البرية" وعلى الطرف الشمالي تجلس "الواقفة بقبضتها"

قبل أن تشعلن الغليون تسائلت الزهرة البرية بغباء طبيعي: "هو فين بمفلت الإجتماع؟"

نظرت لها رأس الحكمة بغيظ: بمفلت ايه يا ولية؟

الزهرة البرية: محضر الجلسات اللي ها نتهبب نضيع فيها شوية زيادة من عمرنا التعيس؟

الواقفة بقبضتها وهي تشعل الغليون وتكاد تأكله من الغيظ: اسكتي يا زهرة برية .. اليوم لسه في أوله وقهوة "خيمة البقرة البيضاء" لسه معملتش مفعولها .. جابوا المحضر .. شالوا جدول الأعمال .. كلها سبوبة ولها ناسها .. نحن للإجتماعات .. وهنود تانين خالص للقبض و"البرادس" .. وكده كده الهنود الحمر في نفس مكانهم .. ربنا ياخد الجودة و"اليانكيز المعتدين" اللي شارو بيها

أقترب منها ذو الوجه الغتيت يساعدها في إشعال الغليون .. فنظرن له كلهن بنظرة كراهية للصنف كله النهاردة .. فما بالكم بذي وجه غتيت؟ .. وأفهمته الأرواح الشريرة الرسالة المرسلة من عيونهن "طير إنت" .. فطار غير مأسوف على كرامته

رأس الحكمة: فين البنت "النسر المحلق" مش قالت ها تيجي "تشاطرنا" الإجتماع النهاردة وتهون علينا مصائب الدهر في الرجالة والشغل ومجاميع البلاوي؟

في هذه اللحظة أطلت عليهم النسر المحلق بحليها الفضية وابتسامة مشرقة "غريبة على امثالها" وبدلة كتان رائعة وريجيم ظاهر على كل إنش في جسمها

رأس الحكمة: علي الطلاق من "الفارس المأنتخ" إن البت دي في حالة حب غير طبيعية .. تراهنوني؟

لبست الواقفة بقبضتها وش العبيط وكأنها لا تعلم .. حتى لا يفضح وجهها سر النسر المحلق .. وخاصة أن راس الحكمة بنت لزينة وحفظاهم عن ظهر قلب
وضحكت الزهرة البرية ضحكتها البريئة اللئيمة في ذات الوقت "هيء هيء هيء"

النسر المحلق: هاي يا فتيات الهنود الحمر .. عاملين ايه؟ وشكم يقرف وشكلكم باين وحالتكم "لووووو" ليه؟ وإيه جلود البقر اللي انتم لابسينها دي؟ مش ترفعوا روحي المعدنية وأنا جاية لكم وواخدة يوم أجازة علشان اشوفكم؟ جاتكم القرف

رأس الحكمة: مين؟ أنطقي؟

النسر المحلق بابتسامة اجتهدت أن تخفيها وتلبس وش العبيط: إزاي؟ إشمعنى؟

الزهرة البرية - بضحكة مدوية فضحتهم
وكل رجال الإجتماع المنيل دارت رؤسهم أصلا علشان يتفرجوا على النسر المحلق وعطر "زهرة السيسبان الهندية" معبأ المكان: يابنتي الصب – قطيعة تقطعه - تفضحه عيون

النسر المحلق: ها أقول كلمة واحدة ومش عاوزة تحقيق – ما تيجوا نسيب الإجتماع المهبب ده ونروح نقعد براحتنا في خيمة تريانون؟

رأس الحكمة: انطقي الأول .. وبعدين شكل البت الواقفة بقبضتها عارفة كل حاجة .. هدوئها ووش العبيط ده ميخلش علي

الواقفة بقبضتها تنظر لسقف الخيمة تبحث فيه عن "دبور التوت الأخضر الأسطوري" بعبط بالغ وكأنها مسمعتش

النسر المحلق: بحبه وها أخطفه على "الحصان المبطرخ" ولن أسمح بأي لوم أو تقريع .. دعوني أحب النهاردة وقرعوني بكرة .. هو أرملة "رجل القبيلة الطويل" اللي زيي مش من حقها تتنيل ترجع تحب؟

الزهرة البرية: يبقى بتحبي حب مهبب وفي ذات الوقت يستاهل التقريع .. نهارك تركواز .. مين ده يا بنتي؟

النسر المحلق: واحد من ..

من ..

من ..

اليانكيز الأعداء

الزهرة البرية بزعر بالغ: اليااااااااااااااااااااااانكيز المستعمرين !!!!! يادي الفضيحة أم جلاجل يادي الجرصة أم حناجل .. يا أرواح الأجداد تعالي شوفي بنت العبيطة دي ها تفضحنا إنترناشونال .. ده لا يجوز دينيا ولا قبليا .. ياخسارة رقابتك في التعليق .. يا خسارة شبابك في التقريع

ونظرت الزهرة البرية لرأس الحكمة والواقفة بقبضتها تستعديهم على البت النسر المحلق وتستنصرهم لوجهة نظرها وقوة إنتمائها للهنود الحمر

خلصت الحلقة الأولى
بإذاعة السلام الهندي

صاحبي أغلى من حبيبي

إرتدت مي كامل ملابسها وجلست تنتظره
في يدها كوب النسكافية لم تنم ثلاث ليالي متوالية
وتجلس باسترخاء مصطنع على الكرسي وكأنها وجدت حل لكل هموم الأرض

قررت تسمع أغنية بتحبها
والشمس تميل للمغيب وتلقي بأشعتها الأخيرة على الصالة

أم كلثوم بتغني

الهجر أهون من عذابي في قربك
ولا اعش يوم أندم عليه وأنا جنبك
وكفاية أعيش في الذكريات
ده أنا عشت أكتر من حياتي في حبك

دخل مالك من الخارج ووجهه أسود ينطق بعمق المرار والهموم التي يحملها على عاتقه

عيونه الغائرة تنبأ أنه الأخر لم ينم ليالي متوالية

مساء الخير
مساء النور
شفت مأذون?
أه
طب يالا
أوك مفيش مشاكل ومش ها أمانع اللي إنتي عاوزاه .. ها أنفذه .. بس ولو آخر حق عاوز أعرف ليه؟

لأ .. لو سمحت من فضلك .. مش ها نبدأ جدال من الأول

مش ها نتبادل التهم ومين الغلطان ومين المظلوم

ومين اللي هلكان ومين اللي مش مقدر
كفاية جراح وكلام مرارته مش ها تتنسي بينا إحنا الأتنين

ها ننزل للمأذون علشان نرتاح .. ها نروح له من غير ليه

أنا تعبت .. خلاص أنا تم استهلاكي .. أفوت وأعيش ألاقي برود .. أبدأ أغضب تلحق تراضيني .. أرضى وأعيش نرجع تاني للبرود

أنا عملت إيه؟
خلاص الحب راح؟ ولو كان راح عايشين مع بعض ليه؟
أنا عملت إيه؟
ذنبي إيه؟

تحرك بتجاهها محاولا التأثير والمصالحة والمهادنة مرة أخرى
لأ .. وألف لأ
شوف أنا هاأجيب لك من الآخر
في الدنيا دي إنت صاحبي الوحيد
صاحبي الوحيد بكل معنى الكلمة
الإنسان الوحيد اللي برتاح على كتفه وبرمي دنيتي وهمومها عند أقدامه
طالما وقفت المشاعر .. ومن جوايا ابتديت أكرهك

طالما بقت دخلتك البيت علي ثقيلة .. وبقائي بدونك فيه ساعات سعادة
طالما الدنيا وفلوسها بقت أهم عندك

ومش بشوف على وجهك بشاشة إلا وأنت بتعقد أو تحكي عن صفقة تجارية
وبقيت أنا أم العيال ونسيت الصاحبة بتاعة زمان
آسفة
أنا أسيبك وأنت لسه صاحبي .. ولسه ليك غلاوة في قلبي

وكفة ذكرياتك الحلوة أكتر كتير من كفة الذكريات السيئة
وما اعيش معاك لمجرد إني أحد لوازم حياة ذات واجهة مشرفة
أسيبك يا صاحبي علشان تفضل صاحبي
وأقدر أشوفك وأسلم عليك وأضحك في وشك
أقدر أشتكي لك همومي يوم ما أحتاجك
أقدر أتعاطف معاك لو إنت شفت في الدنيا غدر
أنا ممكن أضحي ومتكنش جوزي
لكن استحالة أخلي الدنيا تخسرني صاحبي

المرة دي أخدها في حضنه غصب عنها
وعيونه دمعت
وعينها جابت شلالات كانت منعاها الكرامة

قال لها في ودانها كل الكلام الجميل اللي كان واحشها
واداها كل طاقة موجبة بحضنه
مش بتحس براحة جسمها الا جوا حضنه

هي أصلا كانت بتتحاشى حضنه لأنه موقع ضعفها الوحيد
دخلوا أوضتهم وناموا لمدة طويلة جدا جدا
ثلاثة أيام سابقة بلا نوم
وأيام قبلها بلا فرحة أو أمان أو اطمئنان

هم مش بيعرفوا يناموا ويفرحوا إلا في عيون بعض

والصبح لقى ورقة كتبتها له ووضعتها تحت فنجان الشاي


The days you spent away from me
I felt weak
I wished I could speak
But I couldn't have except one word
My lord
I love you
Only you
And no one but you
So I finally admit
I am infatuated by you
and that is so true

الشعر الأخراني بتاع البت مانوسة كتبت عليه القصة اللي فوق
نشكر مانوسة
نشكر الأخ علي حسن سلوكه

والله يا قذافي إنت اللي مطري على قلبي

كلنا عارفين قصة تقرير جولدستون

في سطرين اتنين

مجلس الأمم المتحدة لحقوق الإنسان طلب من لجنة يرأسها عم جولدستون إجراء تحقيق عن صحة إرتكاب اسرائيل لجرائم حرب وجرائم ضد الإنسانية في العدوان على غزة شهر ديسمبر الماضي

الأعمى شاف وعارف إن ده حصل فعلا وأي إنكار هو مجرد مصالح أوروبية أمريكية إسرائيلية متشابكة

الراجل ولجنته طلع بتقرير

والتقرير رغم إنه مش منصف ولا زفت

البلدان الغربية قالت ده تقرير غير متوازن وتعتريه عيوب

بس لأنه جاب سيرة المقدسة اسرائيل وسواها بفلسطين.. خدوا بالكم

"ويوجه التقرير الاتهامات إلى إسرائيل والفلسطينيين ، ويوصي الطرفين بأن يقوما بتحقيقاتهما الخاصة حول الأحداث التي وقعت في ديسمبر ويناير ، ويوصي ايضا بالطلب إلى مجلس الأمن رفع المسألة إلى المدعي العام للمحكمة الجنائية الدولية إذا لم يحصل تقدم في غضون ستة أشهر في التحقيقات التي يجريها الطرفان"

التقرير كان ها يتم طرحه يوم 14 أكتوبر

وخرج علينا أبو مازن "اللي هو من الفلسطنين بقى لا مصري ولا دياولوا وإياك حد يجيب سيرة مصر تاني .. ده من دقنه وأفتلوا" وطالب بتأجيل المناقشة لمارس 2010 ربنا يحينا ويحيكم

مش ها ألت وأعجن لأن كلكم عارفين بقية القصة

الراجل ابو مازن طالب بفتح تحقيق مع اللي طالب بالتأجيل "يعني ها يحقق مع نفسه"

حماس اللي بتسيطر على غزة خرج فيها ابو هنية يصرخ وكان ناقص يشد شعره من غيظه من اللي ها يحقق مع نفسه

مصر حلفت طلاق تلاتة ما ليها اي علاقة بتأجيل مناقشة التقرير

وأصلا مناقشة التقرير مكنتش شيء ذو قيمة

ده مش مجلس الأمن

ده مجرد اجتماع روتيني معفن عن كل أمور الشرق الأوسط في مجلس الأمم المتحدة لحقوق الإنسان .. وكانوا ها يحشروا التقرير جواه .. ويمكن كانوا جابوا الرئيس المزمن لسيد قراره يقول "وصلتني عدة طلبات من السادة الأعضاء تطلب غلق باب المناقشة والسك على التقرير .. موافقة"

اليومين اللي فاتوا كلهم كانوا من العينة دي .. بتاعة إحرق دمك ببلاش يا مواطن

شيخ الأزهر عمل جدل على الساحة خد أكبر من حجمه

"حجم الراجل مش الموضوع بس"

الأقصى بيتعرض لغارة جديدة من اليهود

مصر تعبانة وبعافية شويتين وكذلك ستيتة

كل ده كان ها يخلص عليا بجانب ظروف متواترة أخرى

لحد ما يفضحه القذافي "ملك ملوك أفريقيا ذو القرنين" طلع خبر

"أدعولوا أدعولوا"

خلى الضوحكة رجعت لوشي

وبؤي مفتوح بزاوية 180 درجة

الله هو أنا من غيرك كنت عملت إيه يا معمرتي إنتي يا حلوة؟

ده إنت أطعم من الرز المعمر اللي سايح ونايح في زبدته

أي نعم أنت قاعد من سنة 1969 لكن وعزة جلال الله في كوميديتك ما شوفت ولا ها أشوف

أقول فيك إيه ولا إيه؟

ده أنا أعدك أكتر شيء ضحكني بعد أحمد رجب ومصطفى حسين والقصرية

الراجل بمناسبة عيد الجلوس

سواء على القصرية

أو في مستشفى المجانين

أو على عرش أفريقيا الجعانة

أزاح الستار عن سيارتين

سماهم "الصاروخ"

نفذتهم ليه شركة إيطالية

وقال إيييييييييييييييييييييييييييييييييييييييييييييييييييييه

من تصميمه

يا عين أمك يا فورد

على وزن يا عين أمك يا فرساتشي بالضبط

وأقمشة السيارتين من ليبيا؟؟؟؟؟؟؟؟؟؟؟؟؟؟؟؟؟؟؟؟

هاو؟

كاو؟

فاو؟

أقمشة إزاي يعني؟

من مصانع ليبيا؟

وألا من تصميماته اللوزعية برضه؟

ياعين أمك يا فرساتشي

ربنا يخلي كل اللي قاعدين على قلبنا سنين طواااااااااااااااااااااااااااااااااال

والله بقوا عشرة

في غلاوة أمهاتنا بالضبط

هو حد يقدر يعزل أو يثور على أمه؟

وعلى رأي اللمبي: هو اللي يتخنق من أمه يعمل إيه؟

ماذا أقول اليوم لرامز عباس

أخي العزيز الى قلبي رامز عباس
تتسائل عن السبب حول إحجامي في الفترة الأخيرة عن التعليق في مدونتك الغالية

حاولت ان أرد عليك رد دبلوماسي فما استطعت
أرغب في ان أخبرك
الحقيقة

رامز كلما دخلت عندك وقرأت بوست لك تذكرت عجزي عن نصرتك
كيف أنصرك يا مصري؟
كيف أعينك للحصول على حقك المشروع في عملية تعيد لك حاسة السمع او بعضا منها؟
أجعجع بكلمات النصرة؟
هل هذا كل ما أستطيعه؟
من يوم أرسلت لي الملف لنشر قصتك مع عبدة الروتين
أجد ان الموقف أكبر من النشر
أنت مصري شاب من أقل حقوقك على هذه البلد ان تتعالج على حساب الدولة

هناك من يعالج على حساب الدولة لمجرد أنهم واجهات إعلامية حتى لو كانوا واجهات غير مشرفة .. زي مسيو حاحا .. فمن لفقراء مصر؟ ومن لأبناء موظفي الدولة؟
من لأبناءها الشباب الواعدين .. امل مصر لا يستطيعوا الحصول على أبسط الحقوق

عزيزي رامز امتنعت عن التعليق خجلا منك
أمتنعت خجلا من عجزي ان افعل شيء يتعدى الشجب والتنديد والجعير

امتنعت عن الكتابة عن الأقصى خجلا من الله
مع أن اليوم الجمعة 9 أكتوبر يوم مخصص لنصرة الأقصى
امتنعت خجلا من إسمي كمسلمة
لأ استطيع فعل شيء حقيقي
سئمت الجعير ونعيق البوم
طالما قصرت اليد عن الفعل
وعجز الصوت عن ايقاظ النيام
أو إخافة اللئام
فكيف أطل عليك بتعليق ماهو إلا كلمتين قاصرتين

أعلق عندك عندما أنجح في إيصال صوتك لمخلوق له إرادة الفعل
اللهم بلغ صوتي لأهل الحل والربط
من سيسئلون يوم الدين عن العباد
والحقوق ستتعلق بالرقاب

أستطيع أنا بشكل شخصي ان اساعدك وبكل سهولة في عملية زرع القوقعة
ولكني خفت يا صديقي ان تشكل هذه الكلمة لك اي اهانة رغم ان لهذا وضع الله الإسلام على الأرض وجعل أخوتنا أولى من أخوة الدم

أعلم أنك ترغب أن تأخد حقك في هذه الدولة
أعلم أنك تطالب بحق مشروع
أعلم أنك تحارب من باب لا يموت حق وراءه مطالب
ولكني لا أعرف كيف أنصرك يا أخي الصغير
في بلد أصبحت الفهلوة نبراس
والنصب منهج حياة
والإحباط منهج يومي
ماذا أفعل وأين أخفي خجلي منك وممن يحتاجون نصرتنا مثلك؟

أدعو زميلنا رامز عباس لعرض موضوعه مرة أخرى من خلال نافذة مدونتي
واللي يا جماعة يعرف يوصل صوته لمسئول
ويعرف يجيب لنا اجابة يقول

تعبت من نصرة البشر بالكلام
فاللهم اجعلني من اهل الأفعال

انكسارات

ذكروا في زمن المذلة أن الجري نصف الجدعنة

وأرى أن تحمل نتائج خياراتك هي الجدعنة كاملة غير منقوصة

خبراتك بالحياة لن تجعل كل خياراتك صحيحة

ولا صغر سنك تعني الرعونة الدائمة ومجافاة الحكمة

ذواتنا المتضخمة تهتف لنا

تشجعنا على التمادي والعنت مهما كانت الإختيارات

إن أخطئت تحمل نتائج أفعالك بشجاعة
ولا تعتبر اعتذارك عن جرح مشاعر الغير ذل أو إهانة

غدا يحمل لنا يوم جميل

ألا تأت ياغدي؟

أشتقت إليك

كن جريئا حين تذكر حاجتك لحبي

كما كنت جريئة حين ذكرت حاجتي لصدقك
انا أعشق الجراءة

ولا يداعب قلبي إلا الرجل الجريء

في هذا الزمن
أصبحت النساء أكثر شجاعة
أكثر جراءة
أكثر تحمل لصدمات ضعف الآخر

هل تنتظر مني أنا الخطوة الأولى؟
أين أنت يازمن ضعفي؟
أشتاق إليك فعلمني ألا أشتاق

أرحت رأسي المثقل بالهموم على صدرك
وغفيت عيني على وقع كلامك المريح
وصوتك الهاديء

سريت عني بحكاياتك يا شهريار الزمان
وأنرت لي ظلمة الليل يانجمي اللامع

إطمئننت ونسيت ان للأقدار يد وأحكام
وغفلت عن قسوة الأيام الدائمة على قلبي الهرم

فتحت عيني فجأة
فما وجدت غير الفراغ
وأقداري الدائمة

وقلب يرغب في هدنة من الحروب

إعتمدت كثيرا على الذكاء المُشع من عينيك
ألا تتعدى الخط الأحمر المشتعل
خط كرامتي

هل كان غباءا مني توقع ذكاءك؟

أم غباءا منك توقع خضوعي؟

أم هي غلطة عابرة ولامست وتر عزة نفسي؟

أم رغبة من كلينا في الهروب والفرار السريع؟

مالي وذكر الغباء بكثرة هذه الأيام؟

تعالوا نفضفض

لاحظت مؤخرا إن حالتنا النفسية مش تمام يا جودعان

وكلنا شبه الواد اللي متعلق من قفاه ده

قلت يا بت يا سوتيتة وهو احنا صحاب من فراغ؟

آه الحقيقة احنا صحاب ورق

يعني من فراغ

بلا مصالح

ولكن بينا كلمات طيبة بنريح بيها بعض

ويمكن كلمة طيبة بتسعدنا وتغير طعم اليوم بالنسبة لينا

قررت انا ستيتة رئيسة جمعية المرأة المتوحشة القرارات الآتية

1- فتح تعليقات الغير معرف لهذا البوست فقط

2- تشجيع السادة المدونين على الرد بغير معرف لأنه بوست فضفضة

3- مسح أي تعليق تهكمي أو به إجابات ساخرة تناسب الشخصية المصرية العادية .. أي نعم إحنا ربنا كرمنا بالدم الخفيف والتهكم حتى على همومنا .. ولكن "البوست ده للفضفضة والراحة النفسية فقط"

4- حقوق الرد في البوست ده مكفولة للجميع وليست لصاحبة البلوج فقط .. يعني اللي يلاقي حد بيفضفض ويحب يقول له شيء من واقع تجربته وخبرته يبقى "يامرحب بالتلفزيون يا مرحب"

الموضوع هو سؤال بسيط "بس كبير قوي"

لو رجع بيك الزمن لورا .. ورجعت لورا بنفس قدراتك العقلية وخبراتك النهاردة

تحب ترجع كام سنة؟

وها تغير إيه في حياتك؟

"من الحاجات اللي فعلا تملك إنك تغيرها" وليست الأمور القدرية اللي تمت بحكمة من رب العالمين

يالا نفضفض وياسلام لو حد بعد ما فضفض وربنا قدره على فعل كل خير

يقول

تقدر تغير الحاجات دي دلوقت من غير إعادة "مستحيلة للزمن؟"

ما يقعد على المداود إلا شر البقر

كل سنة وأنتم طيبين

أكتوبر القديم ذكراه جت تاني .. تفكرنا بآخر زمن العزة وتحقيق الأماني .. أرفع رأسك يا مصري
أرفعها؟ إزاي؟ .. فقر ومهانة وطاعون .. جسمي ونفسي بيصرخوا أه ياني
يا حبيبي ده انت كريم العنصرين
آه وغني وقولي اللي بنى مصر حلواني

لو كانوا بيقعدوا على كراسي البلد دي غير شر البقر كان لازم يكون عندكم أمل في بكره وكلام الأغاني دي

انا شخصيا لا يعنيني الإختلاف الفقهي في النقاب على إطلاق العموم

والسلفي ربنا معاه والأخواني ربنا يتولاه واللي زينا ربنا يرضى عنه برضه ويهديه لطريق الحق

ولكن في الخبر ده

فوجئ طنطاوى أثناء جولته التفقدية فى معهد فتيات أحمد الليبى بمدينة نصر، أمس الأول، بإحدى الطالبات فى الصف الثانى الإعدادى ترتدى النقاب داخل الفصل، فانفعل بشدة وطالبها بضرورة خلع نقابها
أين الحريات الشخصية؟

ولم تجد الطالبة أمامها وسيلة أخرى فى مواجهة إصرار شيخ الأزهر على خلع النقاب سوى تنفيذ الأمر بخلعه وكشف وجهها، فرد طنطاوى قائلاً: «لما إنت كده أمال لو كنت جميلة شوية كنت عملتى إيه؟»
أين الذوق العام؟

لما إنت كده أمال لو كنت جميلة شوية كنت عملتى إيه؟
أين الحياء يا شايب؟

وطلب شيخ الأزهر من الطالبة عدم ارتداء النقاب مرة أخرى طوال حياتها، فقالت إنها تقوم بارتدائه حتى لا يراها أحد، فرد طنطاوى منفعلاً: «قلت لك إن النقاب لا علاقة له بالإسلام وهو مجرد عادة، وأنا أفهم فى الدين أكتر منك ومن اللى خلفوكى»
أين التواضع يا شيخ أعرق جامعات الإسلام؟

اعطيت نفسك لقب علامة رسمي كمان؟

يعني راجل مفترض فيه أنه أوتي من العلم زبدته ومن أدب القرآن رأسه
1- بيهين بنت صغيرة عمرها ما هاتعرف ترد عليه
2- بيجبرها على فعل هي مش مقتنعة بيه في نفس الوقت اللي فعلها الأصلي مش بيضر حد
3- بيجرح كرامتها بذكر تواضع مستوى جمالها في ملحوظة غير تربوية لا ينتهي تأثيرها النفسي ابدا .. ولما البنت دي الصبح نلاقيها بطلت تعليم وحاطة حزام ناسف .. أو بطلت أزهر خالص وتحولت لنوال سعداوي نتيجة لكراهية هذه المؤسسة ياريت ساعتها نفتكر حجم الإهانة اللي شافتها في بداية تشكل نفسيتها
4- شيخ الأزهر ذكر أهل "اللي خلفوكي" البنت في اشارة مهينة وياريت أبوها يكون من الشجاعة بمكان ويرفع عليه قضية من مجاميعه
أي نعم ابوها ممكن يكون فقير
لكن شحططة طنطاوي في المحاكم وتجريصه بعد كل هذا السفه المتأخر "لأن عجائب سفهه لا تنتهي من زمان" يستاهل فعلا

على جانب آخر لا يبتعد عنا كتير

لما يكون الراجل ده راس مؤسستنا الدينية

يبقى الخبر اللي قاهرني ده طبيعي جدا وهو بتاريخ 27 سبتمبر عن جريدة الحياة
" أصيب أكثر من 40 فلسطينياً برصاص الشرطة الاسرائيلية في معركة الدفاع عن المسجد الأقصى المبارك في وجه المستوطنين الذين حاولوا اقتحامه بالتزامن مع ذكرى اقتحامه في مثل هذا اليوم من العام 2000، ما أدى الى اندلاع انتفاضة الأقصى. كما أصيب 13 من أفراد الشرطة الاسرائيلية التي اعتقلت عدداً من الفلسطينيين أثناء المواجهات.ورداً على تصدي مئات المسلمين والمسيحيين الفلسطينيين في القدس المحتلة للمستوطنين ورجال الشرطة الاسرائيلية المدججين بالسلاح، أغلقت الشرطة الحرم القدسي أمام المصلين المسلمين واليهود بعد المواجهات الدامية التي أعقبت محاولة مجموعة من اليهود اقتحام المسجد
وقال خطيب المسجد الأقصى، رئيس الهيئة الإسلامية العليا الشيخ عكرمة صبري إن المسلمين المرابطين في المسجد أفشلوا محاولة اليهود المتطرفين اقتحام المسجد، مشيراً إلى أن القوات الإسرائيلية قامت إثر ذلك بإطلاق النار والغاز المسيل للدموع، ما أدى إلى وقوع الإصابات"

فعلا كتها ستين نيلة على رأي هاني حامد

مين؟
ده سؤال؟ اللي تقول يا عرب

كتها نيلة اللي عايزة "العرب"

5 مليار دولار ينفقها العرب سنويا على السحرة وفك الأعمال وربط المفكوك والشيخة أم ناصر

طيب ومصر يا عبلة؟
إسم الله عليهم هم لاقين ياكلوا دول بيصرفوا على قدهم10 مليار جنيه على هذا الغرض وحده
غير بالصلاة ع النبي 11 مليار جنيه للفياجرا
غير إسم الله على مقامكم 37 مليار جنيه للمخدرات

"نحن نصرف حوالي 58 مليار جنيه على المزاج والسُطل بكافة أنواعها .. عمار حقيقي يا مصر"

في بحث لمركز البحوث الإجتماعية والجنائية عام 2004- 2005 وُجد أن مليون مصري يعتقدوا انهم ملبوسين ومسحورين ومتهببين على حبابي عين اللي جابوهم
وبيعالجهم 350 ألف دجال
بواقع دجال لكل 3 هطل

"مين قال الشهادات أهم؟ كان زماني بانية العمارة فوقيها الروف"

50% من النساء المصريات يعتقدوا بوجود قوة وقدرة للسحر

يعني لو بيدخل البلوج مائة إمرأه .. خمسين منهم بيدوروا على الشيخ أبو الكرمات .. ولو موصولش له فده لأنهن مكسوفين أو حد كابح جماحهم وشاكمهم بس

63% من المصريين "رجال ونساء" يؤمنون بالخرافات والخزعبلات .. وإن الشيخ أبو دقن بيطلع الجن من غير فلوس أما الشيخ أبو شنب فده سره باتع ومراته الجنية مفترية

حسب رأي الجمعية المصرية للطب النفسي من 70 إلى 80 % من المرضى النفسيين يلجئوا للحلول الشعبية "شيخ محضر يا شيخ محضر وياعيني ع اللي ها يحضر"

ليه الهبل والعبط والجهل مسيطرين على العقل العربي؟
ده سؤال

قبل ما تجاوب إليك الحقائق الآتية

1- السحر حقيقة مذكورة بالأديان السماوية
ولكن "وماهم بضارين به من أحد إلا بإذن الله"
سيبنا ليه اللجوء لرب السموات اللي بإيده الأمر؟
ورحنا نصرف فلوسنا ووقتنا عند قدرة البشر المحدودة التي تميل للنصب بشكل أساسي ومؤكد؟

2- في أثناء تواجدي وسط الخليجيات وجدت أن موضوع الحسد والسحر يصل لدرجة فلانة حسدت الجزمة "أعزكم الله" فالكعب اتكسر .. وفلانة بتاخد 20 الف ريال لفك سحر ضرتي اللي عملته ليا .. فيه حي كامل عندنا يا دكتورة فيه حاسدين؟ إزاي يا دكتورة؟ لو واحدة عاوزة تحسد حد تروح "تكري حاسد من الحي ده يحسدها" هع هع هع "رد فعل طبعا ميعجبش اللي بتحكي" !!!!

أما ما يحدث في المغرب العربي وقصص السحر والسحرة فيشيب لها الولدان .. وبيقدسوا سيدي "عكروت" اللي بيشرب المية وهي بتغلي .. وجوز بت مغربية شبه أحمد ذكي لواد فرنساوي حتة من آلان ديلون "قصة أعرف تفاصيل النصب الرسمي فيها كامل" .. وبيروحوا يقدموا لسعادته القرابين .. آه والله القرابين والترضيات

3- الغرب يؤمن بشكل لا يمكن تجاهله بوجود كائنات فضائية
هم بيشوفوا يعرفوا وجودهم إزاي؟
لو غزونا هم أذكى ولا إحنا؟
جهزنا لحرب خارج الغلاف الجوي ولا لأ؟
وفي نفس الوقت ماشيين في مسيرة العلم عادي خالص ومعندهمش هوس يقعدهم عن العمل والتقدم

إحنا بقى
هل الكائنات الفضائية مسلمووووووون أم مسيحيوووووون أكرمكم الله؟
هل وصلتهم الرسالة السماوية أم لا؟
الشيخ علام ها يعرف يكلمهم عبر الجن لما ينزلوا ولا لأ؟
نفك السحر عند الشيخ زعبوط والا عند القسيس بولس؟
ده أم حتاتة جربت "السفلي" ولقت انه حاجة قشطة خالص وأرتاحت عليه فسيولوجيا ونفسيا :) "سوري على قلة الأدب"

بس لما 3 دقائق فيديو للكلب شاليط تساوي عشرين إمرأه عربية
19 خرجوا فعلا ولسه واحدة يمكن تخرج بكرة
لازم ساعتها افرغ المخزون وإلا ها أمرض نفسيا
وأضطر ألجأ لمستشفى جمال ماضي ابو العزايم
وبما إني مصرية يمكن اتهبب وأروح للشيخ علام

وحيييييييييييييييييييييييي

"بوست من وحي وكستنا وخيبتنا مع اليهود ومقال كمان لإبراهيم عيسى قلب علي المواجع والبطاطس"

الهالة "قصة من وحي شارميد حبيبة مانوسة الوحيدة"

سمحت لك بالمرور .. ولم اشك أبدا .. انني أقف في هالتك النورانية .. وانني قد وجدت ملاكي الحارس

في الليالي المظلمة .. أنت الوحيد الذي أردته .. إنني قد أدمنت التحليق مع هالتك .. أعد قدمي للأرض مرة أخرى

ألوان هالتك صورتها عيني .. على الشكل الأبيض الناصع .. الآن أجدني مشوشة .. لم أجيد الحكم؟ أم أني مهلوسة أصيلة؟ أم هي بألوان كل البشر؟ وتمني العين لواحة أمان صورها بيضاء؟

كيف رأيت تلك الهالة الزائفة .. سأمر عبر هذه الهالة .. وسأجد الطريق .. مثلي غير قابل للكسر .. ربما قليلا من مذاق الحزن ونكهة الإنحناء .. لكن مثلي لا ينكسر

كل قانون كسرته أنا .. وكل باب فتحته أنا .. هناك مؤكد سبب ولكني لا أعلمه .. لن اخرجك من داخلي بشكل كامل .. وإلا وقعت في الفخ مرة أخرى

أبحت لك نفسي .. وفتحت صندوق ذكرياتي .. أسترجع معك طعم الأيام الجميلة تارة .. وأجتر منه مرار العلقم تارة أخرى .. وأداوي نفسي في أحضانك .. التي ظننت لغبائي المفرط أنها آمنة

فرغت الحكايات .. وأخرجت من صندوقي آخر ذكرى .. وقمت بأخر طقوس الإعتراف بحبي وراحتي في قربك .. وأرقت دموعي النادرة عند راحة كفوفك .. تركتني وحيدة .. واخذت مخزوني فيضا لثروة حكاياتك ونوادرك .. كيف وقعت انا في هذه المعضلة؟

في نفس ليلة الإعتراف أجد أنني مجرد بديل .. أبدا لن أكون .. أنا مجرد أسباب راحة؟ أنا أكبر وأكثر شأنا من هذا بكثير .. في نظري أنا .. وهذا يكفيني

لن أخرجك أبدا بشكل كامل .. أحتاج بعضا من الذكريات .. أحتاج كثيرا من الضحكات .. أحتاج رائحة أيام غالية في أنفي .. أحتاج تعلم الدرس جيدا

صندوقي المغلق .. أياك أن تفتح مغاليقك مرة أخرى .. متى نسيت الدرس؟ كبرت لدرجة الزهايمر؟ أم أشتقت لصديق وحيد في العمر كله؟

تخاريف ستيتة

أجمل ما أشم في رجل
رائحة الرجولة
وليس العطر الباريسي الفاخر

تلك الرائحة التي تتشكل كهالة حوله
وتُشكل وجدان كل من يقع أسير هواه

العطر يمكنك الحصول عليه رخيصا .. غاليا .. لا أهتم
أما رائحة الرجولة فهي غالية
لا تُستحدث
ولا توجد بعد عدم

------------

تعجبني فلسفة الهنود
دون النظر لوثنيتهم
هم يقدرون الأشجار ويعتبرونها رمزا للمرأة

لو أني لك شجرة تستظل بأوراقها
تخلع جرابك الممتليء بالهموم وتلقيه تحتها

فقذفتني بحجر

أسقطت عليك فاكهتي
ورحمت همومك من قسوة أغصاني تشج رأسك العارية
ولم أطلب أي ثمن إلا أن تسقي جذوري الممتدة بشرايين قلبك

كنت لك الصديق
ولم أطلب إلا القليل من الحب
الكثير جدا من مراعاة الكرامة المتدفقة في خلايا جسدي

أنت بغباء ذكوري نزعت الجذور
و جففت منابع القلب
وحاولت قتل خلايا الجسد

من لك غير قلبي يحتوي غرفك المظلمة؟
من لك بعدما مات الظل؟
وبقى لك حر الهجير

عجبت لغباءك يابن آدم

إنت أول كل شيء

أول نظرة لرجل يخطف عيوني

أول ابتسامة لرجل يأسر قلبي

أول لمسة إيد واحنا بنشتري الشبكة وإيدك حاضنة إيدي

أول قبلة مسروقة في بيت أهلي .. كنت زوجي .. ولكن ما أحلى القبلات المسروقة يومها

أول عيدية تفرحني وتكسفني .. مخدتش من حد غريب شيء قبلك .. وكنت غريب جدا .. وقريب جدا

أول نظرة إعجاب تأسر قلبي .. يوم كتب كتابنا .. وبعد ما روحت كل الناس ورجعتلي وأنا بفتح لك الباب

أول حد يطبطب علي ويصالحني ويفهمني .. أول الحنان

أول كلمة مبروك .. ونظرة مبروك .. في كل لحظة فرح في حياتي

أجمل حب مليء بساعات من السعادة .. لو عرفته النساء لقاتلتني عليه

إنت أول كل شيء حلو حصل لي

لا كل نظرة تسوى .. نظرتك بس

ولا كل لمسة تحسني .. لمستك بس

ولا كل كلمة غالية .. منك بس

إنت أول كل شيء حلو حصل لي

خليك آخره .. مش عاوزة حد تاني .. محتاجلك إنت بس

أنتِ تستحقين الحب

كان ياما كان يا سادة يا كرام ولا يحلا الكلام إلا بذكر النبي عليه الصلاة والسلام

كان لي جارة تختفي قسمات وجهها خلف التجاعيد

ومن كثرة بؤسها وعبوسها ارتسمت علامات تشبه الحفر والنقر على وجهها وهي في الأربعين

وكانت ابنتها صديقتي الأثيرة وزميلة دراستي الجامعية

كانت الثائرة دوما .. المعترضة دوما .. المضربة عن الزواج تأبيدا

سألتها يوما: هل آلمك فراق والدك لك إلى هذا الحد؟ وتفضيله بيتا آخر وأمرأة أخرى على أمك؟ هل حولك هذا لمعقدة تكرهين الزواج إسما وطريقة حياة أزلية؟

وهالني ما سمعت من الفتاة

أذهلني فيض حكمة الكلمات وغرابتها

"بابا مقتلنيش .. زعلت قوي أنه سابني .. بس اللي قتلتني فعلا ماما .. ياريتها كانت قوية .. ياريتها صمدت وقدرت تحب نفسها بدل حالة الرثاء اللي استمرت سنوات متتالية .. سنوات بتبكي يا ستيتة .. إذا غنت ثومة بكت .. إن سمعت قرآن بكت .. تبكيها الأماكن .. تبكيها الروائح .. لو صمدت أمي بشخصية قوية .. لو أرتفعت أمي عن أرض الحزن .. لو قدرت أمي نفسها حق قدرها .. لو لم تشعر بالدونية لزهد بابا فيها .. ما كنت أنا أنا .. أبويا دفع تمن نزوته .. وأنا بدفع تمن ضعف أمي"

تذكرت كلماتها وأنا أقرأ بديع ما كتبت "أحلام مستغانمى" ودعوني أشارككم قراءة هذه الكلمات

علها تكون عزاء لبعض منا .. ودافع ليوم جديد وبداية جديدة لأخريات

إن كان الحب هو أفضل عملية شد وجه .. فإن أفضل كريم ضد التجاعيد هو النسيان

لاتدعى الفقدان ينكتب بؤساً وتجاعيد على وجهك

فالخسارة العاطفية تظهر أول ماتظهر على وجه المرأة .. مهما تجملت ستشى بك الملامح المتعبة

العينان اللتان لم تناما .. الخدان اللذان كانا نضرين ومرت بهما سواقى الدموع

الرموش التى كانت ساحرة وجارحة وذبلت وانكسرت لفرط بكائك السرى وانهطالك الداخلى المتواصل

أخرجى هذا الرجل من وجهك أولاً .. لابد ألا تريه فى المرآه عندما تقفين أمامها فى الصباح

فبشاعته داخلك وذلك الكم من الأذى الذى ألحقه بك سيحول إلى أحاسيس قبيحة وضارة

تشغل كل مكان كان يحتله فى جسدك .. سيعبر وحله شرايينك وكريات دمك

وينتهى فى ملامح وجهك

لا تدفعى من جمالك ونضارتك ثمن خروج هذا الرجل من حياتك .. فهو لم يدفع هذه "القيمة المضافة" للفراق لا وقتاً ولا زمناً

حداده عليك سيكون قصيراً فلو كان طويلاً وموجعاً ومكلفاً لما تخلى عنك

الوجه هو أول مايراه فيك الآخرون وأول مارآه فيك هذا الرجل يوم أحبك .. يومها حتماً ماكنت على هذا القدر من الذبول .. كان حولك مشروعات حب فقد كنتِ تبثين ذبذبات بهجة

تذكرى كم كنت يومها مشرقه وشهية .. كنت متألقه .. كنت واثقه .. كنت امرأة

اعلمى أن للإشعاع جاذبية وأن شعورك بأنك محبوبة يجذب اليك الحب

لذا عندما يتخلى عنك الحب لا تجدين أحدا من الذين كانوا يتمنونك يوم كنت عاشقه فاحباطك وذبولك والذبذبات السلبية التى تبثها أنوثك المجروحه تجعلهم ينسحبون

فى انتظار أن تحبى أحداً ولكى يحبك أحدا

أحبى نفسك . جمليها .. دلليها .. غارى عليها

اهديها ماكنت تبخلين به عليها لتهديه الى من تحبين

خصصى لها من الوقت مالم تكونى فى الماضى تملكين

أعديها للحب دون أن تخبريها بذلك

أمك؟ أشمعنى

وعنها وخدها جوزين أقلام وهبدته بالفازة وجروا بعض على القسم

إيه الكلام الغريب ده؟ لأ مش ده

على رأي سناء يونس في مسرحية سك على بناتك "قالي أبوك وأهلك قلته أمك وأمين أمك" مع الإعتذار لجميع الأهل والأصدقاء

لا يخفى عن السادة المدونين .. الأحياء منهم والمهيسين .. أنه من أهم شروط العريس المتين .. إنه يكون يتيم الوالدين

آه والله ومع الأسف مع الألم

لو واحدة جايبة عريس لواحدة ممكن جدا تقول لها
"لأ وإيه مامته ميتة"
تقولوا ده هبل .. ده عبط .. دي الست اللي توفت دي اللي كان بيُكرم بفضل دعائها .. كل ده فجأه بيتنسي والعروسة وأهلها مش بيفتكروا غير بس إختفاء الحماه اللي ارتبطت في عقلنا بماري منيب "عندي من الدنيا إبن باشمهندس أأأأأأأأد الدنيا إسمه سي حسين بيه"

طيب العروسة الميمونة دي ربنا أكرمها بفقد الحماه بدري بدري .. واللي قاعدين نعمل فيهم إيه؟
وليه خطر على بالي موضوع "القنبلة الذرية" ده دلوقت؟

لأن ببساطة بنشوف القصة الأزلية في نص بيوت البرية كل ليلة عيد هنية

كل عيد لما نص بيوت مصر – وخاصة العرايس والعرسان- تبدأ النقاش البيظنتي الحميم "ها نروح لمين الأول بيت بابي ولا بيت أمك؟" وبدل ما "ياليلة العيد أنستينا" ندخل على مقطوعة "أمك قنبلة ذرية ومامي وردة برية"

في رأيكم كيف تصلوا للسعادة الزوجية وخاصة في الأعياد والمواسم والمناسبات اللي هي أوقات بسيطة جدا في حياتنا لازم نفرح فيها؟

نروح بيت أهل مين الأول؟ ونمشي اليوم أو أيام العيد إزاي؟ وياريت اللي عنده تجربة ناجحة ميستخسرش ذكرها للي لسه على البر وها يتكلم نظري .. وياريت اللي على البر برضه يقول كلام منطقي إحنا مش ها نتجوز هنا علشان نتجمل ونقول اللي يرضي عريس أو عروسة؟

وبلاش الله يكرمكم أنا وحبيبي روحين في زكيبة يتعلموا منا الحبيبة

لأني ببساطة وجدت إن الكلام ده بسرعة بيتنسي والأقنعة بتسقط ويبدأ وش الأسد في الظهور سريعا

وليه الناس مش بتتكلم في الأمور دي فترة الخطوبة بتاعة التسبيل والهمس واللمس .. وليه الأفكار متتعرضش بصدق .. وليه القوانين متتحطش بدون مواربة ولؤم؟

ليه إحنا ناس معندناش ثقافة فرح وبنحب النكد بالشكل المبالغ فيه حتى في أيام السعادة اليتيمة؟

الحماه دي ست وأم قضت عمر بتربي وبتكبر وبتجيب لك أم أولادك اللي معمرة بيتك .. من غير أي تريقة الست مراتك دي اللي انت قعدت حوشت لما أحوليت علشان تتجوزها

الحماه دي الست اللي ولدت قيصري وفتحوا بطنها وقضت سنين طويلة لحد ما شابت علشان تجيب لك سبع البرمبة اللي مسئول عنك وعن ولادك ومخليكي مشرأبة وبتقولي بنص بؤ "أنا مدام فلان"

الحما دي أم ومن حقها تفرح يوم العيد ومتنكدوش عليها وعلى نفسكم قبليها

خدوا الأمور ببساطة شوية .. السعادة مش بعيدة .. بس عاوزة ناس بتحب تفرح .. مش ناس جبلت على الهم والغم وبتتحزم وتقول "بكرة النكد بكرة بكرة بكرة .. بكرة النكد"

مسلسل الرحايا .. حلو بجد

مليش دعوة أنا بالأستفتاءات والكلام ده

أنا كل اللي أعرفه إني من فترة كبيرة مفيش شيء يشدني علشان أستنى ميعاده

السؤال المُلح على ذهني

ليه بتشدنا الدراما اللي بتتكلم عن الصعيد؟

يعني برضه أفتكر ان ذئاب الجبل والضوء الشارد كانوا حلوين جدا في أول عرض لهم

وشدونا كلنا

وفيما عدا مسلسل جمال سليمان والغولة بتاعته - اللي كان شبه كارتون سبونج بوب سكوير بانتس "والله عفرتو فضل يحفظني في اسمه" - كل مسلسلات الصعيد حلوة

نور الشريف رائع في الدور .. وفي الحلقة الأخيرة وجع قلبي أنا واللي قاعدين حولي وفعلا لقينا دموع في عيونا

مش عارفة نور الشريف وصل للأداء ده إزاي؟ بس مش تقليدي ابدا ولا شبه الحاج متولي بسطحيته ولا الدالي بأفعاله الأسطورية .. راجل وأب مصري حقيقي يحمل كل المتناقضات الطبيعية

حنين وشديد

أناني ومعطاء

ويحمل اخطر عيب في تاريخ البشرية

بيحب أبن أكتر من بقية الأبناء ويؤثره بالحنان

سوسن بدر ولا أروع .. متألقة وصدقت فعلا أنها مجنونة .. متوحشة .. لا يؤمن عاقبة اللي يجي ناحية مصالحها

لها مشاهد أكثر من رائعة ويظاهر إن الممثلين زي الفاكهة كل ما بيكبروا بينضجوا وسقف الإبداع عند أغلبهم بيعلى قوي

اشعار عبد الرحمن الأبنودي في المقدمة والنهاية مع صوت على الحجار هزتني جدا .. وخاصة المواويل القصيرة اللي جوا الحلقات اللي آخرها يا ولدي ويا قلبي

المسلسل ببساطة شديدة بيتكلم عن العدل بين الأبناء وخطورة اللي يروح يتجوز أورطة ستات وجايب من كل واحدة عيال ثم لا يعدل بين الأبناء ويقع عياله في أول جريمة في التاريخ وأخطر جريمة في التاريخ وهي قتل أخيهم

بس كل ده جوا دراما جميلة جدا ولذيذة طبعا طالما فيها مجموعة ستات متنوعة بيتخانقوا على راجل

بوست عند حناني لازم تقرأوه

كل سنة وانتم كلكم طيبين

وشكرا لكل اللي عيد علي

البوست ده رائع

وابراهيم ناقله

بس فعلا يستحق كلنا نقرأه

أرجو أن ينال إعجابكم زي ما أبهرني

http://7anany.blogspot.com/2009/09/blog-post_20.html

اتمتعوا بيه وعلقوا عليه عنده وانتم بتاكلوا كحك

فين العيدية؟

فين العيدية؟

سمعاكم بتقولوا إني كبرت؟

زعلاااااااااااااااااااااااااانة منكم ومقهورة

أنتم واللي في بالي

اللي لسه لا عيد علي ولا جاب الأُبيج

تفتكروا مطنش؟

لما أشوف

وسأوافيكم بالأخبار

أو ها تقرأوا الخبر في الأخبار والأهرام والجمهورية

كل سنة وأنتم بألف خير

وبلدنا مصر بعافية ومعافاه من رب العالمين

والعالم كله بخير وسلام وسلامة

تقبل الله منا ومنكم رمضان

وأعاده علينا سنوات وسنوات وسنوات

ياأحلى عيلة في الدنيا

بأعيد عليكم فردا فردا باسمه