الأربعاء، 28 يناير، 2009

ياجامعة الحب الصافي .. تسلم إيدين اللي وكسك


طالما بتقروا البوستات .. ومتابعين الحركات والسكنات والوقفات .. تبقوا مؤكد عرفتوا اني كنت في إعارة بلاد واق الواق

قبل ما أسافر اكرمكم الله كان حال الأخلاق في الجامعة نيلة وكنت معتقدة إعتقادا جازما إني دي أقصى نيلة توصل لها الجامعة

لما رجعت عرفت أني كنت مغفل كبيييييييييييييير أدب سيس خر سيس وان الموضوع ملوش آخر



طبعا اللي قاعدين هنا ميحسوش الفرق لأن التغيير بالنوسبة ليهم تدريجي فوصلوا لحالة "هم بس لو يداروا نفسهم ورا حيطة يبقى كتر خيرهم"
لكن أنا من هذا المزنق بقول لكم إني زهلت وازبهللت وازبهليت ومش عارفة أبعبر لكم عن شعوري والتغير بتاعي "دراستيك ياساده – دراستيك اليفيشن"

ها تقولوا لي وهو انتي بلهاء يا ستيتة طول عمر الدنيا فيها الحلو والوحش؟ أقول لكم دي الدنيا .. لكن الجامعة غير ياسادة .. فيها الصيع من زمان آه لكن دلوقتي مبقاش فيها الصيع .. بقت كلها صيع مع وجود قلة مندسة منحرفة من الطيبين المتربين وهذه القلة يجب بترها من جدورها علشان التجانس والهارموني يبقى تمام ياولاد

دي مرحلة بالهمس خلصت من بدري قوي .. ودخلنا ولله الحمد في مرحلة باللمس ياعبعال

أيامنا كانت الصياعة هي الآتي ولد مسبل لبنت .. جريء شوية ماسك إيديها .. عاملها البيرثداي بتاعها في ظلال الزيزفون وعازم ميمي وتوتو وسوسو وحنكش وبوروق ومشمش وكله جاي بالدباديب والأرانيب والكلاب "اعاذكم الله" ومعاه تورتاية لزوم الرسم التمام

الصياعة الآن الواد حنكش واقف مع المزة .. تضربه باللوكامية في كتفه "يالهوي" هو أداها شلوت ياساده !!! أي والله ما ببالغ "يعني الفيزيكال كونتاكت مش واقف ع الحوب الرومانسيكي لأ ده الحب ولع في الدرة ياسوسو وبنضرب بعض والعملية لو حتى لا تتبع خشى ولا حيا طب تتبع الذوق العام .. فيه بنت تضرب ولد؟ وفيه واد يشوط بنت؟

الواد أبو بوكسر - ياخراشي في الجامعة ياناس فين الحرس؟ - بيولع سيجارة وبيصبح ع المزة "صبح صبح ياعم الحاج

في شارع الحب القديم اللي كان لينا زماااااااااااااااان عند فجر التاريخ حكم عليه .. دلوقتي فيه قبلات علنية يابشر وبالأحضان يابلدنا يافلة بالأحضان

زمان كان لما الواد تيجي عينه في عيني يزغد المزة ويقول لها تعالي نقصر ونمشي الولية الدكتوره دي شكلها شرانية

دلوقتي بيبرق لي آل إيه بيخوفني!!! وناقص يطلع لي مطوته اللي في جيبه "أبن فرنسا منه ليه"

زمان كانوا بيجيبوا حاجات يتفرجوا عليها وأكاد أجزم انها ثقافية بس مش متأكده وكانوا يبقوا صبيان على جنب وشكلهم مفضوح

دلوقتي لاب توبك في ايدك .. موقعك منزله .. بطاريتك مشحونة .. مظبط الشباب والبنات كله على كله يامعلم

محدش من الحرس بيقول لعيل من دول أمشي على أمك ياض .. خسئتي ياستيتة .. أصل مجموعة الصيع دول هم المطلوبين دوليا في جيل المستقبل اللي ها يربط العلكات الدولية باللبانه وها يعمك الديموكراتية بالجروف بتاع البحر وسلم لي على التروماي

وطالما بنوصف الوصف التفصيلي للكباريه يؤسفني ويسعدني أن أصف ملابس الفتيات في الديفيلية "اللي الله يرحمه مش عارفة ابن جزمة مين كان مسميه الحرم الجامعي " .. سوري اسفة بردون

الحقيقة ياقوم البنات دول صعبانين عليا بجد .. اللبس سواء كان يغطي أو لا يغطي خالي من أي ذوق لوني أو قياسي مما يعني أن حتى الذوق بينتحر يابشر .. وخد غطس ومأبش

بنات صريحة مع نفسها ملط زلط وفل وشعر وميكاب وروش روش طحن .. وبحبك ياأداب وسياسة وتجارة .. عاملين زي أبو الفصاد والشباب وراهم يقبلوا الأرض اللي الطواويس ماشين عليها .. ويارب أنجح وأعرف أكلم المزة دي .. وهم بيستخاروا ويختاروا الشباب الهاي كلاس .. بيئة نو .. شعبي اقطعك

بنات متغطية بتصارع صراعات داخلية .. الجينز تحت أو أسترتش "أي وكتاب الله المجيد استرتش" والبادي فوق والألوان عااااار وشناااااااار "يعين امك يافرستشي" وبعدين ألوان حارة ابو بطاطا تغطي الوجه كاملا وأهم جزء في اللبس الطرحة أم ترتر ومتنساش الطرحة وحذاري ثم حذاري تنسى الترتر وسلم لي على السكس فلح جبردين .. ودول بيجروا ورا الشباب ويتمنوا أي بوبي يعبرهم وماشية بتعرج زي البطة لعل وعسى أعيش أفلام ماجده في المراهقات .. لا هي ماجدة ولا عائشة الكيلاني ولا حصلت ملك الجمل

بنات قلة قليلة مندسة ينبغي القضاء عليهم قضاءا مبرما "بالدي دي تي" علشان دول مش متناسقين مع البلاوي اللي فاتت وزي ما قلنا نادرين "يظهروا فقط في أوقات النووات البحرية وهن كائنات منقرضة حلازونية" .. ودول لبس شيك جدا بحجاب أو بدون .. بس حاجة راقية قوي ولبس جامعة فعلا وناس جاية تتعلم وفيه أب وأم في الشقة بيربوا دماغ صح .. وميكاب خفيف وعسل أو بدون .. لايق عليها لبسها فله ياروحي .. وفعلا من حقها تمشي ملكاً .. عاملين زي ملكات النحل نادرين وضرورين .. ودول السادة الشباب بيكلموهم بكل احترام ومحدش نفوخه بيوزه خالص يعمل أي حركة فتونه معاهم .. مينفعش اصلهم نفوووووووووووخ وطالع له جسم .. شخصيييييييييييييييية وطالع لها بنت

بنات تانية منتقبات .. ودول كافين خيرهم شرهم على الأعم الأغلب
في أيامنا الماضية قوي قوي كنا كلنا بنحبهم وحتى لو إحنا مش زيهم منحبش نخسر صداقتهم أبدا .. كانوا بالنسبة لينا أما حالة فريده عاوزين نقرب منها من باب الفضول والدراسة العلمية بتاعت تجربة مشاهدة استنتاج .. وأما لأنهم بيتشبهوا بأمهات المؤمنين فالبنات بتعس على أخلاقياتهم وتعاملهم حبا في الشكل الأسلامي اللي ارتضوه لأنفسهم بردا وحرا .. وبعض البنات تنوي نهج نهجهم فبتحب صحبتهم
النهارده فيه منهم زي بتوع زمان وفيه منهم - أقسم بالله - لابسة اسدال ونقاب واللي لابسة إسدال حاطة ايشارب بترتر يابشر فوقه .. والأعجب هذا الأسدال اللي عامل زي الستاير الدرابيه مرفوع بشرايط من تحت علشان يبين البنطلون .. لو حد نط في كرشي ها انط في كرشه .. وحطالي إيدها في إيد شاب!!! تقولوا لي أخوها عمها خالها جوزها طظ .. هي أرتضت شكل معين ليه أحترام في عقولنا وغير مسموح ليها بالمساس بهذا الشكل "شكل امهات المسلمين" .. مينفعش تتمشي لي الهوينا في جناين الجامعة ياقطة وانتي مأنججة ..
ممكن حد يقول لي ياستيتة ياسطحية أنا لا أحكم على الناس من شكلها!!! اقول له كذبت .. أول شيء بتتعامل معاه شكل البني آدم اللي أدامك .. ثم بعدها لو سيادتك مش سطحي ها تتعرف على الشخصية .. بس أشك جدا إن شخصية سوية يصاحبها خزعبلات مظهرية والعكس بالعكس .. انا لا أتكلم عن غنى أو فقر .. نو ابسلوتلي .. أنا أتكلم عن ذوق وهندام ومظهر وتصرفات بعضها مناسب وأغلبها مناسب برضه للحفلة الصباحية اللي كل يوم بشوفها

اطلع من البوست الهباب ده بإيه
انتحار عام في الذوق لبسا وتعاملا وموضوعا
اندحار خلقي وصلنا لأسفل سافلين
ضياع عام ومحدش فعلا عارف يحدد هو مين علشان يمشي في سكة عدل بدل شغل الزجزاج ده
ستيته اتجننت يارجالة حد يجي يوديها السرايا الشيك اللي في العباسية

هناك 49 تعليقًا:

عاشقه وغلبانه يقول...

ممكن حد يقول لي ياستيتة ياسطحية أنا لا أحكم على الناس من شكلها!!! اقول له كذبت .. أول شيء بتتعامل معاه شكل البني آدم اللي أدامك .. ثم بعدها لو سيادتك مش سطحي ها تتعرف على الشخصية .. بس أشك جدا إن شخصية سوية يصاحبها خزعبلات مظهرية والعكس بالعكس
_____________________________________________
انتي كده جبتي اخرها

الجامعه بقي ولا الكباريه في عز الضهر
واغلب البنات اسفه في اللفظ بقت رقاصه في ميدان عام
والمصيبه ان لا شكل وشخصيه ولا دين ولا دراسه
اومال فالحه في ايه البعيده يوعدهم بقطر
استغفر الله
اما بقي شباب النايتي اللي خساره يشيل بطاقه فيها لفظ ذكر فربنا يعوض علينا في رجلتنا
واللي تخلف عيل وتغرف انه هايطلع كده انصحها تخنقه يوم ماتولده

Che يقول...

ايه يا عمتى الحمله اللى انتى بتقوديها دى ... خلى بالك لحسن حد من الطلبه يقرا الكلام ده و بعدين يزعل منك .... انا ماعرفش انتى كنتى فى الجامعه ايام حادثه البنت بتاعت تجاره اللى العسكرى كان شاددها على مكتب قائد الحرس و بنطلونها نازل عشان تكون فى حاله تلبس عشان ماعرفش يمسك الواد اللى كان معاها ... و لا الرحلات اللى كانت بتتعمل تبع القسم بتاعنا و اخص بالذكر منها رحله للاقصر و اسوان الشباب و البنات كانوا بتبادلوا الموبيلات اللى عليها افلام سيكو سيكو و كانوا جايبين معاهم جهاز كمبيوتر ( مش لاب توب عشان فقريين ) و كانوا حاطينه فى اوده و عاملين ورديات للولاد و ورديات للبنات عشان يتفرجوا على الافلام السيكو سيكو و كانوا مقرطسين الدكاترة و المعيدين اللى طالعين معاهم ... و لا البنت اللى كانت معانا و كانت غاويه تبوس الواد بتاعها اللى كان فى قسم حيوان ورا الشجر اللى عند الملحق بتاعنا و كانوا صحابها بيعملوا دوريات مراقبه عشان ما تتقفش هى و الواد ... ولا ايه و ايه و ايه
يالا ... ربنا حليم ستار و دع الخلق للخالق

ستيته حسب الله الحمش يقول...

عاشقة حبيبتي
انتي قافلة التعليقات ليه
على العموم انا دعيت ليكي من صماصيم قلبي يرجع ليكي الحب واشوفك كده عاشقة ومفترية
عاجبني قوي تعبير النايتي نايتي بتاعك ده
وهي ياعمري ها تعرف منين وهو في اللفة انه هايكون كده؟ ربنا يصلح حالنا جميعا
تحياتي ودعواتي ياقمر حزين ونفسي اشوفه وش بيضحك

ستيته حسب الله الحمش يقول...

يعني انت بعد الجرص دي كلها دع الخلق للخالق ههههههههههههههه عثل يا واد ياعمرو عثل
بالنسبة للبنت بتاعة تجارة انت مازلت تذكرها وده ليه؟ لأنها حالة مبتحصلش كل يوم وانا اقريت ان فعلا ان كان فيه صياعة لكنها مكنتش حالة عامة
معرفش الست بتاعة حب قسم حيوان وبرضه أقول مؤكد دي كانت في نهاية عهدك الجامعي الطويل ومع بداية عصر انحدار الأخلاق ربنا يسترنا ويستر ذريتنا ويلطف بينا كلنا
اهلا عمرو باشا

Che يقول...

فعلا يا عمتى الناس دى كلها كانت فى سنه رابعه اول و رابعه تانى ... و قال ايه كانوا مطلعيين علينا فى القسم انا و صحابى اننا صيع بس بعد ماعرفت عنهم مصايب و بلاوى دعيت لابويا و اترحمت عليه انه طلعنى متربى و محترم
يمكن فى يوم احكيلك على الناس دى ... عن سمر كوينز و ياسمين kiss me و اللسته لسه طويله عندى
ربنا يرحمنا و يلطف بينا يا عمه

عاشقه الرومانسيه يقول...

الله انا ما عارفه اقولك ايه
دائما باضحك من تعبيراتك اللى مش عارفه بتجبيها منين دى

بس والله كل كلمه قرتها لك لحد دلوقتى عندك حق فيها

فعلا ياستيته ياحبيبتى
احوال البنات بقى صعب الحقيقه انهم بيعيشوا ماساه حقيقيه
الجيبات فى النازل والبديهات فى الطالع
كان الله فى عونهم


تحياتى ياام قلم زى السيف

ستيته حسب الله الحمش يقول...

عمرو يابني يا مدرسة لعب وفن وهندسة
انت حكاويك دي لازم نجمعها في الكتاب الشهير يوميات برجل 180 درجة وها اطبعها على حسابي
انا ياعم مش عاوزة اعرف حاجة عن الجزم دي ربنا بس يستر بناتي وبنات المسلمين اجمعين
انت يابن اخويا دايما منورني

ستيته حسب الله الحمش يقول...

دودو يا اوختي
عجبني تعبيرك جيبات نازلة وبلوزات طالعة استر ياللي بتستر
يا اوختي البت منوشة جات لي امبارح وشاورت على ممثلة من بتوع البادي ستومك وقالت لي يا ماما عاوزة البس طقم واحد كده؟؟؟؟؟؟؟؟؟؟؟؟؟؟؟
انتي يابت ايه اللي جاب في نوفوخك انك يامسكينة تعرفي تلبسي كده؟
قالت مش انتم الاتنين عقلية علمية معملية مجربة انا كمان عاوزة اجرب
قلت لها على رأي فيلم اللي بالي بالك ده عند امه هناك
شاكرين مرورك ياعثل

حاسوباتيه يقول...

ياي ياي انتي متشدده كده ليه بس ليه الخنقه بتاعت زمان دي ده انتي موضه قديمه سوري يعني فيها ايه يعني لما يحضنوا بعض في الجامعه ولما تلبس ملزق شويتين لا لا انتي متشدده خالص بجد خليكي كووول وفري كده
هههههههههه
بوست رائع بجد وفعلا عارفه المستوى الاخلاقي كل مادى بينحدر وانحداؤ سريع جدا بشكل غريب ربنا يستر انا بس مش عارفه فين عمو ابو الموزه الي منزل الموزه كده او فين اخوها او اي حد حتى ربنا يهدي

ريكو يقول...

ههههههههههههه
واللة مش عارفة اقولك اية!!!
يللا ربنا يهديهم
تقبلى زيارتى
تحياتى

أميرة الجنة يقول...

السلام عليكم
ما شاء الله ع البوست يا استاذة بجد بقت حاجة الواحد بيشمئز منها
ربنا يهدينا ويهديهم
تقبلى مرورى على مدونتك الرائعة

ستيته حسب الله الحمش يقول...

حاسوبتية عندي يا مرحبا يامرحبا
آه بيني وبينك كنت فاكرة نفسي فري كده وكول
فطيت نطيت لقيت نفسي دقة قديمة ودي موديه
يالا امري لله
بنت لابسة استرتش اسود "شراب موش زعطلون" وفوقة بلوزة مني جيب ثم ايشارب
كنت افطس افطس واصورها علشان ابقى جايبة دوكيومنت بس تصدقي انا اتكسفت اصورها
المهم يا اوختي البنت ماشية ورغم انها مش جميلة امة لا اله الا الله وراها مظاهرة من "عاوزين من ده عاوزين من ده" والمصيبة انها ماشية قرفانه وفي نص هدومها .. طب خرجتي ليه كده ياولية
على رأيك فين ببا فين مما وفين البرازر؟
متحرميناش منك وخليني اضحك كده على طول

ستيته حسب الله الحمش يقول...

ريكو هانم اللي من الزمن اللي فات
اهلا بزيارتك وربنا يخلي ياسر ويارا
تحياتي

ستيته حسب الله الحمش يقول...

اميرة الجنة اللي ناوية ترجعلها
اهلا بزيارتك منواراني
امين وربنا يسترنا فوق الارض وتحت الارض ويوم العرض عليه
اهلا ياقمر

خمسة فضفضة يقول...

السلام عليكم ورحمة الله وبركاته

الانحدار الاخلاقي في الجامعه ما هو الا انعكاس لصورة الانحدار الاخلاقي الموجوده في كل حته في البلد ، وغياب الرقابه في البيت اللي الاب والام فيه ماعدوش فاضيين لولادهم وملهيين يا عيني في الجري ورا لقمة العيش

بس الله يكون في عونك عشان بتشوفي الحاجات دي يوميا ما بتقدريش تعملي حاجه تمنعيهم بيها

دا انا لو مكانك كان جرالي حاجه بعد كام يوم

ربنا يهديهم ويهدينا ويهدي الجميع


سلام يا قمر

Lady E يقول...

فعلا ده اللي بيحصل الالوان الفاقعه والحجاب اللي بترتر بقى موضة الصبح
انا مرة كنت قاعدة في المدرج وفي بنت زميلتي قاعدة في البنش اللي قدامي ولابسه حجاب بترتر والشمس منعكسه عليه لدرجة اني حسيت اني احوليت واتعميت وبعد عذاب قولت للبنت دي لو سمحتي حاولي تغيري مكانك انا اتعميت بس طبعا بهزار

وكمان اول لما دخلت الكلية كنت متنحة للي بيحصل اللبس الغريب يعني مثلا واحدة محجبة من فوق ورجليها باينة طب ازاي وانا كلمتها وقولتلها يا تلبسي عادي يا تتحجبي قالتلي ده استايل بتجمع بين الاتنين انها تبقى بالحجاب ومن غير الحجاب ده غير الاسدال اللي كتير من البنات لبسوه ومنهم شخصيات مينفعش ليها اسدال خالص وكان ردهم كلهم موضة
والميك اب ههههه مرة نازلة من المدرج لقيت عروسة في وشي انا قلت اكيد البنت دي فرحها بالليل من كتر الاوفر ميكب اللي كانت عملاه بالنهار واستغربت في فرحها هتعمل زيادة عن الميك اب ده ايه

اما عن علاقة الولاد بالبنات فحدث ولا حرج وتلاقي الواد من دول تافه وفاشل وسوري يعني معفن ومع ذلك عامل فيها جون ترافولتا
احسن حاجة ان من يوم مدخلت الجامعة ومعرفش اسامي الولاد اللي في دفعتنا اصلا

Tamer Diab يقول...

أيه الرجعية الي انتي فيها دي
مش عيب عليكي تبقي متحضرة وفي القرن الواحد والعشرين وتقولي كده
بس أحب أصلح معلومة أحنا مش في القرن الواحد أحنا دلوقتي
في القرنين
وسوري في التعبير بس ده بجد
الشباب والبنات الي بتقولي عليهم هما المطلوبين بتوع حشش هيس تبقي كويس
والبس الجاكيتة وأنجج الحتة
والبنات الي بتقعد تقولي علي الشب في وشه ايه يلا ده انت مز اوي كده ليه ووالله العظيم اتقالتلي في وشي من بنات في ثانوييييييييييييييييي
يا لهوي يا جدعان انا رغم اني بتحرج بس متحرجتش من دي
لا دنا عشت عليها دور رئيس المباحث وادتها وش خلتها جريت في الشارع هي وشوية الفنلات الي كانت ماشية معاهم
من الآخر متحرقيش دمك خالص ولا تتعصبي ولا تتشلي ولا يجيلك اي مرض مزمن
هي دي النوعية المطلوبة
لكن اي حد هيحترم نفسه ويتكلم في السياسة
هيطلع تراباتيت اهلة كلهم ونعتقله ونسحلة ونكهربة ونعلقة ونسفلته وممكن نعدي علي رقبته وابور ظلط عشان نخلص من الدماغ المعفنة دي
حسبي الله ونعم الوكيل
وللمتبرعين ورجال الأعمال أصحاب القلوب الرحيمة التبرع بكرسي بعجل لصاحب التعليق

ستيته حسب الله الحمش يقول...

فضفضة هانم
ماهو انا جالي جنان ياقمر ورايحة بعثة للعباسية اهو استجم حتى يرفع الله هذا البلاء عنا

خايفة اخرج من السرايا ألاقي سراير في جناين الجامعة!!!
تحياتي ياقمر

ستيته حسب الله الحمش يقول...

ومعنى من الجامعة ليدي
وهي جامعية فريش بتكمل حكاوي البلاوي بتاعة ستيتة
انتي بقى شاهد عيان وربنا يعين اللي مضطر يتعامل مع النوافيخ البقري دي
اهلا ليدي هانم

ستيته حسب الله الحمش يقول...

تامر باشا
الشباب والبنات الي بتقولي عليهم هما المطلوبين بتوع حشش هيس تبقي كويس
والبس الجاكيتة وأنجج الحتة
يامثقفني يامهنيني
انت وعمرو قاموسي الحديث
بس الاهي يسترك ويفك اسر اللي في بالي يعني ايه فلانه؟ معلش اعذر جهل ستيتة القرون الوسطى
تحياتي ودايما ثقفني وعلي قاموسي

mony يقول...

ايده ايده

انا ماشفتش الحاجات ديه
عايزة اشوف طيب


انا متخرجة من 4 سنين و ماشفتش الحاجات ديه
يمكن علشان طول اليوم في المحاضرات و لما تخلص اروح علي بيتنا عدل ولا ايه


طيب في اعادة ممكن اشوف فيهاولا اتصرف ازاي دلؤتي

Eng. Ahmed Abo El-Ella يقول...

تاني ياستيته؟
تاني؟ مش ممكن
قلنا قبل كده ديه حريه ولغة العصر ولو مش بتعرفي لغة العصر يبقى متتكلميش مع أهل العصر

الله يخرب بيت ده... ولا بلاش عشان حرام

بصي ياستيته
انت حالتك صعبه قوي
متكليش سمك ولا بيض ومتفتحيش التليفزيون لمدة شهر
ولو لازم تنزلي من بيتكم يبقى كفايه مره واحده بس في الاسبوع
ودربي نفسك على البلاده واللا مبالاه
ولو استمريتي على الحال ده هترتاحي وهتغيري كلامك وممكن بكره نشوفك راكبه العربيه التمام ومشغله دي جي على اغنية بعرور

بلا زوق عالي بلا فن راقي بلا ادب وكلام فاضي
حلو الكوبليه الأخير ده؟

ستيته حسب الله الحمش يقول...

انتي ياست ام عبد الله
متخرجة من اربع سنين ومشفتيش ازاي؟ متخبطيش وانتي ماشية لا بيكي ولا عليكي في احد هاذوه الكوارث .. هذا امر لو تعلمون عظيم
طيب بصي قعدي الباشا بالعيال واعزمك على كوباية شاي نشربها على رصيف جونينة الجامعة واشوف بقى ها تسجلي كام حالة جديدة انا مذكرتهاش لمدونتك
وبدل ما اتكلمتي على جنينة الحيوانات اوريكي انا عجائب جنينة البشر
صباح الفل

ستيته حسب الله الحمش يقول...

عم الأنجنير
سوري بردون اصلي جاية من بقى عصر الاعدادية القديمة
ها أحاول امشي ع الروشته بتاعتك واسيب العقلية الستيتية التعسفية المتعفنة
ويمكن البس بدي ستومك وبنطلون اسكرتش وأحط اخضر كرنبي فوق عينيا وابقى كول كول كول محصلتش
لو لم تصدر مدونتي تاني أعرف أن حسبو أو أبنه عفركوش تاووني في الدرة
حلو السجع اللي جه معاك من الفرسة ده
تحياتي

biberss222 يقول...
أزال المؤلف هذا التعليق.
biberss222 يقول...

انا معلش نفسي اعرف يعنى شعور اى اب او اى ام و هيا شايفه بنتها خارجه كده من بيتهم !!!!!!!
صحيح نفسي اعرف؟؟؟؟؟؟
مفيش دم ولا مفيش احساس و لا مفيش اهل
ماهو مش معقول معظم الطلبه من غير رقابه من البيت؟؟؟
ايه السبب يعنى فى الانحراف ده
يظهر ان نظريتك ف ان صنف الحمش بينقرض صحيحه ......بس لسه المنطقه عندنا مانضربتش

ستيته حسب الله الحمش يقول...

بيبرس يعلن يارجالة حلوان منضربتش
شوف انا نظريتي بتقول أن الراجل علشان يشوف اهل بيته كده وميعلقش فهو مؤكد فقد بقايا هذا الشيء المسمى رجولة
الست بقى يابيبرس في الغالب هي سبب الوكسة دي اسالني ليه؟
من غير ما تسأل أقول لك
فيه ثلاث اصناف من النساء
الاول اهلهم كانوا جايبين ليهم كبت بشكل أو بآخر فهي بتنفس بصياعة البت عن رغبات مكبوتة
التاني ستات فاضية من جوا قوي وشايفة ان البت لما تبقى كده ها تتنيل تتجوز
التالت هو النوع الطبيعي السليم نفسيا ودينيا اللي بيحاول يفهم العيال الصح ويسيبهم ياخدوا القرار بس لحد حدود والعيال بتبقى عارفه انها مش ها تتجاوز منطقة حمراء

بس ده لا يمنع وجود بيوت لسه فيها أبهات عدلة بتناقش وبتفهم وبتقنع ولعلمك تأثير الأب على بنته عشر اضعاف الأم لأن البنت حبيبة ابوها بس زي ما قلت في بوست شنكلح دول بقوا مخلوقات بنفسجية لزجة نادرة من العصر الجليدي

اهلا ياباشا

MRS WRITER يقول...

أهلا بالأستاذة ومواضيع الأستاذة الممتعة والمفيدة

سبحان الله انا من شوية رديت على حاسوباتية متكلمة في موضوع قريب من موضوعك

كلامك شامل للموضوع من كل جوانبة

واسمحيلي أضيف نقطة بعتبرها مهمة جدا وهي

مصر مازالت محتلة ولكن عن طريق الميديا والمخدرات

الهدف القضاء على جيل جديد في المستقبل للدفاع عن بلده ودينه وعرضه

وطبعا إذا الأخلاقيات انعدمت وتحول الناس إلى مخلوقات لا مبالية ودي حقيقة علمية لأن الحشيش مثلا بيخللي كل حاجه عند متعاطيه ماتفرقش

اللامبالاة بتكون هي العنوان الرئيسي للشاب

وللأسف فيه بنات كمان بتتعاكي مخدرات

لابد أن تتحرر بلدنا من الإحتلال الجاثم على عقول أبنائها بالإعلام المفتوح على كل الثقافات الفاسدة ومن المخدرات

ووقتها هنقول إن التحرير لمصر صار كامل متكامل

خالص مودتي

و..تــحــيــاتــي

hasona يقول...

حب صافي - حب مكرر - حب نقي

بنوتة يقول...

السلام عليكم
طبعا مفيش اضافة تانى تتقال بس كنت عايزة اوضح نقطة البنات ايللي جزء كبير منهم معندوش اخلاق على فكرة البنات دول كان معايا زيهم فى المدرسة اغلبهم حالته المادية صعبة وده عمره ماكان عيب لبسه الاسدال عشان ميشتروش لبس والولاد يقولوا عليهم محترمين فيكلموهم باحترام ومنهم لما سألتها لبستيه ليه قالتلى موضة

حروف يقول...

30 تعليق
كدة مش حينفع خالتو بعدكدة التعليق الاول حجز ليا انا وبس
انا راجعة لسه من الكليه حقرا واتغدا وارجع اعلق

Tamer Diab يقول...

فلانه ؟!
بس أنا مقلتش فلانه خالص في الكومنت بتاعي !
علي العموم ممكن اقلك من القاموس الشخصي فلانه او فلان
فلان يعني مكان اي ذكر كفور اكزمبل
وفلانه يعني مكان اي أنثي كفور اكزمبل برضه

ستيته حسب الله الحمش يقول...

مصرية العزيزة
الميديا قصة كبيرة قوي
بس ياحبيبتي حكاية اننا نتحرر منها دي مبقتش بايد بلد ابدا
لأن الاقمار الصناعية كده كده ها تطب عليكي بما غذى ولذى
دي حاجات كل واحد لازم يقف امامها بنفسه واللي بتعلميه لولادك النهارده تلقيه غدا
تحياتي وقلقت عليكي قلت مصرية مفتحتش المخل النهارده ياخبيبي

ستيته حسب الله الحمش يقول...

حسونة
تعليق غريب - تعليق عجيب - ذكائي محدود
اهلا

ستيته حسب الله الحمش يقول...

بنوتة هانم
وجودك دائما بينعنش المدونة
كان معايا برضه زيهم وفيه زيهم في كل جيل
يعني في ستات في اول التمانينات لبست ايشارب علشان شعرها اكرت ومش عاوزة تروح للكوافير اللي كان مقرر على الموظفات
في كل زمان فيه نوايا صالحة ونوايا طالحة وأول حديث في البخاري هو حديث عمر بن الخطاب اللي رواه عن الرسول صلى الله عليه وسلم واللي يلخص دينا كله "انما الاعمال بالنيات
اهلا ياقمر اربعتاشر

ستيته حسب الله الحمش يقول...

حروف
عملتي ايه يا بنوتة مش قلتي لي اخر امتحان الاحد؟
شغلتيني عليكي
انا مستنياكي طبعا بس عليكي غرامات تأخير على ما تدفعيها مش ها يفضل معاكي فلوس تجهزي ياقمر
بحبك قوي بوسة

ستيته حسب الله الحمش يقول...

يعني ياتامر قول انت عمتي ستيته جاهلة واطلع فوق دور
سوري انت قلت فنلات ودي كلمة جديدة علي بصفتي قديم قدم مصباح علاء الدين
انت بقى بذكاءك قول الولية ستيتة تقصد ايه؟ وجاوبني بدل ما توبخني على جهلي الثقافي وجهلي الكتابي
مستنية اعرف يعني ايه فنلات دي

غير معرف يقول...

شوشو ام روحين (توشيبا)
شوفى يا ستوتى وانتى عارفه ان انا اشجع الحريه واحب الملوخيه ولكن
المشكله الحقيقيه مش فين الأب وفين الأم اللى سايباها تنزل كده لأن ببساطه فى بنات كتير بتنزل من بيوتها ملايكه والجناحات مفروده وتروح عند صاحبتها تلم الجناحات وتنزل زى ما هى عايزه
يبقى اللى لازم نتكلم فيه الضمير اللى لازم يتنمى عند الشباب منذ الطفوله
طب المشكله فين
انتى ذكرتيها فى القصه بس معلمتش مع الناس
ان مافيش ذوق لبس بعد الضهر بتراح بيه مشاوير الصبح
لبس السهرات بتراح بيه الجامعه
محدش عارف ايه بيتلبس فين امتى ومع مين
لأنك ذكرتى وجود قله قليله يجب إستئصالها من البنات اللى عارفه انها رايحه جامعه و بتلبس على هذا الأساس
و لأن الشباب البيكى بيكى اللى بيروح ويجى فى بلدنا كتير حتى الشركات المحترمه تفاديا للى انتى بتحكى عليه ده بتعمل دريس كود
ممنوع القصير والمكياج التقيل والترتر والضيق والرجاله بدل فقط
اما مشاهد الحب والغرام بما انى خريجة تجاره فشوفت ما يكون عندى مناعه من اللى انتى بتحكيه
ومش عايزه احكى لك
لأن واضح انك معبيه بدل ماتروحى تقتلى حد من الطلبه
وحشتينى

MaNoOoSh يقول...

طب والله انا متخرجة من سنتين ونص وكان اخرى اشوف الواد بيلعب فى شعر البت او يقيس كمية الدهون فى دراعها (من الاخر يفعص فية)..
لكن الوقتى بوووووس للرقب مش للركب.. اة والله بوس فى الايدين والرقابيب وقريبا فى حتت تانية لا داعى لذكرها.
بس موضوع اللبس دة على مستوى نظرى أيام ماكان عندى نظر كان فزيييييييييييييع فزيييييييييع.. يعنى كنتى تحسى كدة انك قاعدة فى قسم البغباغانات فى حديقة الحيوان دة غير الشلة اللى نصها ولاد ونصها بنات وتلاقيهم كل كام يوم يبدلو بحيث البنت تبقى ارتبط بكل الولاد والولد يبقى ارتبط بكل البنات.. تفتكرى هى دى نظرية النسبية؟!
بس اللى يزعل بقى ان البنات الزبالة دى وانا اسفة انى بغلط فى الزبالة بالشكل دة.. البنات دى كانت بتخلى الكائنات المنقرضة الحلزونية تشك فى نفسها وتفضل تقول هو انا اللى غلط وللا هم..
وربنا يستر على كائناتنا المنقرضة الحلزونية من البنات والبنين.

ستيته حسب الله الحمش يقول...

شوشو حبيبتي
ياملكة ثقافة التجارة والكليات المجاورة
فعلا نسيت انا قصة تروح عند صاحبتها وتخلع وقبل ما تروح ترجع كل شيء الى قواعده
طبعا يافأندم انتي تجارة يعني كمية الصفائح المناعية عالية جوي جوي بس انا علوم يا اوختي مسكين غلبان آخر حاجة شفناها كانت واحد بيسبل طيب اعمل انا ايه دلوقتي ؟ احط لهم المسدس في الشاي
عملتي ايه في الانترفيو؟؟؟؟؟؟؟؟؟؟؟ظ

ستيته حسب الله الحمش يقول...

ياسيدة منوشة انا بستحي بستحي
رقابيب ايه بس ربنا يستر على ولايانا
جميل قوي ان كل بنات الشلة بيلفوا على ذكورها وده طبعا من باب التبادل الثقافي وانهم يتخرجوا من الكلية ومعاهم شهادة الخبرة اللي محتاجينها في الشغل
قطيعة يا اوختي محدش بياكلها بالساهل

انا مصدقاكي تماما ان البنات من فئة الحلزوني المنقرض لازم يكون عندهم شك في مبادئهم وكمان اكتئاب وهنا فعلا دور البيت لأن استمرار البنات دي على مبادئها صعب كالقابض على الجمر في هذا الزمان الزلنطحي
اهلا منوش

غير معرف يقول...

شوشو ام روحين (توشيبا)
انتى تستلفى حشرات من بتوع قسم الحشرات واتوصى بالحاجات اللى بتقرص
وفئران من بتوع قسم حيوان
وتعملى ايه
انتى تشوفى الواد والبت من دول مع بعض ترشى الحشرات والفئران مبيدات وترميهم فى هدومهوم وتسيبى الفيران تلعب فى عبهم
لو اتعرفت الحكايه دى فى الجامعه كل شاب وكل فتاء هيفكرو الف مره قبل مايقعدو مع بعض
اما بالنوسبه للأنترفيو
قمت الصبح بلا صوت وما زلت فقولت هروح للناس اشاور مستنيه لحد ما يطلع لى صوت
منه لله اللى شال السلم

موناليزا يقول...

اذيك ياجميلة
متهيألى ان السبب الرئيسى النشأة وعدم وجود من يوجه ويرشد
وفعلا المظهر بيترك انطباع لدى من يراه وخصوصا لاول مرة

ستيته حسب الله الحمش يقول...

راح صوتك
ليه؟ وفين مجهودات حمبوزو لاوي بوزو؟
بالنوسبه لفكرتك في تطفيش المزز سوف يتم دراستها بعين الاعتبار
سلامتك يا أموره إن شا الله العدويين
بحبك قوي

ستيته حسب الله الحمش يقول...

موناليزا
وحشتيني والحمد لله انك بخير
المظهر هو الصفحة الرئيسية لجريدة الشخصية تحت اي بند لا تستطيعي اهماله في التعرف على ملامح شخصية اي انسان
متغيبيش علي بحب اطمن عليكي
مودتي

مصــــري يقول...

خالتي ستيتة

عارفة أنا قعدت سنة في جامعة بني سويف وكان الأدب والاحترام هو اللي سائد.
وبعدين حولت لجامعة عين شمس واتصدمت صدمة كبيرة
من مد الأيد بالضرب لحد ...احم احم.

خشي علي اليوتيوب واكتبي حفلات جامعة عين شمس وشوفي المهازل الحفلات اللي اتصرف عليها أكثر من 400 ألف جنيه كان بجزء بسيط منهم يجيبوا محول احتياطي للكلية عندنا.
بدل ما الواحد بيبقي بيعمل التجربة والكهربا تقطع وتسمعي التعليق الأزلي
"ماشربتس من نيلها"

تحياتي
أسامة

ستيته حسب الله الحمش يقول...

عارفة تماما يااسامة انت بتحس بأيه
امبارح عمرو صاحب مدونة خمسة جد كان بيسأل ايه طموحك؟
اكتشفت ان الكلية دي قتلت في اي رغبة واي طموح
البحث العلمي ليه اهله وليه بلاده

هنا بلد هز الوسط يجيب ملايين وسيبك يابني من التعليم

تحياتي يامنورني

MRS WRITER يقول...

تسلمي يا ستيتة فعلا أنا بدخل لفترة بسيطه وماعنديش وقت لأني مشغولة مع الأولاد شوية

ربنا يخليكي ليا ومايحرمنيش من اهتمامك الجميل

بالنسبة للميديا أنا قصدت إن يكون فيه رقابة على برامجنا في المقام الأول

وبالنسبة للقنوات الأخرى كنت فاكره إن فيه طريقة لتشفيرها من قبل المسئولين لكن انتي خبطتيني بالخبر اليقين

وطبعا بالنسبة لبيوتنا طبيعي اننا بنشفر المحطات ونراقب ونربي أولادنا على القيم السليمة

لكن ماهو الخوف انهم يتفرجوا بره عند ناس مش مشفرين ومش مهتمين أصلا بالقيم دي

أنا عايشه على طول حالة يقظة وترقب لأولادي في تصرفاتهم من غير مايشعروا ومصاحباهم قوي وبيحكولي كل حاجه

لكن أنا برضه قلقانه عليهم وعلى باقي الأولاد

وبسأل نفسي ياترى كل الأهالي متيقظين لأولادهم ومصاحبينهم زي مانا عامله مع أولادي؟

وبكون من جوايا نفسي أنصحهم واخد بالي منهم علشان يتجنبوا الخطر بكل أشكاله

ربنا يستر عليهم جميعا

تــحــيــاتــي

Tamer Diab يقول...

ايه الاحراج الي أنا فيه ده
وشي أحمر كده ووداني وشكلي بقي عامل زي خرفان العيد من الأحراج
مـــــــــــــاشـي
فنلات دي غلطة مني هي المفروض فانلات يعني جمع فانلة
أو بلغة الفلح كله بقي
فنننه والكلمة دي بتشل امي لما بسمعها هي وكلمة تاني
منطلون
اسم امه بنطلون جابوا منين منطلون دي مش فاهم

بث يا ثتي