السبت، 25 أبريل، 2009

ما كان لله دام وأتصل .. وما كان لغير الله أنقطع وأنفصل


بيني وبين عدد من زميلاتي السعوديات حب في الله .. خالصا لوجه الله .. ولأنه في الله فربنا نزل محبتنا في قلوب بعض بلا أي غرض أو منفعة .. ولأنه في الله فبيفضل باقي حتى إنقضاء الأجل وبيكون مصحوب بدعوات جميلة منا لبعض بظهر الغيب

تركت السعودية وأجمل شيء لما موبيلي يرن برنة رسالة .. أجري عليه بشوق شديد وأنا عارفه إن واحده منهن بعته لي رسالة


شوفوا اللي حصل من يومين اتنين


رنة رسالة .. اسم صديقتي دكتورة نونا

افتح الرسالة

صدمة

"السلام عليكم .. بصراحة يا دكتورة ما أدري إيش أقول لكن يا دكتورة ستيتة صدقيني فيه يوم حنقف أنا وأنتِ أمام الله وحنتحاسب .. وحابة أقولك شي .. يعلم ربي إني عزمتك في بيتي وعملت حفلة على شرفك لأني "كنت" أحبك بصدق وإخلاص .. لكن كل اللي أقوله منك لله وحسبي الله ونعم الوكيل"


ازبهلال وغضب غير طبيعي ومش فاهمة حاجة وفيه بومبة انا خدتها رغم إني سايبة السعودية من عشر شهور وبسأل نفسي ممكن حد تصل بيه المواصيل إنه يخسرني أخت في الله وأنا على بعد خمسة آلاف كيلو متر ومفيش مصلحة ها أنفعه فيه أو أضره؟ طيب والهاطلة دي مش تفهمني بتشتمني ليه وهو انا كنت باسكت في السعودية لما أسكت هنا .. فشرتم كولاتكم


حاولت اتصل بنونا وهي عارفه ان رسالتها إهانة وأنا بشتم على طول ومرضيتش ترد


رسالة من ستيتة

"حسبي وحسبك الله .. أنا فرحانة باللي جاب سيرتي وخد ذنوبي .. ومسكين والله كثيرة جدا على ضهره الله يعينه .. ده أنا زفت وعبارة عن سفينة ذنوب متحركة .. حسبي الله في اللي قال واللي أهانني وصدق بلا بينة .. وكلام الستات عمره ما أثر فيا قبل النهارده بالدرجة دي"


رسالة من دكتورة نونا

"انا ما بعت لك المسج إلا علشان أفكرك إن مش كل الناس بوشين "طبعا انا مش فاهمة هو أنا اللي بوشين والا اللي اتكلم معاها ولا ذكائي أنا اللي هنج من الغضب؟" لأني وأنتي تعرفي كذا كويس عمري ما كنت أكره حد وأبين له أني بحبه .. وأنا حبيتك فوق ما تتصوري بل يمكن أكون قدستك .. لكن الصدمة أكبر مما أحتمل .. أنا أعرف قربك من فلانة "زميلة هناك" وإنها مستحيل تكذب عليك "بومبة حلوة يا جودعان" وانت عارفه قلتم لبعض إيه والله يسامح الجميع .. وكنت حابة تعرفي اد إيه إنت غلطانة بضنك في "أظنها تقصد ظنك" .. أنا كنت صادقة معاك في كل شيء وكل تصرف .. بس ده الي كنت عاوزاك تعرفيه وأولا وأخيرا الله يسامح الجميع


طيب اتصل بالمجنونة دي تاني لأنها ظلماني وها تروح في داهية ونكدت علي ولازمن أنكد عليها .. وبرضه أفهم أي شيء يا رجالة .. دي مش أخلاق أبدا أبدا .. مبتردش ومش ها ترد .. مش قلت لكم إنها عارفه ها أعمل إيه



رسالة من ستيتة وهي بتغلي بمعنى الكلمة

"مش عارفة اكتب من الغضب وانتي مش راضية تردي .. يبقى لقائنا صحبة أمام رب العالمين .. بس خدي بالك أنا شريرة ومش ها أسامح في حقي ولا بقصر في الجنة ولن أرضى إلا القصاص .. أنا دموعي غالية قوي ونادرة قوي وعيب جدا لما تزعليني وتدعي علي وتهينيني وترفضي تفهمي او تفهميني .. فلانة كاذبة وأنا حزينة وأنت براحتك خالص"

"الست فلانة كانت زعلانة جدا إنك معزمتيهاش .. ولأني أعرف أخوتكم مقلتش لها على العزومة لأن ده بيتك وأنتي حرة فيه .. وهي أعتبرت أني أهنتها بشكل ما .. بعتت لي رسالة قبل مغادرتي السعودية بيومين تشتمني .. هو أنتم فاكرين شتمتي ساهلة ولا ايه؟"

"ولأني ستيتة وكلي فخر طلبتها ومسحت بيها البلاط .. وبرضه لأني بنت أصل وبحبها صالحتها وفهمتها الموقف قبل ما أمشي .. وكل ما أرسل لها رسالة من مصر أحصل على رد عجيب مريض .. تفتكري رغم أني مغلطتش ليه بصالحها؟ .. وبرضه حسبي وحسبك الله"



القصة ياأخوننا أن واحدة عاملة عزومة تكريم لي وهي أحد قيادات الكلية .. عزمت ناس .. تفتكروا يعني أسألها عزمت مين ومعزمتش مين وده بيتها؟ لما صديقة عزيزة لي لقت نفسها متعزمتش زعلت .. وأنا إكراما لحبهم لبعض ما اتكلمتش معاها خالص عن العزومة علشان لا أوغر صدر اتنين مسلمين على بعض .. أنا بقى ذنبي إيه بالله عليكم


رسالتين متتاليتين من نونا وأنا قررت أني مردش لأني غضبانة

"على العموم والله العظيم انا ما أتأثرت إلا من كثر حبي ليكي ومن كثر ما أنا فرحانة بأخوتنا في الله .. فأعوذ بالله من الشيطان الرجيم .. وسامحيني وحقك علي .. وكل ابن آدم خطاء .. هي قالت لي كلام حصل في بيتي فإتجننت هي إزاي عرفت "وأنا مال أهلي" وعلشان كده جه في عقلي أنكم اصدقاء يبقى إنتي "ياصلاة النبي يا صلاة النبي".. سامحيني"

"شكلك كذا ما سامحتيني .. صدقيني لو كنت امبارح بوعيي ما كنت قلت اللي قلته .. كنت متضايقة جدا من كلام فلانة فمكنتش عارفة بعمل إيه .. فسامحيني يا حبيبتي وهاتي راسك ابوسه .. والله انتي غالية علي أوي بشكل ما تتخيليه"


طبعا بعت رسالة هزرت معاها وقلت أني مسامحة من قبل كل الرسائل بس مليش دعوة عاوزة قصر في الجنة


الشاهد من القصة حاجتين

اولا لسه فيه حب في الله ... والحب في الله روعة جميل يجنن بيخلي الإنسان فوق فوق .. وما كان لله دام واتصل رغم الكيد والحسد

ثانيا قبل ما تشتم حد لازمن تتأكد .. وما شتمك الا اللي سمعك بلسانه .. ما تتجرش وتقع في عِرض أخوك كده بالساهل .. وبعدين متشتمش حد إلا لو كان اللي بتشتمه غلبان .. لأنه لو أتمكن منك ساعتها كانت بقت فضايح

ثالثا بمناسبة ثانيا لما حد يجهل عليك خد نفس عميق وحاول تكبر حجم الجمجمة وتستوعب قبل ما تهب فيه لأنك ممكن تخسر إنسان جميل قوي متعرفش تعوضه في دنيا قل فيها الطيبين .. ودائما إدفع بالتي هي أحسن علشان تكسب ومتخسرش .. وأنا سعيدة جدا إنها مرديتش علي لأني معرفش كنت ها أهبب إيه "سلومة الأقرع ساعة الغضب ميعرفش أبوه"

رابعا ده بوست "أنتي إكتئاب" غلوشة على البوست اللي فات هع هع هع



هناك 78 تعليقًا:

MǿиY El-Shreef يقول...

اوووووووووووووووووووول تعلييييييييييييق

والله لاممكن معلش لازم احجز

MǿиY El-Shreef يقول...

الحمدلله :D

والله يا خالتو انا نفسي ابقى زيك لما اكبر يعني

انا بردوا بحب صحابي هنا اوي ووصلت بينا علاقه جميله جدا

هما اتخرجوا وخدوا تالته وف كليات دلوقتي وانا ف تالته ثانوي بعد ما أجلت تالته الي فاتت ولسه بنتكلم وبنبعت جوابات مع اخوات بعض :D

وبالنسبه للموقف ده اوحش حاجه بجد

لما تلاقي حد بيتهمك وانتي مش فاهمه في ايه ممكن الغضب يطرق ف دماغ اي حد ويقفش ف الي كلمه فعلا

الحمدلله ع ان العلاقه رجعت حلوة والميه ف مجاريها خلاص

بس خلاص

بعبك والله ياخالتي

مووووووواه

ساره يقول...

ستوت نزلتي البوست هذا امتى؟؟

لسه معلقه على الفات :)

يلا بروح اقراء وارجع :)

ساره يقول...

اللــــــــــــــه على البوست هذا
مافي اجمل من الحب فى الله

الحمدلله ان كل شئ تمام بينكم الحين
وهى غلطانه بس لو ماتحبك ما اندمت وطلبت اتصلحك .. الله يديم حبكم فى الله

احلى بوسه ل احلى ستيته :)

احساس طفلة محبة للرومانسية بس واقعية يقول...

اولا انتى مفيش حد يعرفك وميحبكيش فى الله
لانك شخصية ممتازة وماشية فى طريقة تفكيرك ومبادئك زى السيف
ثانيا العلاقات الانسانية ياما بيحصل فيها ودائما ما بين الظالم ومظلوم
وصعب تنتهى الا بالمواجهة بين الاطراف
او النقاش بشكل عام
خيرا فعلتى لما رديتى بحدة وبينتى غضبك لانك كنتى على حق والحمد لله ان صديقتك فهمت الموضوع

احبك فى الله يا احلى ستوتة
تقبلى مرورى

أحمـــــــــــــد أبو العلا يقول...

هوا ان شاء الله انتي ليكي قصر في الجنه (بكرم من ربنا)
واللي بيحاول يحشر دماغه بين اتنين, بيجي يوم القيامه وذنبه على كتفه يصرخ بين الناس ويفضحه

الجميل بأه ياستوته أن فعلا الحب في الله هوا اللي بيداوي سوء التفاهم ويمنع الظن

يعني لو حصل وحد فهم حد غلط, لو بينهم حب في الله حقيقي بيفهموا بعض ويرجعوا تاني لحبهم في الله
لكن لو الحب ده مش لله كده بيفضلوا شايلين من بعض واللي انكسر مبيتصلحش

اللهم ارزقنا الحب في الله

ستيته حسب الله الحمش يقول...

بنوتة انتي يا عسولة يا اللي اسمك موني
انتي بتذاكري امتى فهميني؟
ها تبقي ان شاء الله احسن مني بمراحل لأن وانا في سنك مكنتش عسل وسكر ومربى دايبة كده

وما تخافيش حتى لما ترجعي مصر اخوة الله دي دائمة زي ما قلت ومش بتنقطع ابدا بوتيتا

بحبك

ستيته حسب الله الحمش يقول...

سارة
قلت بقى اديكم شيء يخلي الدنيا بمبي بمبي بمبي

بس بصدق وحق ربنا ما شفت ستات بتخاف اذا خوفتيها بالله زي السعوديات

هنا ممكن ناس تخاف وناس تكابر
لكن هناك بس تقولي قفي لله او انتي ظالمة
تلاقي الست بتلف حوالين نفسها وفعلا خايفة
يمكن علشان كل اللي انا عرفتهم وحبيتهم ولاد اصل جدا ونظنهم متدينين جدا مهما كان فيهم من عيوب
ومين خالي من العيوب؟

انا كمان امووووووووووت عليك
الله يحيي سارة حبي

إبن مصر يقول...

السلام عليكم

الحمد لله انك وهى فهمتوا الوضع ومفيش حاجه خلاص انتوا اخوات
ولولا انكوا فعلا بتحبوا بعض ما كنتوا عاتبتوا بعض والعتاف فى النهايه جاب نتيجه انكوا رجعتزا لحبكوا فى الله اللى هيكون سبب لللحمايه فى ظل عرش الرحمان فأنتم بهذا الحب من السبعه الذين يظلوا بظل عرش الرحمن يوم القيامه

اللهم ارزقنا الظل يوم القيامه
آميـــــن

ستيته حسب الله الحمش يقول...

نونو الرومانسية
ده من ذوقك يافندم وحسن ظنك بس انا حقيقي واقسم بالله بلا مبالغة زفت
والكلام ده قلته لأخ لينا في الله مدون امبارح
قلت له اوعى تحطني في حته منفعش اتحط فيها

انا ستيتة هيء وميء وشخاليل آخر حاجة

بس يمكن علشان كبيرة في السن فما تربيت عليه واصبح يقيني لا ابدله ابدا

وانا اعترفت اني كان ممكن اخسرها بغبائي بس ربنا سلم

ممممممممممممممممممممؤ

MǿиY El-Shreef يقول...

احنا ف اجااااااااازه الربييييع

وش مطلع لساااانه :p

فتافيت يقول...

سوتايته

جيت اقولك وحشاااااااااااني موت

الفترة اللي فاتت كانت مكعبلة .. ولما انزل البوست بتعها هاتعرفي كل حاجة

بس والله وحشاااااااااني جدا

انتى اول حد ادخله من ساعات ما لبست طقية الاخفة

وحشااااااااااااااااااااااااااااني

ستيته حسب الله الحمش يقول...

ابو العيليه
يا عم ربنا يخلي الأجازات اللي خلتني اشوفك بسرعه كده
اللهم ارزقنا أنتخة من وقت للتاني على رأي تامر علي

مؤكد انت بتشوف في الشغل بدع من صنف أبو وقيعة المفتخر
اللي بيزعل بس لو حد يذكرك بخير في غيابك

يعني انا سايبة الناس من سنة
ايه اللي يجيب سيرتي بالله عليك
القلوب دي فعلا اسرار ربانية عالية

ومن كام يوم ايام بوست فجنون دخل علي واحد غير معرف قال كلام بجد يخض ويعترض كومبليتلي على ان فيه حب في الله ع الورق

اهدي لهذا الأنسان البوست ده
ياعم الغير معرف حتى لو اللي حصل ده كان حصل مع راجل من زمايلي كنت ها اصالحه برضيك
لأن فيه حب في الله بلا اغراض او نزعات أو بتنجانات مقلية

منور يا ابو العيليه والله

ستيته حسب الله الحمش يقول...

ابن مصر
وعليكم السلام يا فندم ورحمة الله وبركاته
زي ما قلت في عنوان البوست
ما كان لله دام واتصل
بس اللي ساعات يجعلك تهرش نفوخك
ليه ممكن حد يكره ان اتنين يحبوا بعض لو ده مش ها يضره في شيء
بالعكس ده انت سترت على كلامه معاك ومشيت وانت صاحبه ومخسرتوش الصاحب التالت يبقى يتعب نفساوياته بالوقيعة بيناتكم ليه؟

منورني والله

ستيته حسب الله الحمش يقول...

موني
عاااااااااااااااااااااااا
حقد وحسد اجازة اسبوع وقاعدين مأنتخين
آآآآآآآآآه علشان كده النسوان في الكلية فضيوا وحصلت الحدوتة دي
والله مكنتش فاهمة
تصدقي ان ردك فهمني

اصل ساعة الشغل الكل بيتخيل في الشغل والبيت والمذاكرة
والفضى وحش يا جودعان

ربنا يبارك لك في اسبوع الأجازة ويجعله مليء بالفوائد زي مذاكرة الأحياء والفيزيا والكيميا كمان "وش مطلع لسانه"
انتخي انتخي ماأحلى الأنتخة

ستيته حسب الله الحمش يقول...

فتفوتة المختفية
كنت لسه بفكر فيكي وفي الراجل تامر اللي مش عارفه اطمن عليه خالص وغطس مقبش
مستنية اعرف كنتي فين وسوتيتة بتدور عليكي
بحبك

فتاه من الصعيد يقول...

ربنا يديم بينكم المحبه فى الله
دمتى بخير تقبلى مرورى

مصري جدا يقول...

علشان كدة بقالك كام مرة منكدة علينا بذكريات السعودية؟

يا باشمهندسة انتي جبتي من الاخر
اللي فأع الذونبة شال بلاوي وان ماشالش خدتي حسناتة عايزة اية تاني يا مفترية


المفروض لو صاحبتك السعودية بتحبك زي ما انتي بتحبيها كانت كلمتك ولامتك دة لو باقية عليكي
لو مش باقية ترمي اللي جواها في رسالة وما تردش خلاص في داهية
هيا الخسرانة
من حقك تزعلي ومن حقك كمان تسقطيها من حساباتك

أمبارح كان عمرى عشرين يقول...

ايه ده هو انا تايه ولا ايه
انا لسه معلق على البوست لقيت ده نزل وكمان على صوباعى براحه شويه يا ستيته هانم
______________

الحمدلله انك وضحتى كل حاجه
والموضوع بقى واضح للكل

انا لمابزعل مع حد من اصحابى ونفس الكلام بردو بيتقال على كلام او العكس وكده
بسكت خالص وبعد عنه ومبردش لو اتصل مثلا مبعرفش اقول انا زعلان وده عيب نفسى اتعلم اقول على طول انا مضايق من كذا

القدر و انا يقول...

ستيتة
والله احلى واصدق حب فى الدنيا حب الناس لبعضهم فى الله
حب منزه من كل غرض او مصلحة
وربنا ينتقم من الحاقدين والحاسدين
ياريت تقرأى الدعاء الاخير بتاعى
احبك فى الله يا اجمل سنوتة

د. ياسر عمر عبد الفتاح يقول...

المهاترات بتعاة نقل الكلام , وده قال وده وصل وده شتم فيك وده عمل
والله قلبي بيوجعني منها الحاجات دي

بتضايق أوي لما حد يزعل مني علي حاجة معملتهاش .. وميرضاش يخليني أدافع عن نفسي حتي
لكن اللي يضايق أكثر لما يفضل شايلها في قلبه وميقليش حتي
ويفضل من جواه زعلان مني ويعاملني وحش وانا مش فاهم.
إحنا محتاجين نعرف قيمة الصداقة الحقيقة
واللي يلاقي صاحب عاقل وكويس .. يمسك فيه بإيديه وسنانه لأنهمبقول قليلين جداً.


ده أنا لما شفت بوست جديد إنهاردة وإسمه عايم كده والبوست القديم لسه مكملش يوم

خفت أوي والله العظيم

عاشقه الرومانسيه يقول...

اجمل شئ الاخوه فى الله
ناس كده تحبيهم ويحبوكى من غير اى مصالح
الله بجد على العلاقات اللى بتكون بالشكل ده

والعفو عند المقدره يادكتوره
لانك اهل لذلك
بحبك فى الله
وربنا يبعد عننا

سلومة الأقرع ساعة الغضب
(:

بحــــبك فى الله
يااجمل وارق ستيته
امووووووووواه

هذه حياتي يقول...

السلام عليكم ورحمة الله وبركاته

د ستيتة

بسم الله ماشاء الله

يعني ندخل شد في اعصاب ونتابع السلسلة هههههههههههه

بس فعلا اهم شئ

ربنا يحفظكم لبعض فما أجمل الأخوة في الله

خالص مودتي وصادق دعائي

حواء يقول...

اجمل شئ الحب في الله


وبعدين كل الرغي ده غلوشه
ههههههههههههههههههههه


أنا كتبت رد علي البوست اللي فات لكن الجهاز عمل معايا الدنيئه
ههههههههههههههههههه


أحبك الله ياسوتيته
تحياتي

بحـــر الدموع يقول...

السلام عليكم

الحب في الله اعمق صلة وجدت على وجه الأرض
لا تسودها مصالح ولا اموال ولا اغراض انما الحب والموده والاخوة في الله
الحمد لله انتي فكرتي بعقلك وتحملتي شوية وكنت عاقلة في تصرفاتك وحكيمة..

ربنا يكتبلك قصر في الجنة يا ستيتة انتي وصحبيتك وكل مين بتحبيه وبيحبك

لا تنسوا اخوانكم في غزة من دعائكم

||..بحــر الدموع..||

ebn roshd 777 يقول...

مش عايز اقولك ان الاسافين دي من طبع
النساء .
نقول طبع لبعض من النساء اظن كده حلو
واعتقد انك كنتي من الفطنه انك عرفتي من اول وهله ان فيه اسفين جامد انضرب بينكم
بس تعرفي ان التسامح حلو اوي اوي
وبيخلي الانسان الواثق من نفسه يشعر براحه وطمانينه غير عاديه
ممكن سؤال مهم
يا تري هو ده كيد النساء؟؟

صبرني يارب يقول...

لخبطينى يا سوتيته كنت باقرا فى البوست الى فات وباعمل ري فريش قوم لقتيه راح وجه مكانه حاجه تانيه

ما علينا هاروح اكمله

وبالنسبه للبوست ده

عاااااااااااادي فىناس كده النار تاكل قلوبهم حتى لو انتى بعيد وما لكيش دعوه بيهم

وفى ناس مخها تعبان تسمع للى بيقول كلام عبيط

ما علينا حصل خير الحمد لله

بنجاواتى يقول...

السلام عليكم

بوستات حلوة بقالنا كام مرة كده

واللى قبلها كان حلوة برضه اكيد

الحمد لله انها ما ردتش عليكى كان زمان اللى بينكم رااااح رااااح وانتهى

فعلا الاخوة فى الله هى اسهل عباده على القلب ومع ذلك يظل الله المتحابين فيه يوم لا ظل الا ظله

اما عن قولك :
وبعدين متشتمش حد إلا لو كان اللي بتشتمه غلبان ....هع هع هع ولا تعليق

وربنا يديم المعروف ويجعل بيوت المحسنين عمار حتى لو ما حدش عزمنى انا مش هزعل..هو حر يا اخى

وتقبلى تحياتى

إيمان يقول...

طول ما انا بقرأ البوست عمال أقول ربنا يهديكى يا ستيته
يارب متتهوريش يا ستيته
الموضوع هيهدى دلوقتى والحقيقه هتبان
يا حجه ستيته ..ومن معرفتى بيكى قولت هى هتاكل فى نفسها بس فى الاخر هتتصرف صح وتاخد حقها من غير ما تزعل حد
هى فعلا دايما المحبه فى الله بتدوم مهما حصل
ربنا يكتر محبينك
يهدى أخلاقك هههههههههههه
ويكتر حمالين ذنوبك
بحبك وبعدين ايه الحركات دى ملحقتش اعلق على البوست اللى فات بجد كان عاجبنى جدا وخاصة انك اتكلمتى على البيه اللى بيجى علشان الهانم تحمل ويروح لا وايه ماسك الريموت كنترول
يا حلاوه عليه دخل قلبى والله

ستيته حسب الله الحمش يقول...

فتاة من الصعيد
شكرا على الدعاء ربنا يبارك فيك
تحياتي

ستيته حسب الله الحمش يقول...

هاني باشا
وهو ايه علاقة البوستين اللي فاتوا باللي بحكيه يا فندم دلوقت

على فكرة انا مش بالساهل خالص اسقط حد من حساباتي
وان اسقت حد من حساباتي وافقد صديق بزعل مهما بان علي العكس
مشكرين على الرأي يا فندم

ستيته حسب الله الحمش يقول...

محمود باشا
شفت بقى انا حسيت بيك من قبل ما تعلق على البوست اللي فات وتقول حرام

انا في العادة بتاعتك والتي تسمى القمص
ولكنها عادة ينبغي "حلوة ينبغي والشغل ده" إنك تقاومها لأن اللي ادامك بعد شوية مش بيعرف يتفاهم معاك وبيبقى الحق عليك

ستيته حسب الله الحمش يقول...

القدر وأنا
ربنا يهدي كل المسلمين ويؤلف بين قلوبهم يا اوختشي
وها أقرأ الدعاء ان شاء الله
وانا كمان بحبك في الله يااجمل ام شرفنطح في اسكنجرية

ستيته حسب الله الحمش يقول...

د. ياسر
شفتني وانا مربيه ليكم الرعب والرعابيب "ايه رعابيب دي؟"

لو حد زعل منك على شيء معملتوش وكمان مدكش فرصة تفهم وتفهمه ممكن جدا بغباء شديد يخسرك لأن برضه البني أدم ممكن نفوخه يتربس وتأخذه العزة بالأثم ومداخل الشيطان كتيرة قوي

ربنا يظلنا في ظله يوم لا ظل الا ظله
تحياتي

ستيته حسب الله الحمش يقول...

دودو

اي نعم سلومة الأقرع ميعرفش ابوه دي حقائق ثابتة
ولطف ربنا بيخلي البوني ادم يعقل
وانا كمان بحبك موت موت
مممممممممممممممممممممؤ

ستيته حسب الله الحمش يقول...

هذه حياتي
مذكراتي يا باشمهندس ملهاش علاقة بموضوع الصداقة يا فندم

انا قلت بس اديكم استراحة هههههههههههههههههههه

ربنا يبارك فيك يا فندم
منورني
تحياتي

ستيته حسب الله الحمش يقول...

حواء
معلش جوجل ساعات يلعب الدنيئة صح
بس تعليقك واصل يا فندم وبرضه علقي تاني
ازاي طمطم وحزومبل؟
تحياتي

ستيته حسب الله الحمش يقول...

بحر الدموع
وعليكم السلام

الحقيقة انا مفكرتش ده تدبير رب العالمين
يارب قصر في الجنة يارب

اللهم انصر اهل غزة
تحياتي

ستيته حسب الله الحمش يقول...

ابن رشد
فعلا يافندم
ده شغل كل الستات
وكيد الستات
واصل الستات دول مخلوقات مزعجة جدا
ومع هذا مطلوبين في السوق جدا
اسأل هاني اللي بيقول لك كنت خليهم ثلاث ستات هههههههههههههههه

الرجل اللي الرسول قال لأحد الصحابة انه من اهل الجنة ولما بات عنده لقى عبادته عادية فسأله بيعمل ايه قال انه ينام بليل ولا يحمل في قلبه غل ولا غضب لأحد من البشر
بس هو ده السر
صفاء النفس يقربها من رب العالمين
وربنا يقبلنا كلنا في الصالحين

تحياتي

MaNoOoSh يقول...

عجبنى ردك على د ياسر
لان فعلا الواحد ممكن الغضب يعميه ويخليه يخسر اللى قدامة فى لحظة لو ممسكش نفسة.
والناس اللى بتوقع دى ما اكثرها فى الزمن دة.. مش بس أصدقاء أو معارف.. لا وقرايب كمان.. ربنا يبعدهم عن طريق عباده المؤمنين
وربنا يكتبلك قصر فى الجنة بغيبة كل من اغتابك بسوء وافترى عليكى.
(ملحوظة صغنططة.. دعوتك فى رد البوست اللى فات خلتنى انشكح وازئطط..هههههههههههه)

ستيته حسب الله الحمش يقول...

صبرني هانم

الي عمله ابو رياض يستحق عليه رفع القبعة
اصل الفلوس هوناك سحابة وتسحب زي الموج العالي
اللي ميجيش ويقف ويقول لحد هنا واهلي اهلي يفضل سنة تكر سنة حتى فعلا يلاقي نفسه حوش وخسر عمر والعيال بعيد عن اهلها وناسها وغريبة عن بلدها ده غير ان شغل الدول العربية مهلك وأسأليني .. مهما كان مريح فيه نزاعات وقرف خيالي

منوراني
مممممممممممممممممممممممممؤ

ستيته حسب الله الحمش يقول...

بنجاواتي
عجبتني كلمتك قوي

فعلا الاخوة فى الله هى اسهل عباده على القلب ومع ذلك يظل الله المتحابين فيه يوم لا ظل الا ظله
-------------------------

فعلا اسهل عبادة تسلم ايدك

فيه فتة ولحمة يا فندم اتفضل الشاي ع النار

تحياتي

ستيته حسب الله الحمش يقول...

ايمي حبي
يا فهماني
يا مسستماني انتي
ماهو انا قلت لمصرية كلمة

لولا اختلاف الأذواق لبارت كثير من النساء والرجال في السوق
ههههههههههههههههههههههه

ابو ريموت كنترول ولا عمو بتاع النزهة ده كبيره الواحده تديله على قفاه وخلع طوالي بس ربنا خلى ستات تصبر علشان الجنة ما يلقاها الا الذين صبروا

بحبك

ستيته حسب الله الحمش يقول...

منوش
يارب ربنا يفرح قلبي وقلبك ويبعد عنا شرور اصحاب امراض القلوب
ومهم جدا انك استكنيصتي من الدعوة

بحبك

ايوشة يقول...

والله يادكتورة انتى عملتى الصح التسامح والاحتساب عن الله احسن شئ اصل فى الدنيا دى يااااما ناس بالشكل ده اللى يتسمع كلام غيرها واللى تفضل شايلة فى قلبها الخلاف دايما
الحب فى الله اسمى شئ يعنى الحب من غير اى مصلحة ولا ضغينة

mony يقول...

يا بختك يا ستوتة
بتعرفي تردي و تخدي حقك
من غير ما تغلطي


انا بأهلو جال رسالة زي اللي جاتلك ديه بحس ان الدنيا وقفت ولا اعرف اداف عن نفسي ولا اتكلم
و كل اللي اقدر عليه اني اقعد افضل اعيط
ليل و نهار لحد ما الموضوع يخلص لوحده


و لسة حاصلة من قريب
في خلا اسبوع كل اللي يشوفني يسألني اذا كنت عيانة ولا ايه
لاني كنت خسيت جامد جداً و لدرجة انه باين بوضوح اني مريضة
مش مكتئبة


ربنا يسترها علي و الله علشان انا مش بقدر استحمل فعلا


و ربنا معاك يا جميل
و اني احبك في الله يا ستوتة

نجمة قمر حبيب و بعيد يقول...

السلام عليكم و رحمة الله و بركاته
اول تعليق ليا عندك و ارجو تقبله
اللى انت عملتيه جميل
بس لازم برضه كل اللى حرق دمك تحرقى دمه و نص و النص ده عشانك انت .
و لازم تعرفى انك من احببتيه لابد ان يحبك حد ان قال غير ذلك
فاستمرى فى الحب
فالحب يشفى كثير من الامراض و العادات
سلام من نجمة قمر حبيب و بعيد بس بتحبك

ملكة بحجابى يقول...

ربنا يحميكى بعقلك ياستيته
على فكرة كل ردودك فى الرسايل عجبتنى واعتقد انى ماكنتش هلبقى بنفس العقل ده
وانا مبئوئة كدة
لكن بجد جزاكى الله خيرا يا حبيبتى
تقبلى مرورى
ملكة بحجابى

مصري جدا يقول...

ما هو علشان كدة ربنا محبب فيكي خلقة
ربنا يكملك بعقلك
يا عاقلة
يا راسية
يا زعيمة جمعية المرأة المتوحشة

biberss222 يقول...

ربنا رحمها البنت دى انها ماردتش عليكي ف المكالمات
يلا حصل خير
احسن حاجه ان العلاقه استمرت على خير
ربنا يديم عليكى حب الخلق يا سوتيته

Lady E يقول...

ثالثا بمناسبة ثانيا لما حد يجهل عليك خد نفس عميق وحاول تكبر حجم الجمجمة وتستوعب قبل ما تهب فيه لأنك ممكن تخسر إنسان جميل قوي متعرفش تعوضه في دنيا قل فيها الطيبين .. ودائما إدفع بالتي هي أحسن علشان تكسب ومتخسرش ..

حصل معايا موقف النهاردة يا دكتر وفعلا كنت هخسر شخصية مهمة جدا في حياتي علشان لحظة عصبيه وكنت فاهمه غلط

جزاكي الله خيرا يا دكتر وان شاء الله لما ربنا يرزقك بالقصر في الجنة متنسينيش وابقي اعزميني فيه

بحبك في الله يا دكتر

تامر علي يقول...

ولو إن الجماعة الخلايجة دول بقلق منهم أصلاً (عدا الكبار في السن جداً ) لكن واضح انك كنت مع ناس محترمين برضه نوعاً ما ... يعني بيتفاهموا برضه وعندهم وازع ديني ... إنمن في نماذج طييييييييين :) .... فعلاً لو العلاقة مالهاش اسباب دنيوية غالباً ما تنجح وتكون علاقة سوية وإن شابها بعض الشوائب ....
نفسي (أتتبع) أعضاء جمعية المرأة المتوحشة واغتال رئيس مجلس الادارة الغير معروف حتى الآن :)

لجين أبو الدهب يقول...

ستوتة وحشتينى مووووووت ..

النت كان عندى فاصل وكنت مفصولة عن الدنيا كلها :(

الحب فى الله انا بعتبره اعظم شئ موجود فى الكون ..

قلبين يتجمعوا من غير اى مصلحة ..

فين تلاقى ده دلوقتى ؟؟

بس الاصعب بقى لما تكونى معتقدة ان فى حد بتحبيه فى الله وهو كمان كده وتلاقيها مع او موقف يتقصير منك او حد ينقلها كلامك تبقى جلاد لا يرحم ..

انا بحس ان اعمق شئ فى الحب فى الله هو التسامح الدائم وكذلك السريع ..

ربنا يحفظلك كل صحاباتك ويبارك لك فيهم وفى حبهم ..

أحبك فى الله ..

سوبيا يقول...

ربنا يديم الحب ما بينكن
يارب

ومابيني وبينك يارب
يا أوختشي

وبالنوسبة للشاهد من القصة
قولتي حاجتين
وكتبتي 4

بركة بأه

ربنا يباركلنا فيكي يارب

roaua يقول...

ازيك يا دكتورة
أخبار حضرتك ايه ..
ربنا يديم عليكي حب الي بتحبيه والي بيحبك ..فعلا الحب في الله أروع أنواع الحب وأدومها .
بس تعرفي أنا بأع عشت من لما ربنا خلقني في السعودية لحد قبل سنتين يعني 19 سنة كاملين مصاحبتش حد ولا حتى زمالة كنت بحس السعوديين زمايلي يعني في جو وانا غي جو تاني اختلاف الثقافة والحياة مع اني متربي في السعودية بس سبحان الله معرفتش أتأقلم عليهم ربنا زرع جوايا ان دي مش بيئتي ولما جيت مصر كلها ساعات وباه دم مصر بيجري في عروقي ..بلدي بأه
ربنا يكرمك وآسف للإطالة
مودتي

رئـيس التحـرير يقول...

على فكرة أنا كاتب مصري
بس ده ملف تعريف المجلة بس

AhMeD RaDy يقول...

اسلوبك رائع فى الكتابة والله حلو بجد

وفعلا ماكان لله دام واتصل

وربنا يديم كل اعمالك وعلاقاتك يارب ..

وانطلقى

خالد المصري يقول...

و لربما اختزن الكريم لسانـه .... حذر الجواب و إنه لمُـفـَـوَّه

و لربما ابـتسم الوقور من الأذى .... و فـؤاده من حره يـَـتـَأوَّه
.
علي بن ابي طالب

mohamed ghalia يقول...

جميل فعلا الحب فى الله
ربنا يحفظكم
المهم انى حالة الإكتئاب عدت هههههههههههه

ستيته حسب الله الحمش يقول...

ايوشة
كلامك صح يا جميلة
وربنا يجعل كل عملنا خالص لوجهه الكريم
منوراني

ستيته حسب الله الحمش يقول...

موني
اللي زيك احسن مني بكتير

انا لساني طوله مترين لكن باخد حقي
انتي لسانك صغنن وربنا اللي بياخد حقك
تفتكري مين احسن فينا

دايما اقول لبنتي لما تتمنى تكون زيي وتقول ليه يا ماما متطلعتش زيك؟
اقول لها انتي احسن مني واروق مني واصفى مني ومؤكد عند ربنا انتم الاتنين احسن مني

احبك الله الذي احببتني فيه

ستيته حسب الله الحمش يقول...

نجمة قمر حبيب و بعيد

زمااااااااااااان قبل ما اسافر السعودية كان اللي يجي ناحيتي انط في كرشه طوالي

كبرت والزمن وراني كتير وعرفت إن الإنسان بالمنطق والأدب يحصل على اكثر مما يريد

كمان الوالد والوالدة كانوا مربينا غلط خالص
يا ابيض يا اسود
بعد ما خسرنا ناس كتير اكتشفنا ان الحياة ابيض واسود وفحلوئي وبمبي مسخسخ كمان

منوراني

ستيته حسب الله الحمش يقول...

ملكة بحجابي
بكرة لما تبقي قدي ها تكوني اعقل مني ميت مرة بس
وجزاكي خيرا يا حبي
منوراني

ستيته حسب الله الحمش يقول...

هاني باشا
ده من ذوقك العالي يا فندم
واهم شيء ان بعد كل المدح جبت اجمل صفة فييا
اني الزعيم الكبير لجمعية الست اللي كلت دراع جوزها
هههههههههههههههههههههههههه

ستيته حسب الله الحمش يقول...

بيبرس باشا

ساعة لما مردتش كنت متضايقة جدا ونفسي آكل اي لحوم حمراء

بس بعدين شكرت ربنا انها مردتش
وانا فرحانة جدا انها اولا لسه صحبتي
ثانيا رغم انها مش صغيرة مؤكد انها ها تراجع نفسها ميت مرة قبل التهور على خلق الله
ربنا يكرمك بكل اللي تحبه في دنيتك وآخرتك يا بيبرس

ستيته حسب الله الحمش يقول...

ليدي
هي الحياة ايه غير تجارب صغننه فوق بعضها ومنها تتكون شخصياتنا إما شوريرة مثل سوتيتة أو طيوبة مثل ليدي العسل والسكر
يارب يرزقنا قصور متجاورة في الجنة ويجعل بيننا من يشفع لنا بصلاحه وتقواه
وانا كمان بحبك جدا جدا

نعكشة يقول...

ربنا يخليكوا لبعض يا رب

و يجمع بين كل المتحابين في الله تحت ظله يوم لا ظل إلا ظله

سلام عليكِ

ستيته حسب الله الحمش يقول...

تامر علي
عاوز تغتال الرئيسة إذا ها نضم لي لي غصم وأتدار وكان نفسي نضم موني بس للأسف متنفعش

في المنطقة اللي كنت فيها شفت اسوء مما تصورت ان عيني تشوفه وشفت برضه ناس إذا خوفتهم بالله خافوا ولم تأخذهم العزة بالإثم

طب تعالى هنا وقول لرجل او ست في الشارع عادي اتقي الله
ها ترجع تحط تلج على عينك اللي خدت لوكامية معتبرة ده غير الكلام اللي ها تسمعه

لكن هناك هم يفطسوا المتعاقدين بس بيحترموا جدا المحترمين وخاصة ذوي العقود الحكومية لأنها عكس مصر الحكومة أغنى من الشعب بس بتوزع عليه الثروات ههههههههههههههههههه

منورني

ستيته حسب الله الحمش يقول...

لوجي هانم وحشتيني جدا جدا
ماهو مشكلة السعوديات ان تعاملهم مع الغرباء بيتم في نطاق اننا محتاجين وها نفوت اي شيء بيضغط علينا حتى لو مسألة كرامة

بس لما يعرفوكي كويس ويحترموكي بيكونوا حقيقي احسن من المصرييات كتير ومخلصات بشكل لم تختبريه سابقا وزي ما قلت لتامر علي اذا خوفتهم بالله خافوا ودي اهم صفة في القصة كلها بتصلح الحياة وتخليها وردي

وحشتيني جدا

ستيته حسب الله الحمش يقول...

سوبيا
ربنا يخليكي يا قمر
قولت حاجتين وافتكرت اتنين وانا بكتب
هههههههههههههههه

هي البركة دي مهمة
منوراني

ستيته حسب الله الحمش يقول...

ابراهيم

مانوسة برضه واحمد راحوا ورجعوا وهم غرباء ولم يعاملوا سعودين لأنهم كانوا في مدارس انترناشونال واللي معاهم كلهم جنسيات اغلبها غير عربية ذائد المصريين اللي متشحططين بعيالهم بيذاكروا في كل الدول
فهم زيك ميعرفوش شيء غير مصر هي امي

منورني

ستيته حسب الله الحمش يقول...

احمد راضي

نورتني جدا يا مقاتل وفهمت من مدونتك انك خلصت جيش
مبروك يا سيدي وعقبال ما تلاقي شغل
منورني

ستيته حسب الله الحمش يقول...

خالد المصري
رضي الله عن آل البيت المكرمين وعن الصحابة اجمعين
كلام في الجون
متشكرة جدا

ستيته حسب الله الحمش يقول...

محمد غالية
مفيش يا باشا اكتئاب
نحن قوم لا نكتئب ابدا

ممكن نفصل بس شوية ونحاول نرتاح

وده فضل ربنا علينا
انت نورتني

ستيته حسب الله الحمش يقول...

نعكشة
قافلة التعليقات ليه يا بونيتي
يعني تذاكري علي كارديولوجي وممنوع اعلق كمان فعلا فعلا تستاهلي كلمة واحدة
عاااااااااااااااااااااااااااااا

منوراني

أبو العريف يقول...

دكتوره
اولا انا اسف اني ما جيتش من زمان
معلش هما كانو شويه خنقه

علي نت بايظ
واخيرا الكمبيوتر ولع بجاز

بس عموما

احلي حاجه في الدنيا
الصداقه اللي هي خالصه لوجه الله دي

واوحش حاجه لما يحصل زي اللي حصل معاكي

تحياتي

الشموع البيضاء يقول...

ازيك ياسوتيييييته
انا قريت الى فات وملحقتش اعلق
المهم انك عامله زيى انا لما بلاقى حد اتقمص كده ورمانى بكلام من غير مافهم بتغاظ اوى وانتى بتحكى الموقف فكرتينى بنفسى بس تعرفى كويس جت من عند ربنا انها ماردتش عشان تهدوا انتوا الاتنين وهيا تراجع نفسها
وفى الاخر للاسف فى ناس كتير غلاويه بطبعها او الشيطان بياثر عليها بسهوله ويمكن غيابك سهلها التوقيع اكتر وان دل على شىء دل على نفسيه وحشه ربنا يهديها ويهدى الجميع
اما الحب فى الله دى انقى حاجه بعيد عن اى مصلحه او كلمة شكر حاجه كده ربنا خلاها غاليه وقال المتحابين فى تحت ظله يوم لاظل الا ظله حاجه فعلا جميله
تحيااااتى

ELMASRYA - MRS WRITER يقول...

خير خير يا سوتيتة

اللي اتكسر يتدغدغ ( وش بيضحك )

يابنتي تنيثي ولا تتسنعي

تريثي ولا تتسرعي يا ستوتة وخللي بالك طويل

أنا في المواقف اللي من النوع ده ببقى بارده جدا لأن الحق دايما هو اللي بينتصر

وأنا ببقى عاملة زي النمرة المتأهبة

أستنى واسمع وارتب كل حاجه وامسك اللي عملوا كده واحد واحد

اللي غلط بياخد على قفاه بالأدب بس بيبقى قفا جامد طبعا بيخليه مايقربش ناحية المصرية تاني من اللسع اللي في قفاه

واللي ظن بيا ظن سوء بيتحول لمعتذر شديد الإعتذار والندم

روق يا حلو روق والمهم إن الحقيقه بانت وأخدتي براءة

أخبار محل الكشري إيه؟

مواااااااااه