البقاء للأصلع

وفي صباح يوم مفتخر قررت أركب المكروباظ
أخدت الكرسيين اللي جنب السواق وطلعت صبحت على سي السواق وهو صنف رجالي مصري مفتخر
شكله شكل اللمبي .. والفوكاليز برضيك عنده ضايعة .. ولما يكلمك فهو ملك الفتي الأول في الشرق الأوسط
سيادته بيفهم في كل شيء من أول إبرة وابور أم توحة بتاعة المحشي لحد السوياسة الخارجية .. آه .. أمال

واحنا ماشيين في أمان الله وعم صابر فاتح ع ال 140 كيلو متر في الساعة والواحد نطق الشهادتين وكلبش في الكرسي وكان ناقص فعلا كلنا نلبس مايوه ونمسك حديدة علشان لو نطينا من فوق كوبري أو إنقلبنا نكون بكامل احتياطيتنا
وفي هاذوه الأثناء جت ست سرحانة في حديث طويل وباصة للست اللي جنبها وسايبة العربية بتاعتها تمشي بال "أوتو بايلوت" .. ضرب عم صابر سرينة صحتها من النوم وتف من الشوباك وقال حكمة بالغة والله

"لا تمشي ورا سواق هيئة ولا ست سايقة"

يا سلااااااااااااااااااااااااااام .. فعلا كلام حوكم وكلوا عوبر صراحة .. والله يا عم الواحد مش مونكن يسمع الكلام الكبير ده الا في مصر فعلا .. أو في الدولة الوحيدة في العالم اللي بتمنع سواقة الستات على اساس انهم فتنة لعن الله من أيقظها

لمؤاخذة يا ست يعني علشان قلت كده .. ضحكة بلهاء وأسنان سودة "ما تبقى منها" تفتن قلب أعتى نساء حارة القرد عطفة الشمامين

لأ تؤتؤتؤتؤتؤ .. ده إنت كلامك بصراحة عين العقل ياخويا .. ماهو أنا كمان عمري ما سقت المخروبة دي اللي اسمها عربية .. بخاف ياعم .. ست بقى وقلبي رهيف ياخويا
بس ياعمنا ده حسب الإحصائيات الستات في العالم كله أقل معدل حوادث .. مؤكد بيصعبوا على المرور فزورت التقرير

لأ ماهم مش بيعملوا حوادث ولامؤاخذه .. هم بيلبسونا في بعض

تصدق بالله .. هو ده التفسير الحقيقي .. الحمد لله .. براءة يا إدارة المرور .. من حيث بيلبسوكوا في بعض هم بيلبسوكوا من زمان ولله الحمد من قبل عصر العربيات بزمان
الله بس يا عم ما إحنا دلوقت قابلنا عشرين حمار دكر بيسوقوا وكانوا ها يلبسوا فينا واحنا أصلا لا جينا ناحيتهم ولا لمؤاخذة انت سايق بسرعة ولا بتكسر ع البشرية ولا حاجة .. الله .. هو مفيش أمثلة على الدكور المتخلفة في السواقة؟

هع هع هع لأ يا ست النكت أحلى ع الستات

والله عندك حق ياخويا .. ربنا يقل منهم .. ويريحكم .. وتمشوا تخبطوا في بعض كده

تعرفي يا مودام اصل الستات قلبها رهيف كده وضعيف .. أول ما أديها زمارة تتخض

ياعييييييييييييييييييييني .. بس مش كلهم قلبهم خفيف يا عم .. ده فيه منهم اللي زيك حولهم لحيتان وقروش .. بس مش قرش حشيش متفهمنيش غلط هع هع هع هع
تعرف يا عم في بلاد متخلفة متعرفش الحكم البالغة بتاعتنا دي .. موكوسين ياخويا بعيد عنك .. الست عندهم قاضية من خمسين سنة مع ان عمر دولتهم 300 سنة كلها على بعض .. ولما بيقيموها كشريفة أو مرتشية أو مغرضة بيقيموها كبني آدم وملهمش علاقة خالص خالص بيها كست .. ولو حد قال مثل زي اللي انت قلته ده ترفع عليه قضية تجيب داغ أمه

طبعا بكلم حمار مش فاهم أنا بقول إيه
ألا سمعت أنت عن أنديرا غاندي ولا الولية دي المرأة الحديدية مارجريت تاتشر؟

.................................. مع نظرة بله .. صعبت عليه نفسه .. آه سمعت حاجة زي كده

الولية بعيد عنك مارجريت دي ياخويا أدارت حرب ضد الأرجنتين اللي كانت ها تاخد جزر كليفلاند وكسبتها وقعدت مدية برستيج لبلادها وتصلح في اقتصادهم وتقوي شوكتهم بين الأمم .. وعندك قد خمس ست رئيسات وزراء حاليات في دول من العالم الأول .. العالم الأول ده اللي بياكل كويس وبتعالج كويس ويدخل أي قسم بوليس ياخد حقه وبيبص لينا على إننا إنسان الغاب طويل الناب .. وعدد الوزيرات الفعليات في العالم الأول "مش خيال المآتة" متعدش
لكن بيني وبينك برضه الست متسدش

انبسط وأفرج سراح الأسنان اللولي علشان تشوف الشمس بعد ما قعدت قرون في خرابة بؤه

إحنا شعب نستاهل أبو طويلة واللي قبله واللي قبله واللي بعده

ربنا ياخدهم يامودام شحتونا وقرفونا

ليه كده بس لحسن تجيلك ست وتضطر تمشي وراها؟ .. خلي أبو طويلة .. شعب زي ده وبالمباديء دي وعمره ما أحترم المرأة ولا ها يحترمها .. ولا يحفظ من الآيات إلا أية "واضربوهن" ولا يحفظ من الأحاديث الا حديث "لو أمرت أحدا أن يسجد لأحد لأمرت المرأة أن تسجد لزوجها" وطبعا ناقصات عقل ودين اللي كل واحد ربنا بيقدره ساعتها ويبقى شيخ مشايخ الطرق الميكروباظية وبيفسره بمزاجه .. وساعة اللقاءات التلفزيونية يلبس وش المثقف ويخرج يقول ديننا يأمرنا باحترام المرأة .. وساعة الدين يلبس لينا دقن ويقول دي جوهرة ولازم نحطها في العلبة القطيفة دي اللي فيها إيه؟ فيل .. وبليل بعد ما يبلبع بفلوس النهار كله يروح يعمل عليها أسد وفي أقسام البوليس نعامة وبيقلع ملط .. بصراحة ده شعب يستحق أبو طويلة واللي زيه

هنا على جنب يا عم صابر .. قف .. وقف نمو اللي زيك

هوووووووووووووووب كسر صابر يمين كسرة معتبرة بلا إشارات ولا إنذارات .. وجاءت شتيمة ليه من راجل ع الشمال "ياحمار تيت ابو اللي ركبك عربيات" .. صابر منفرج الأسنان أهبل النظرات مبرشم آخر حاجة .. وغاب الميكروباص عن نظري في ثواني معدودات نتيجة لكسرة شمال مفاجئة اتبعها دخان شكمان داس صاحبه على البنزين برجل تقيلة

ملحوظة:
1- حوار خيالي نتيجة لمشاهدتي لبرنامج الصفحة الأخيرة اللي جاب استطلاع رأي بين سواقين ميكروباظ شبه اللمبي عن المثل الكبير قوي اللي أول مرة أسمعه "لا تمشي ورا سواق هيئة ولا ست سايقة" .. وطبعا كل راجل منهم موسوعة حكمة وشكله عبرة لمن يعتبر .. والله لا يبتلينا
2- زمان كانت حاجات زي دي وأنا صغنونة تؤثر في جدا .. وبعدين عرفت ازاي استفيد من كل مثل وحكمة خربانة في الشعب ده لصالحي تماما .. زي اني اعوم في شارع زحمة على خفيف .. تلاقي ثلاث صفوف عربيات ورايا وقفوا مكانهم على اساس اني ست ومبعرفش اسوق وامشي أنا في الشارع زي الملكة ومفيش دكر يهوب ناحيتي .. ست بقى ومش عاوز يتخبط .. زي أني أصدر بوز عربيتي وأنا طالعة من الركن ويقف المسكين على أساس أني معرفش الفرق بين الدبرياج "أيام ما كان عندي دبرياج" والبنزين وأخرج أنا لصفوف العربيات العاملة .. وأسيبه يدي لمراته الي قاعدة جنبه الدرس عن الستات وسواقتهم وليه هو مش بيخليها تسوق عربيته ولا أشترى لها عربية جديدة؟ .. وكل شيء عنصري ضد الستات ربنا قدرني وأستخدمته صح علشان أرتاح وأنبسط وأعرف كل مبرشم إن نظريته صح الصح .. ليه ننكر تخلف عقلي ممكن نستفيد منه؟ عاوزة كل شحط يعاملني على أني فاقدة الأهلية .. ده أريح جدا .. ومش مضطرة أجيب شهادة من العباسية .. المصريين مدينها رسمي لكل ست