إجتماع جمعية المرأة المتوحشة السري "1"

سلسلة بوستات لبنات حواء بس

أي راجل ها يندس بينا هنا ها نبندجه

شايفاك ياللي بتقرأ في الضلمة هناك من ورا اللينك

بهيج .. طير إنت

بما إني مش ها أعرف أجمع كل صديقاتي المدونات في إجتماعاتنا نحن نسوة جمعية المرأة المتوحشة

فقد قررت وضع بعض نقاط اتفاقنا في الجمعية لعلها تفيد اللي لسه – يا عين أمهم – ها يتجوزوا

الحقيقة ها أديكم يجي 60 بوست كده

بالشفا

أولا يا بنات جمعية المرأة المتوحشة دي في الدول المتقدمة كان ها يكون اسمها جمعية المرأة العاقلة

بس هنا في مجتمعنا الذكوري عادي وطبيعي جدا تكون اسمها جمعية المرأة المتوحشة

حيث كل ذات عقل لا تتنازل عن حقوقها مقابل أداء واجباتها لازم يبقى اسمها المتوحشة

عادي

متوحشة متوحشة واللي عاجبه

تعالي بقى أديكي البلاوي اللي استفدنا منها بعد الجواز

جوازي وجواز كل الولايا عضوات الجمعية

وهنا يحضرني أن أقول إن ولله الحمد والفضل والمنة

لم تفشل عضوة منا

وكلاتنا عملنا بيوت إلى حد ما ناجحة

ومشينا الرجالة على العجين ملخبطوش

بس برضه الشهادة لله هم رجالة بكل المقاييس كويسين

يعني إحنا ما عملناش من الفسيخ شربات

ولا صنعنا المعجزات

كل راجل من دول كان جدع

فوجد ست جدعة معاه

اجدع من ميت راجل

وبشنب ودقن كمان

لأ نتكلم جد بقى

ها أقول لكن شوية حاجات كده تخلي الحياة الزوجية آخر بهججة وآخر سعادة

ملحوظة مهمة: التجارب دي لن تصلح اطلاقا مطلقا البته لو كنتي ناوية تتجوزي راجل بالإسم .. ولا يحمل من الرجولة نصيب أكتر من خانة ذكر في البطاقة

1- الحب جميل .. بيعمل سحابة روز في أحمر على العين .. فهل تأكدي من خلال التصرفات أنك مقبلة على الزواج من راجل جدع .. إبن أصل .. متربي .. ذو مستقبل واعد .. يعرف من أمور دينه وصلته بربه أكتر من قراءة الفاتحة؟

لو كانت الإجابة آه .. كملي قراءة التجارب النسوانية الآتية

لو كانت الإجابة مش متأكدة .. خدي وقتك وأوعي تستعجلي .. محاكم الأسرة ولقب مطلقة مش سهل في مجتمع ذكوري بشع

لو كانت الإجابة ده وحش وكخة يا ستيتة وغيور وعصبي ومعفن ومش بيستحمى بس "بعبه" .. إمشي يا بت من هنا أنا مرارتي متستحملش عِلل

2- أولا أكبر مشكلة بعد ما تدخلي بيت العدل إنك بتكوني محتاسة حوسة الطور اللي سابوه في الغيط

1. 
   

   لا قالوا ليه هو ها يحرث ولا ها يدور ساقية
   

وبما إنك بتحبي لدرجة التنويم المغماطيسي

وبما إنك خايفة من الفشل

وبما إنك عاوزة ترضي حبة العين ونور الفؤاد "سي دعبس" بتعملي أعمال "زينة" حبيبة هركيوليز

شهر .. إتنين .. سنة بالكتير وتهمديييييييييي

وتباني يا خايبة على حقيقتك

وإنك سيدة الأنتخة الأولى

ده غير الملاحق اللي ها تيجي لك نتيجة الجواز

زي سنية دعبس

وبرعي دعبس

والله أعلم ها تعملي كام ملحق لسي دعبس

دي تساهيل بقى

والعيال عزوة

وإغلبيه بالعيااااااااااااااااال .. ويغلبك بالمال

مع إن حسب الظروف الصحية والإقتصادية الآنية

إنتي ها تكوني شبه عقيمة وهو مفلس محلتوش اللضا

"إوعي تعملي كده يا به منك ليها .. ده أنا بهزر .. العيال تجيبي منهم اللي تعرفي تربيهم .. مش الشارع هو اللي يربي والا النادي"

نصيحة الجمعية: إشتغلي بالعقل من أول يوم .. إعملي عمل قليل مستمر خير من كثير منقطع .. لأن الزوج فعلا بيحبط جدا لما يلاقي "بيونك ومن" في عصر الجواز الأول وست محتاسة وكسولة في العصور الجليدية التالية

عادي إنك تكوني مش متعلمة حاجات كتير عند ماما .. وعادي جدا إنك تطوري عن بيت مامتك وتحطي أحلامك في بيتك

شغل البيت صدقيني يا زينات صدقي يا أوختشي مش صعب خالص

وخديها من واحدة كانت مأنتخة عند مامتها

بس فيه أمور أساسية من غيرها ميبقاش بيت يبقى اصطبل خيل

زي نضافة البيت ونضافتك الشخصية

دول مش رفاهية

حتى لو بيتك في حارة القرد عطفة أم سماعين

النضافة دي مهديء للأعصاب

ترتيب العفش وترتيب كل شيء بفن مش بياخد وقت كتير اصلا

ولو مش عندك مقدرة لشغالة قسمي البيت على أيام الأسبوع ها تاخدي كل يوم نص ساعة للبيت "حجرة واحدة" .. وأصلا بيوت النهاردة كلها قد علبة الكبريت

لو عندك مقدرة لشغالة .. هي ها تنضف بس وكل مدة .. لكن اللي ها يحافظ على النظافة دي والترتيب هو انتي .. وزي ما تعودي جوزك وولادك ها يتعودوا

آه يا أوختشي جوزك على ما تعوديه وابنك على ما تربيه

قطيعة

الكارثة المحققة في النظافة الشخصية

هو إحنا أصبحنا أشخاص نكره الصابون؟

إيه النيلة اللي بتحصلي لو ركبت المترو الأنفاقي على الصبح دي؟

ستات معفنة رائحة ولبسا وحتى الجزمة مستخسرة تلمعها

ستات معفرة ومجفرة وشكلها يقطع الخميرة من مصر كلها مش من المترو بس

أمال في البيت .. اللي هي سعادتها بتعتبره خلوة بتكون عاملة إزاي؟

ها ترد عليا "البه" حسنية وتقول يا أبلتي ما هو والعيش والعيشة واللي عايشنها

يابنتي يا حسنية هو أنا بقول لك حاجة؟

ما أنا عارفة إن العيشة بقى لونها بلاك

أنا بقول لك النضااااااااااااااااافة

دي حاجة ببلاش كده

أنتم نسيتوا نصائح المرأة العربية اللي درسناها في ثانوي؟

دي كنز

"فالتفقد لمواضع أنفه وعينه .. فلا تقع عينه منك على قبيح ولا يشم إلا أطيب ريح"

ويحضرني في هذا الموقف قول الست الوالدة

الست اللي متاخدش حمام قبل ما تدخل السرير تبقى معفنة

يا سلاااااااااااام حكم يا ناس

حكمة هذا الجزء

أنت ريحانة بيتك .. إن تحولتي إلى فجلة .. فلا تلومي زوجك إن أصبح جوعضيض .. وجاله دربكه في بطنه .. ما إنتي مجرد فجلة