ينفع يعني ننسى الأهداف الكبيرة للثورة ونقعد نلعب مع بعض حاوريني يا كيكة؟
ينفع يعني بدل ما نتكلم عن الإصلاحات في الداخلية نروح - تاني - نتكلم مع بعض عن الفتنة الطائفية؟
ينفع يعني بدل ما نرفض التعديلات الدستورية ونطالب بدستور جديد - وهو أمر لازم لأي ثورة شرعية - نفضل نفحص في وثائق بلهاء متروكة عمدا في مراكز التعذيب الأمنية؟
ينفع نترك اذناب الحزب الواطي تلعب بينا كده؟يبقوا فعلا هم أقوى من شعب وثورته
دي الصورة للناظر العاقل مفيش كلام
هل اللي بيحصل ده يثبت أننا شعب ناضج سياسيا وعلى مستوى ثورة هي الأولى من نوعها في العالم؟
الفتن الطائفية في مصر لن تنتهي إلا بدستور جديد يحمي كافة مواطني مصر
دستور يجعلنا جميعا سواء أمام القضاء
دستور يجعل "جهاز أمن الرئاسة" معندوش مصلحة يلعب في الملف ده
لأن كده كده الرئيس ها يتغير وكل إنسان ها يتحاسب لو أخطأ
الدستور الجديد ضمانة كافية لكل صاحب مطلب أن يحصل على مطلبه
إن كان مطلب عادل وأغلبية الشعب يصوت عليه بالموافقة
النهاردة نسمع كلمة جنايات القاهرة تؤيد قرار النائب العام بالتحفظ على أموال حسني مبارك وسوزان ثابت
الحيتان الكبيرة وأسرتهما الحيتان النونو والحيتان القُصر
عاوزين الكلمة دي في دستور جديد تطارد كل فاسد أو مشروع فاسد
دون تفريق
عاوزين في دستور جديد يحضر أحمد عز للنيابة فيقف مثله مثل أي متهم
لأنه أخطر وأسوء من أي حرامي أو هجام صغير
عاوزين في دولة جديدة الحرامي الحوت لا يدخل سجن المزرعة في زنزانة بالسيراميك والسخان
وابن الناس الفقراء يقضي حاجته في جردل
ياناس ده إحنا ناس مختلين
عندنا تفرقة عنصرية حتى بين المساجين
كل فئة اليوم تطلب مطالب فئوية
إقتصادية أو دينية
على أساس احنا في مركز قوة
والجيش لن يضربنا وإلا تعرض لعقوبات دولية وصرخنا بالإضطهاد والدولة العسكرية
والحكومة مجبرة ترضينا وإلا ها نسقطها الأيام الجاية
بتفرق شمل المصريين
المصريين اللي عادة لا تجمعهم إلا حروب شرعية .. ومرة واحدة جمعتهم ثورة شرعية
المصريين دول لازم يكونوا من النضج بتأجيل المطالب الفئوية
لا يوجد شيء ها يجيب لك حقك
ويعيشك عيشة كريمة
ويجعلك آمن أنت وأهل بيتك
ويحفظ كرامتك بره وجوه إلا دستور جديد وإستقلال قضاء
فيما عدا هذا ها تشيل ألضو وتحط شاهين
شاهين تاني هايعطي رئيس تحرير ملايين وانت عامل المطبعة ملاليم
ورئيس بنك ومعارفه آلاف وإنت المية خمسة وأربعين
ها يشد مع الكنيسة ويرخي مع السلفيين ويرجع تاني يشد السلفيين ويحقق مطالب غير مؤثرة لمسيحين
ها يصنع دول داخل الدولة من كنيسة وأمن دولة
أنا أرفض هدم كنيسة أطفيح على خلفية جريمة أخلاقية موجودة في كل الدنيا
وأرفض الإعتداء على أي دور عبادة
وأرفض رفض بات خروج الأسر المسيحية من أطفيح
وأرفض أن يدخلهم الجيش بالقوة ويضع عسكري أمام بيوتهم لأن ده مش حل
وأرفض اليافطات اللي رفعها المسيحين بالأمس "نريد قانون بناء دور العبادة الموحد ونريد إلغاء المادة الثانية للدستور"
وأرفض جميع المظاهرات الفئوية حتى مظاهرات الجامعة
مش علشان لا أحمل هم الناس
ولا علشان زي ما واحدة مسيحية قالت لي "لو اتهدم مسجد مكنتيش قلتي كده"
علشان أساسا لو رفعنا قواعد البنيان صح مش مضطرين تاني نطالب ونرفض ونقبل
علشان القواعد إن خرج منها بنيان مظبوط في نسب الأسمنت والظلط والرمل مش ها يكون آيل للسقوط
وعلشان القواعد تترفع صح لازم أدي فرصة لرئيس وزراء - جاء بناءا على مطالب ثورية - انه يشتغل
يرضيكم أبلة ظاظا "بره وجوا" تشمت فينا
وكل واحد بيقول بقت فوضى يطلع بيفهم ويهز رأسه علامة إنه العلامة ابن حنسة؟
يعني بدل ما نخرج الجمعة نطالب بالمساواة مع تونس بإلغاء جهاز أمن الدولة وتشكيل لجنة تأسيسية لدستور جديد
أشغل رئيس الوزراء في حل مطالب فئوية كده كده ها تتحل
بدل ما ألحق تعديلات دستورية ها يتم الإستفتاء عليها بنعم ولا
أخرج تاني وقسيس ماسك إيد شيخ وبيبوسوا بعض من بؤهم في تضامن لا يعني شيء على أرض الواقع
نعم لا يعني اي شيء على أرض الواقع طالما ظلت دولتنا تدار بالمشاعر والأحاسيس
المشاعر والأحاسيس متأكلش عيش ياسادة
حقي وحقك وتكرهني ولا تحبني أمر يخصك
يحزنني أن يتحول المصريين بنعرتهم الطائفية إلى ثورة مضادة في حد ذاتهم
ويحزنني أن نسقط ونكون سبب في فشل وزارة نعقد عليها الآمال
ويحزنني أن نلف حوالين بعض في كراسي موسيقية
جعلت الكثير من أبناء الشعب يجد الوضع فوضوي ويمل من مساندة الثورة
صدقوني مش عارفة كتبت كل الكلام ده إزاي
أنا في حالة قرف غير مسبوقة
وكتبت البوست ثلاث مرات ومحوته
ومش عارفة إن كنت كاتبة بشكل متسلسل ولا عجن وطبخ
بس ده هو اللي جوايا
اللهم أهد قومي فإنهم فئويون متعصبون متطرفون
28 التعليقات:
عندك حق والله يارب يهدينا ويكشف أي مخلوق بيحاول يوقعنا الوقيعه دي
طبعا ماينفعش كده لان اللي بيحصل بيرجعنا خطوات للخلف واحنا في عرض خطوة للامام
السلفيين رفضوا المشاركه في الثورة بحجة حرمة الخروج علي الحاكم وماينفعش يقابل واحد بشعرها في الميدان
ورفضوا التظاهر لقتل اخوهم بلال
والنهارده واحد قال الديموقراطية حرام وهوه حر في فتواه بس رجع تاني يقول انهم هيكونوا حزب سياسي وينافسوا علي مجلس الشعب والرئاسه
ايه يا كابتن مصر ما هي دي الديموقراطيه
والنهاردة خرجوا علشان كاميليا
طيب ماخرجتش علشان بلال ليه؟
طيب كاميليا ولا مصر ؟
كاميليا ولا بلال؟
واللي افتي بقتل البرادعي اتضح انه له ملف في امن الدوله
ماعلينا
الطرف التاني الاخوة الاقباط
الم يكن كافي ان تعرفوا عدوكم بعد اتضاح ان العادلي هوه من فجر كنيسة القديسين؟
يعني انتوا مش عاوزين تفهموا ولا لعبة الطائفية عجبتكم واللي اتظاهروا علشان الكنيسة اضعاف من تظاهر علشان مصر في ايام الثورة
هي مصر اهم ولا الكنيسه ؟ الجيش وعد ببناءها وافرج عن ابوكم
لا تضغطوا بشده في وقت لدينا مليون شئ نفعله لدينا ثورة يتأمر عليها الكثير
اعتبروا انها خسارة في سبيل مصر في سبيل حرية كل المصريين وبلاش نلعب بمصر ونضيع اهم ثورة في تاريخ المصريين
ارجوكم جميعا اعيدوا التفكير فيما تفعلوه ضحوا بشئ من اجل كل شئ او سنخسر كل شئ
افيقوا رحمكم الله
الله يفتح عليكي وعلينا .. أضم صوتي ليكي في كل كلمة وكل معنى وكل نداء في البوست
بسم الله الرحمن الرحيم
الإجابة : أنا مع حضرتك في كل اللي قولتيه
شفتي يا دكتوره أن المشكله الكبيره والثورة المضاده كانت من طبيعة المصريين أنفسهم وانهم السبب في كل شيء بتصرفاتهم الغريبه في الاوقات العجيبه؟
مفيش حزب وطني يا دكتوره صدقيني- ولو صدر هذا الكلام من بعض الصحف القوميه فهو تستر على حال الناس اللي -بالبلاء- ليقنعوا العالم بنظرية المؤامره، ده احنا 60 سنه بدون تعليم ولا تقدم ولا أي شيء، هانجيب الانتظام منين؟
طيب ايه رأيك اني متعجب حتى الآن لأن مفيش واحد جوه البلد سأل عن وزير الصناعه وسأله ما هي الخطه لوضع مصر على الخريطه الصناعيه في العالم؟
وايه رأيك ان كل الناس مركزين مع وزير الداخليه والخارجيه بس؟
وايه رأيك ان مفيش حد اتكلم عن -خطه وطموحات مستقبليه- لرفع مستوى المعيشه، إلا كله مش بيتكلم غير عن أوهام الفلوس اللي اتسرقت والاراضي اللي تم بيعها
طيب احنا هانتقدم ازاي واحنا بنحشر نفسنا في مواضيع موجوده في يد القضاء؟
100% worth reading
والله كنت متاكد انهم هيلعبوا فى موضوع الفتنة الطائفية واستغربت انهم اتاخروا فى الخطوه دى وده اللى مخوفنى دلوقتى لو الموضوع متلمش والدايرة وسعت كل سنة واحنا طبيبين فى الثورة والبلد لو مكناش اقويا هيضيع كل اللى عملناه وهنرجع لاسوء مما كنا بمراحل ربنا يستر
امن الدولة سيفعل ماهو اسوء فى الايام المقبله وده اللى لاازم ناخد بلنا منه وهيحاول يشعلل الامور اكتر واكتر هذة معركتهم الاخيرة وسيقاتلون لاخر قطرة ولابد ان نكون على قدر المسئولية وندافع عن ثورتنا وبلادنا
كلام جميل ....عايزين كل واحد يحب الآخر ويحس أن الآخر أخوه وأنه فى مركب واحد معاه لو غرق المركب هيغرقوا سوا.عايزين نبنى البلد مش نهدها ...وأيدى مع أيدك هنبنى مش تحس أنك أحسن منى وأعلى وأنا أقل أو مواطن درجة ثانية.صافى
http://networkedblogs.com/faCU9
مقال يستحق القراءة
علاء الأسواني يفسر لأصحاب ستوكهولم سيندروم شفيق ياراجل
ليه قرر ان لا يكون من العبيد اللي ملوكها عبيد
شكرا يابن الأسواني
أثر في مقالك بشده وعرفني ليه حبيت منطقك ولم ار فيه اي تجاوز بس مكنتش عارفة افسر شعوري
انا لم اسمح ابدا بإهانتي في اي موقع طول عمري ممن هم اكبر مني سنا أو كبرا أو غرورا
وعليه بحترم من هم اصغر مني سنا وربما اكثر مني علما
علشان كده لم اجد حديث الأسواني غريب ابدا
تحياتي للجميع
وقبل ما أرد عليكم اسمحوا لي أسئل لورانس العرب
ثورة مصر - 25 يناير 2011 - هل لها أي ايجابيات من وجهة نظرك؟
ده واحد
اتنين : لم تعجبني كلمة - اوهام - الفلوس اللي اتسرقت
الكلمة دي عجيبة شوية
ولا خرجت منك وانت مش واخد بالك
ولا فعلا تقصدها؟
مع احترامي لك ولوجهة نظرك
طبعا لها ايجابيات والايجابيه الكبيره انها أظهرت حجم الفساد الكبير الموجود في البلد
ومقصدي من كلمة "أوهام" هو ان الناس ينتظرون المليارات الكثيره التي تم تقدير عددها لدرجة جعلت احمد عز اغنى من "كارلوس سليم" اغنى اغنياء العالم هو ومبارك، التقديرات كانت غير معقوله وغير منطقيه- هذه هي الاوهام التي اتحدث عنها ولم اقصد بالاوهام انه ليس هناك مال تم سرقته
يعني لما أجلس عند "الحلاق" وأجده يقول لي أن مصر جمعت إلى الآن من رجال الأعمال 100 مليار دولار كانت مسروقه هانسدد 40 مليار الديون الخارجيه بعد كام يوم وهايتبقى 60 مليار دولار، ده أقوله ايه؟ بالتأكيد لازم أقوله انت عندك وهم كبير
_____
http://www.masrawy.com/News/Egypt/Politics/2011/march/8/nasr_nouba_yg.aspx
شوفي يا دكتوره الخبر ده على مصراوي
وشوفي الناس عملت ايه في النوبه في قسم للشرطه، وده فقط لكي تتأكدي يا دكتوره ان اللي هايودي الدنيا في داهيه هو تصرفات الناس
حضرتك يا دكتوره عندك "شك" اني ضد ثورة 25 يناير ولهذا سالتي السؤال الأول؟
بس أحب أقول لحضرتك اني لم أكن يوما نصيرا للظالمين
وأيضا لم اكن نصيرا لمباحث امن الدوله وقد ذقت المر على يد "محمد به حازم" في مبنى امن دولة المعادي كما ذاقه اصدقائي المقربين
وفي نفس الوقت عندما يصدر تصرف أراه لا يعجبني -ولو كان صادر من المنتصر- فأنا أعلق عليه
بس دي كل الحكايه
اولا ازيك يا دكتور يا رب تكوني بخير
ثانيا احب اقولك اني اول مرة من بداية الثورة اتششششششششششششششائم كده من بداية الاحداث كنت دايما اقول فيه امل و مصر بخير ، لكن النهارده خلاص مش قادرة افهم و لا استوعب الناس عاوزه ايه ايه الغباء ده سايبين المهم وماسكين في الهايفة رجعنا تاني لقواعدنا نمسك في الهايفة .... الحقوا امن الدولة فيه بدل رقص ... حبيب العادلي عنده برنس حريمي في الحمام .... افلام لشخصيات في امن الدولة يا تري مين ....و تاااااااااااااني مسيحين و مسلمين بعد ما وقفوا ايد واحدة في التحرير و محدش قدر يفرق بينهم و حموا بعض رجعنا تااااااااااني للكلام الفاضي و الله حراااااااااام نضيع البلد تاني
طيب انتي بتقولي كلام زي الفل و ناس كتير فاهمة و واعية بس المشكلة في الناس المتعصبة و الجهلة اللي مش فاهمين و لا لاقيين اللي يفهمهم طيب احنا ايه بننفخ في قربة مقطوعة معلش ممكن اعرف مين بيقرا كلامك غير ناس مدونين فاهمين انا عاوزه الكلام بتاعك ده يوصل للناس اللي محتاجة تفهم فعلا ازاي معرفش اكيد في حل لازم الناس الواعية توصل للناس اللي مش فاهمة توعيها يعني ايه و الناس بتهد الكنيسة يهتفوا الله اكبر هما بيحرروا فلسطين ايه الجهل ده فين الدين الصحيح اللي بيأمرنا نحافظ علي غيرنا و نحميه ، فين العقل مع الاسف مافيش عقل .
طيب افهم بقي كمان حاجة انا مش عاجبني الدستور و لنفترض ان الاستفتاء حصل فعلا و الشعب مقدرش يحقق نقطة انهم يعملوا دستور جديد اروح انا بقي اعمل ايه مش معني اني اقول اني لا اوافق علي التعديلات ان القديم يفضل زي ما هو و لو قلت اوافق يبقي انا بعمل اللي مش عاجبني طيب اروح بقي اعمل ايه يبقي النتيجة هافضل في البيت كالعادة و لا هاروح استفتاء و لا حاجة يعني سلبية تاني و عدم مشاركة .
بجد خلااااااااااااص زهقت و بقيت مش عارفة و مش عاوزه اعرف
مساء الخير يا ستوتة
من قبل قرايتى لمقالة الأسوانى
وانا عارفة
هوه عمل كده ليه
وليه احنا قولنا يسلم فمه
لأنه راجل منحاز لقيم الحق والحرية
وما دام ملتزم
ليه يخاف من أى شخص قصاده
لا سيما لما يكون بيقبض من فلوسنا
ويكفيه شرف انه رئيس وزراء مصر
وداخل التاريخ ..بهذا المنصب
بيحصل على امتيازات وتكريمات ومعلومات وفى ايده قرارات و حاجات
لا يحصل عليها المواطن العادى
وبالتالى
زى ما له كل هذه الحقوق
لنا ايضاً حقوق
مساءلته و محاسبته
وهذا ما فعله الأسوانى
بكل أدب ووعى وصياعة بصراحة
اما الغضب الذى انتابه
فدا أقل واجب
كرامة للدم النبيل الذى أريق زى محمد المخزنجى ما قال
هذا الدم النبيل له كرامة وتمن
ويجب ان يظل له محامون فى كل حين لحين حصول ذويهم وحصولنا جميعا على الترضية المناسبة
اما بخصوص ما يحدث الآن من فوضى
فأعتقد يا ستيتة انه امر طبيعى
غير مقبول اكيد
ومخيف
لكن مقصود
بث الرعب والفرقة
وانتقام امن الدولة
حصلت ف تونس واتلمت بعد فترة
لكن مصر اكبر من تونس ف تعقد الجهاز دا وتوغله فى كل مكان
اللذين يملئون الشوارع بالبلطجة والفوضى والترويع ..هم الغوغاء
دهماء الثورات
ومنتفعى الفوضى و مرتزقيها
ليهم وقت
وهيتلموا
بعد لملمة اسيادهم
عندى امل فى ذلك
زى ما حصل فى كذا مرحلة سابقة
من الثورة وما تعرض له اهل التحرير وغيرهم من ثوار فى كل مكان
التمن ؟
غالى
مقدرش اقول غير انه غالى قوى
دم وخوف وفوضى
لكن ...
فاتورة ولازم تندفع
اسأل الله ان يخرجنا منها على خير
ويبقى التعب بفايدة
وميروحش هدر
وظنى ان ربنا معانا
قادر
كريم
روقى يا ستوتة
دنتى الواحد لما بيلاقى روحه رومانسى بعبط وبلاهة كدا ..
بييجى عندك
يعقلها ويستفها
فبيطمن ...
خير
ان شاء الله خير
خالص ودى يا حبيبتى
يسلم بؤك يا استااذ خليفه ههههههههه
وربنا الله ينور لسنا دلدل وقال بهرنا العالم وهانيجى فى نص السكه نبتدى نتلفت حولينا يارب يألف بين قوب اهل مصر كلهم
ويوحد كلمتهم وينور بصيرتهم يارب ويرد كيد الحاقدين ولاد الكلاب لنحوريهم يارب اللهم امين
على فكره يا دكتوره
انا بيجيلي رسائل من أصدقائي على الموبايل -وهم من المقربين- او كانوا من المقربين- بيتريقوا عليا ويقولوا لي "اخدت كام من حسين مجاور اناهردا" في إشاره منهم لما أقوله وانا واقف معهم
مع الاسف يا دكتوره اللي عنده استعداد انه يخون صديق العمر ويسخر منه بهذا الشكل الطفولي لا غريب عليه ان ينزلق في الفوضى
والحقيقه قد اعددت حلقه مخصوصه للرد عليهم وهم أقرب الناس وعلى علم تام بما حدث لي في الماضي، لكن هذا لم يمنعهم من السخريه لأن الآراء مختلفه، وتم تصنيفي على أنني "تابع للثوره المضاده" ولولا اني غير مشهور ولا يعرفني أحد لأنزلوا صورتي على الفيس بوك وقالوا "الخائن أهو"
ولا اخبي عليكي سرا أن عندي اختلاف كبير في وجهات النظر مع أخي الاكبر دفع اصدقائه إلى مناداتي ب "مبارك" في الطريق!
1- من كتاب الأمير - نيقولا مكيافيللى - تعريب وتقديم / خليل حنا تادرس - الناشر مكتبة النافذة :
ص78 :
وهذا ما تبين لنا سيدى الأمير ..
أن الرغبة فى الامتلاك ، غريزة طبيعية ، وشىء مألوف ، وعندما ينجح هؤلاء القادرون - على الإمتلاك - فإنهم يلقون الثناء دائماً ، ولا يعيبهم اللوم ، أما إذا كانوا عاجزين عن ذلك ، ورغم عجزهم ، يريدون الإمتلاك مهما كان الثمن ، فإنهم يقترفون خطيئة تستحق أعظم اللوم .
2- ومن مذكرات الفريق / سعد الدين الشاذلى ( رحمة الله عليه ) ... مقولة احفظها عن ظهر قلب ... والكتاب ليس فى متناول يدى الأن :
هناك خفايا فى السياسة المصرية لا يعلمها أقرب المقربون إلى السلطة .
قال هذه الجملة وهو رئيس اركان حرب القوات المسلحة المصرية إبان حرب أكتوبر المجيدة .
ثم :
هناك مقولتين أحفظهما عن ظهر قلب أختارى منهما ما يناسب ما نحن فيه :
الأولى :
عندما تبدو الأمور أروع من أن تكون حقيقة ... غالباً ما يتضح إنها حقاً درباً من دروب الوهم .
الثانية :
There are two great tragedies in life , The first is , You don't get the thing you want in the most of life , The second is , to get it .
اللهم أرنا الحق حقاً وأرزقنا إتباعه ... وأرنا الباطل باطل وأرزقنا إجتنابه .
طولت ف التعليق ... بس ممكن اكون عايز افضفض ... ومبلقاش كتير فاهمنى زى حضرتك ... للدرجة انى قارفك معايا وكأنك أتبنتينى ... هههههههههههه
ستيتة : يا غلبك يا ستيتة هو انا ناقصة .
لو سمحتي اقترح القيام بحملة توعية وتصميم شعار لها وليكن
مثلا
علشان أساسا لو رفعنا قواعد البنيان صح مش مضطرين تاني نطالب ونرفض ونقبل
او تشتركو انتم كمدونين في ابتكار جملة مؤثرة
وننشره كلنا على فيس وتويتر وبلوجر
اه هو ممكن يكون ابرة في بحر بس بردو لازم مانسكتش لازم نحاول نعمل حاجة على قجدر استطاعة كل واحدة ولا نستصغر من المعروف شيء
بجد لازم لاني حزييييييييييييييييييييييييييييييييييييينة
أفتكر يا فندم
الرد على كل التساؤلات دى فى عنوان المدونة بتاعت حضرتكى
( لا أعرف أسباب النجاح .. ولكننى أعرف أول أسباب الفشل " محاولة إرضاء كل الناس )
أهو الخطة بتتنفذ حالياً
خطة انتقام أمن الدولة و بتعاون من قيادات كنسية
اللي هدم الكنيسة في أطفيح و استخدم بلدوزر المجلس المحلي هو امن الدولة و ثبت إن اللي كان بيحرض الـ19 فرد اللي هاجموا الكنيسة هما 2 واحد مخبر أمن دولة و التاني عميل لأمن الدولة
و اللي قتل 2 مسلمين في أطفيح علشان يولعها هو أمن الدولة
و كل الناس في أطفيح سواء مسلمين أو مسيحيين ضد اللي حصل ده و متأكدين إن اللي ولعها في الناحيتين هو أمن الدولة
و اللي ولع خناقة طائفية في منشية ناصر هو أمن الدولة
و البابا شنودة بيتعاون مع مخطط أمن الدولة بسكوته المريب ده على مظاهرات طائفية بينما كان بيمنع المسيحيين من المشاركة في مظاهرات الثورة الوطنية
و إستخدامه للقساوسة و الكهنة لحشد مليون من مسيحيي الصعيد لتصعيد المظاهرات
و قطعهم للطرق و إثارتهم للبلبلة
لابد من سرعة حل جهاز أمن الدولة و إعتقال كل أفراده من أكبر لواء لحد أصغر مخبر و يتحاكموا كلهم و مش حتلاقوا واحد نضيف فيهم و ما خالفش القانون
كلهم مجرمين و لما يترموا في السجون و نخلص منهم كلهم ساعتها نشتغل على نضافة في بناء البلد تاني
و البابا شنودة اللي مش عاجبه الإفراج عن قسيس كان مدان بتهمة التزوير و عمال بيصعد المظاهرات علشان يسترجع وضعه أيام مبارك لما كان دولة داخل الدولة و شخص فوق القانون لازم يتلم يا إما يتحاسب بالقانون
http://www.shorouknews.com/contentdata.aspx?id=404792
دي وجهة نظر اهل القرية نفسها
على كل الموضوع ده حينتهي لان لفيه ناس كتير عاقلة من المسلمين عارفين ان البابا مش اكتر ذيل من ذيول مبارك مصلحته ان مبارك يرجع علما ان بكلمه منه القساوسة اللي في ماسبيرو كل واحد حيتلم ويعقل ويبطل مطالبات غير طبيعية زي الافراج عن اب مزور محكوم عليه 5 سنين في تهمة جنائية , حتى بعض مشايخ السلفية ( علما انهم معدودين ضمن الاكثر تشددا على الاطلاق راحوا للشباب بتوع كاميليا وفضوا اعتصامهم )
يعني انشاء الله حتعدي على خير بس اللي مهمش فاهمينه انهم خسروا تعاطف فئة كبيرة من الشارع مش حتصدق بعد كده حكايات الوحدة المهلبية , ولا ايد واحدة ولا رجلين , يمكن دي من تمييز النخالة اللي الثورة دي عمالة تعمله في الناس
ممكن رأيي ميعجبش حد بس دي الحقيقة زي ما انا شايفها اذا كان امن الدولة هوه السبب فهما الوسيلة واي حد يستجيب للاثارة ايا كان يبقى متورط في الفعل
يولد الامل من رحم الالم
الدكتورة الفاضلة ستيتة
قرأت حوارك مع الأستاذ لورنس العرب ، و قرأت شكواه من زملائه ، كما قرأت وجهة نظرك من الفريق أحمد شفيق و إعجابك بعلاء الأسواني .
1- بدايةأستطيع أن أقول أن ما يشكو منه الأستاذ لورنس مرده لغياب ثقافة الحوار من مجتمعاتنا العربية و التي تقوم على أساس أنه إذا كان هناك رأي فلابد أن يكون هناك رأي آخر ، بالتحاور و التفاهم يمكن أن يلتقى أصحاب الرأي في منطقة وسط و إذا استمر الخلاف فتبقى على الأقل صيغة الاحترام ( لا الاتهام ) بينهما.
2- بالنسبة للأخ علاء الأسواني و الفريق أحمد شفيق ، أعتقد إن علاء نفسه لن يقبل أن يتحدث معه كائناً من كان بهذا الأسلوب السوقي ، و هذا كان اعتراض الناس ، أي إذا كنت صاحب حق فيجب أن تكون صاحب منطق و أدب.
3- أنا شخصياً لا أعرف لماذا ثار بعض الناس على شفيق و لماذا هللوا لشرف ؟ لأن معايير الحكم على كل مسئول ، من وجهة نظري ، بما أنجزه و على هذا فلا الأول أخذ فرصته و لا الثاني رأينا منه شيئاً بعد ، و كل ما قيل في الحالتين ما هو إلا ترهات و أهواء شخصية بدليل أنك لو سألت أي مصري من الـ80 مليون ماذا تعرف عن شفيق أو شرف فلن يكرر أكثر من جمل إنشائية منقولة من الأخبار أو النت ، أما المعرفة الحقيقية فلا يعرفها سوى من كان قريباً من الشخصيتين.
أدعوك و الأستاذ لورنس لقراءة مقالي المنشور تحت عنوان " أنتم خونة وعملاء " و الذي له وصلة على مدونتي.
آسف على الإطالة
من اهم الفروق بين القيادة والإدارة أو بشكل أدق من اهم ما يميز القائد ويثبت نجاحه ويميزه عن اى قائد هى قدرته على خلق قادة جدد ، لم أشاء البحث والتنقيب سواءً فى كتب تناقش هذا الموضوع أو عن طريق محركات البحث ، لصياغة ما اكتب ولكنى اكتفيت بالمفهوم فقط ، فالوقت لم يعد فى صالح اى حد ، الوقت الان يشبه مخلوق خرافى شره يلتهمنا جميعاً ولا يجد امامه اى قائد ليلتف حوله الناس لمواجهة هذا المخلوق ، ان من أكبر الجرائم التى فعلها النظام السابق هى عدم وجود هذا القائد الان ، فالنظام لم يصنعه ان لم يكن لم يحاول صناعته ، وسأستعير جملة من احد مقالات الدكتورة ستيتة وهى ان النظام السابق نجح فى تشويه اى ايقونة او اى رمز تلتف حوله الجماهير ، الثورة غليان ، إذابة لمعادن نفيثة لكى تتبلور بعد ذلك حول سبيكة جديدة أقوى وأنفع وأجود من كل المعادن المكونة ، ولكن آلا تحتاج هذه المعادن ان تكون بنسب ، وسأستعير ايضاً ... آلا تحتاج الخلطة الخرسانية الجديدة الى نسب محددة من زلط ورمل واسمنت ومياه ، سواءً كنت تصنع سبيكة او تصنع قواعد خرسانية او تبنى قواعد المجد ( وقف الخلق ينظرون جميعاً كيف أبنى قواعد المجد ... وحدى ، سيد : والبشرية دى كلها ممدتش ايديها معاكى ليه ... الخلق جميعاً كانوا مهندسين اشراف ) المهم... سبيكة ، خلطة خرسانية ، اياً تكون التعبيرات المجازية ، فلابد لوجود مهندس لعملية البلورة هذه ، قائد يبلور كل هذا الوجدان ، ويا آسفاه لقد كشفتنا هذه الثورة جميعاً أمام أنفسنا ، وسأستعير ايضاً احد التويتات (مستفيد مادي.مستبد سلطوي.مسيطر ديني.رعديد إقليمي.أجندة خارجية.صباع صهيوني..وعاوزينها تنجح زي السكينة في الحلاوة؟الحرية غالية لطالبها يدفع بقى ) ... وكلنا بنحب مصر ...!
كنت أنتوى ان اكتبها كبوست وفوجدتها تقريباً كلها استعارات ... فلم أجد لها مكان الا ك كوكمنت عند حضرتك ... هههههههه
المشكلة ان الافكار والكتابة الوقت مش بتسعف الواحد ، لأن اللى بيحصل عايز واحد دماغه فيها بروسيسور 500 جيجا هرتز .
لم تكشف الأمور عن وجهها الأسوأ بعد
اااااه ياامي
قلبي واجعني من كتر الكلام والمناهدا واني افهم
بجد تعبت
انا مش يئست
بس تعبت...تعبت اني بتكلم ولا كأني فالهوا
ربنا بجد مع صناع القرار اللي عوزين يوفقوا مصر علي رجلها
مليون حاجه عليهم
ياااااااارب
انتا الوحيد اللي بنترجاك
ساعدنا يــــــــارب
لا طبعا مينفعش.
معاكى فى كل الكلام اللى قلتيه
بس أنا عاوزة أفهم حاجة مين اللى هيعمل الدستور الجديد ده دلوقت
فى ناس بتطرح انتخاب جمعية تأسيسية .. طيب مين اللى هينتخبها ؟؟
حاجه تحزن والله
مش قادره استوعب اللى بيحصل
بعد ماكنا مثل اعلى وقدوه لكل الدول
هنخلى اللى عايز يتكلم يتكلم
بجد صعبان عليا ان دم الشهدا يضيع هدر على خلافات تافهه
وعلى حاجات احنا عارفين انها مدبره عشان توقع بينا
بجد حراااااام
ازيك يا ستوتة
والله حاجة تحزن ..
اللهم اهدى قومى فهم لا يفقهووووووووووووووون
إرسال تعليق