مصر والتجربة المالديفية

نط في عيني وأنا داخلة الفيس بوك
وأنا نادرا ما أدخل الفيس بوك
بوست عن جزر المالديف أو دولة المالديف الإسلامية
والصورة التي بأعلى للتدليل على نجاح السياحة الإسلامية الرشيدة!!
حيث الدولة تطبق الشريعة وتمنع الخمر والميسر والدعارة
ومع هذا سياحتها مزدهرة ومعندهومش حجج المصريين
و28% من الدخل القومي المالديفي من السياحة الشرعية
وإنتوا يا مصريين خايفين ليه؟
بصوا على السياحة الشرعية حلوة إزاي؟
حتى ظننت أن الحرية والعدالة سترسل بعثة اخوانية
لدراسة التجربة المالديفية
ماهي الإخوان أرسلت بعثتين واحدة لتركيا والتانية لماليزيا لإستيراد التجارب اللي على المزاج
وطبعا كل ده من ال 7% اللي بياخدوها من دخل الإخواني


الغريب إني رفضت أرد على الفيس بوك
دي دولة إلكترونية ضاربة والله
فقد جمع تويتر ما تبقى من العقول ولم يتبقى - لأغلب - حسابات الفيس غير المهلبية
دولة الفيس بوك تجيب الأمراض من زناخة العقول
دي تجيب المرارة من انتهاج افرادها مذهب شارع اتجاه واحد
إن كنت رايح فإنت رايح بس
وإن كنت راجع ممنوع تروح تاني
جمهورية فيس بوك خطر على الصحة الإنجابية

حبيت أرد هنا لسبب بسيط
المعطى لا علاقة له مطلقا بالنتيجة
بتستدل بالمالديف على مصر؟
وبنجاح السياحة في ازدهار الدخل القومي؟
وبتصقف وتهلل مع إن الموضوع حمادة تاني خالص؟

جزر المالديف
1- جزر .. أي والله
2- تعدادها الكلي 300ألف نسمة
3- المسلمين بها 100% من السكان ولا يجوز لغير المسلم أن يكون مواطن مالديفي حسب المادة 9 من الدستور
العاصمة يقطنها 60 ألف نسمة "شبرا يسكنها 9 مليون نسمة على أقل تقدير"
ومساحة الجزيرة العاصمة "مالية" اتنين كيلو متر في كيلو متر وبها ونعمت ..



ده مش معناه اني بحارب شرع الله ورسوله وعليه بفند الدلالة بجزر ولا لينا أدنى علاقة بيها
ولكن لا يجوز القياس جملة وتفصيلا ويطلع البوست أو زي ما يكون اسمه على الفيس ويقول السياحة 28% من دخل "دولة" المالديف المسلمة
وعلشان ندلل على إن السياحة مش محتاجة خمرة ولا قمار ولا دعارة نجيب مثال من جزر المالديف!!
بس دي جزر ومعندهاش تاريخ ولا حتى جغرافيا
قدرتين فول من منقد الناصرية على كام قرص طعمية يأكلوا السكان ويفيض
طبيعة السياحة بها مختلفة تماما عن مصر ..فين المقارنة هنا؟
يعني دولة لا تشبهنا جغرافيا ولا سياسيا ولا تعدادا ونقول لرواد الفيس بوك
هاي تكبير .. الله أكبر؟؟؟؟؟؟؟؟؟؟؟؟؟؟

ثم ان السياح لا يأتوا لهذه الأسباب إلى مصر ..
الدعارة .. الخمر .. الميسر
مؤكد هم يعرفوا يتصرفوا في بلاد تانية كتير
ومش بيجيوا علشان نتحرش بيهم ولا نطلع عينهم في طرق تجيب أجلهم وزبالة واستغلال
والله أنا بقدر فيهم مجيئهم لمصر اساسا وهي ما يعلم بحالها وبنيتها التحتية غير رب العالمين

لكن اللي أنا متأكدة منه
أن السائحين لن يأتوا إلى مصر
1- إذا كانت غير مستقرة والأمن فيها بعافية

2- إذا كان السائح يدخلها صغنن كده حلو فرحان بشبابه ويخرج منها بلقب جاسوس بعد ما يزور فرج
"فرج رع" زمان كان مسئول التعذيب الخاص بالمصريين
دلوقت بقى متربص لأي أجنبي يمسكه الفنان المثقف الواعي عمرو مصطفى

3- عند وجود ترجمة لتصريحات نوابها المنتظرين السوقية والعنيفة والغشيمة
والتي أقل ما توصف به واحد شاف السلطة أنذهل

4- لما السائح يسمع شيخ مرشح للرئاسة بيقول له بالهوادة واللين والضحك على الدقون
"تيجي يا حبيبي يامراحب أهل البيت يامراحب .. تجيب خمرتك في شنطتك .. تسكن فيلتك .. ان شا الله تعمل حفلات جنس جماعي طالما بعيد عن المصريين اللي ها نكبت حرياتهم ولا ها نقول لك حاجة
عاوز قصر وله شاطيء خاص؟ خوووووووووووود
عاوز دلع عيني دلع بس معزول عن المصريين؟ خووووووووووووووود"

هنا فقط لن يأتي سائحين
السياحة في مصر تشكل 31% من جملة الدخل القومي التعبان
3 مليون مصري يعملون بالسياحة ويعولون حوالي 18 مليون مصري
وقوت المصري لا يجوز أن يخضع لمخدرات انتخابية عبيطة
إشتغلوا بصمت على تحسين حالنا نحن الشعب ذا الدخل المنحط "اصل متدني لا تفي بالمعنى"
وبطلوا تخوفوا اللي جوا واللي بره

عارفة إن المصري عمره ما راح المالديف
ده عمره ما راح سينا إلا فواعلي
ولذلك سهل جدا يكلموه على روعة تطبيق الشريعة في المالديف
وتغيير دفة السياحة في مصر من سائحين أوروبين لسائحين ماليزين!!

كفى لعبا بعقولنا ومقدراتنا يشيلكم ويحطكم في جزر واق الواق

صورة من جزر المالديف ونلاحظ فيها
القصر الخاص اللي نعمل فيه اللي عاوزينه
وبعد كده تطلب زي ما تطلب