قبل وبعد

قبل 25 يناير: كان ضرب النساء في المظاهرات أمر غير طبيعي
وكما قالت منى سيف إبنة ليلى سويف: ماما كانت ترمي نفسها بين القوات والمتظاهرين علشان تنقذ الشباب من الإعتقال..لأنهم لما بيجدوا ست مش بيضربوا غير لما تيجي لهم الأوامر وبيتلخبطوا

بعد 25 يناير: ضرب الستات عادي خالص
مساواة تامة بين الدكر والولية
مصر بتتغير والنخوة كمان



قبل 25 يناير: القبض على البريء يتم قبل الفجر
يُنقل لمكان مجهول
عادة يكون بدروم مقرات جهنم الحمرا الشهيرة بأمن الدولة
وهناك يلقى البريء من مكفرات الذنوب ما لا عين رأت ولا أذن سمعت ولا يخطر على وعي بشر
وتُمارس ضده السادية الممنهجة حتى يخرج بنصف عقل ونصف تسامح ونصف وعي ونصف إرادة - ده لو كان جدع قوي وربنا رابط على صدره

بعد 25 يناير: القبض في أي وقت
والتعذيب في الشارع
والقتل علني
وهتك العرض رياضة
واللي في قلعه حاجة ينفضه
واللي يعرف أبويا يروح يقول له



قبل 25 يناير: السجين السياسي يخرج مكسور
ويستمع لقصته عدد محدود من الجيران والأصدقاء
منهم من يلعن مبارك ونظامه سرا ويظل على علاقة بالمظلوم
ومنهم من يقطع صلته بالمظلوم وعائلته إيثارا للسلامة
ومنهم من - لا يُرى بالعين المجردة - يتضامن مع المظلوم في قضايا حتى نهاية الخط دون خوف ولا حساب لتهديد

بعد 25 يناير: لم يصبح عدو مبارك هو صديقي
فخرج المصري بمصطلح "يستاهلوا" للي خلوا له صوت ينطق
إيه اللي مخرجهم من بيوتهم" .. للبنات اللي على مقياس الرجولة أعلى منهم بكتير"
و"مش لابسة حاجة تحت العباية" .. لأن قرون محفوظ عبد الدايم خالدة الذكر
البلطجي حتى لو تم القبض عليه ميجراش حاجة لو انضرب
ومين اصلا علم البشر إن مش من حق حد يضرب مواطن حتى لو بلطجي


قبل 25 يناير: كان شهيد البلطجة الأمنية تقريره محفوظ
هبوط في الدورة الدموية
لفافة

بعد 25 يناير: مازال شهيد البلطجة الأمنية والعسكرية يحاولون أن يكون تقريره محفوظ
هبوط دورة دموية
لولا ثوار ومحامون صامدون وأهالي مكلومة تستطيع أن تنطق بعد الثورة



قبل 25 يناير: كان الكذب يتم عن طريق صحف قومية ومحطات مصرية وبعض المعارضة المستأنسة
فين أيام تعبيري سرايا الله يحرقه بجاز

بعد 25 يناير: الكذب والتزوير والقذف يتم عن طريق صحف قومية
ومحطات مصرية منعت الثورة بعض الوجوه من الظهور عليها..فلما خمدت النيران فقست الوجوه الشائهة قنوات فضائية موجهة من الخرائر واللوامس والعواكش والعناكب
وصحف لا كانت معارضة زمان ولا معارضة دلوقت..دول اللي بابا وماما علموهم من أين يؤكل الكتف



قبل 25 يناير: كنا أمنين
والبلطجية محدودي المكان والزمان
عادة بيشتغلوا بجدول معروف بينهم وبين اللي مسرحينهم
واللي مسرحينهم بيقسموا معاهم واللقمة سخنة واتعشت
وممكن تخرج من بيتك وترجع!! .. اه عادي والله
وممكن تركن عربيتك بليل وتنزل تلاقيها الصبح!! .. بجد متستغربش

بعد 25 يناير:
المانشيت الرئيسي: الشرطة تنتقم من الشعب الذي انتقم منها فتطلق كلاب البلطجية في عموم أرض مصر المحروسة
تذهب لتحرر محضر فيقول لك حامي القانون خلي الثورة تنفعك
فتتحول لمصر المنهوبة مصر المقتولة مصر المذعورة
وننسى محاكمة المخلوع وثلته الظالمين ونتمنى الأمن ونطبطب على القتلة أصلهم مأموصين
واشتهر هذا العصر بسيستم الأستك
اشد البلطجي يومين الإنتخابات بالأمر
اسيبه بعدها بساعات
اشده يلسعني اشده يلسعني



قبل 25 يناير: مكنش لك صوت
لا حقيقي ولا انتخابي

بعد 25 يناير: لك صوت
بس مش طروب
علشان طول الخرسة أدى لحشرجة وتعثر في الغناء بالميلودي الواعي



قبل 25 يناير: تشوف واد بشعر طويل يركبك ستين عفريت
وتحب تفهمه معنى الرجولة اللي ابوك بثها فيك "كتك نيلة إنت وابوك"

بعد 25 يناير: تشوف واد بشعر طويل عندك موقف من اتنين
يا إما يمر عليك عادي بصفته مواطن من جيل افضل من جيلك وجيل اللي خلفوك
أو تسكت وإنت متغاظ وبتطنطن أدي اللي خربوا البلد..أدي العيال بتوع التحرير
وبتسكت طبعا لحسن يديك كبنش يخلي معالم وشك دافئة ممطرة شتاءا
لأن أغلب الشباب الآن مستثار ومش طايق الذبابة الملعونة تيجي ناحية شرفه ويقينه



قبل 25 يناير: أي واحد بيهاجم مبارك أو يعارضه يصبح في نظرنا عاقل بالغ راشد ثائر
من الأخر فلة ياروحي

بعد 25 يناير: كل الناس بقت وحشة
إما
إكتشفنا إنهم رعاع في ثوب علماء
أو يخالف أيدلوجيتنا وحبيبك تبلع له الظلط وعدوك تتمنى له الغلط
أو فعلا سفيه وكان بينه وبين مبارك تضاديات فاعتبرناه عاقل
أو لاعب على كل الحبال وفي بعض الأوقات بعد الثورة مكنش ينفع فانكشف وبانت سوءته



قبل 25 يناير: كنت حزينة على مصر جدا
لكن سعيدة في المجمل جدا
مرتاحين وعايشين في طراطير الطراوة

بعد 25 يناير: خايفة على مصر جدا
وجيش مصر جدا
وعيال مصر جدا
وارض مصر جدا جدا جدا
وعايشين فوق صفيح ساخن



قبل 25 يناير: سرقنا مبارك
استهان بنا مبارك
قتلنا مبارك
سرطننا مبارك
ودانا في داهية مبارك
نام وينام وسينام في الفايف ستارز مبارك
فساد في السلطة التشريعية والتنفيذية والقضائية والمؤسسة العسكرية

بعد 25 يناير: قتلنا المجلس
استهان بنا المجلس
الثورة المضادة اسمها إيه يا ولاد؟ المجلس
بيخاطر بمصر لمصالح خد منها اللي يكفي عشر اجيال من عياله .. المجلس
فساد في السلطة القضائية والمؤسسة العسكرية وتناحة وبلادة بالسلطة التنفيذية
أما التشريعية ربنا يحينا ويعوض علينا عوض الصابرين الآملين



قبل 25 يناير: كنا نتألم لاضطهاد الإخوان كما نتألم لاضطهاد أيمن نور
ولا نطيع في مصري حسني قط

بعد 25 يناير: نتألم من كِبر الإخوان وجهل السلفيين وعودة المجرمين بتوع الجهاد
ونطيع في المصري أي مجلس معدي
أي وقيعة مفتعلة
أي إعلام موجه
أي شيء سيء حتى لو قيل أيام المخلوع
نفرح لخروج بعض المسجونين السياسيين ونخشى في عصر آت أن يكون كل الشعب أسير



قبل 25 يناير: كنا لا نأمل أن نصل للحرية .. الكرامة .. العدالة الإجتماعية

بعد 25 يناير: حسب الأحوال
شوية نقول مش ها ننضرب تاني مش ها نتهان تااااااااني يالهوييييييييي وزغردي ياإنشراح
وشوية نقول عشانا عليك يارب وعظم الله أجركم في الثورة
وشوية نقول لا تموت ثورة وراءها شباب لا يساوم على تحسين شروط العبودية ولكن يموت فداءا حتى ينهي آخر عصر عبودية



قبل 25 يناير: المصري كان
لا يعرف .. لا يتكلم .. لا يفكر خارج الدائرة الجهنمية بتاعة لقمة العيش
مغيب في فياجرا ومخدرات ومظهرية دينية لا تبلغ مطلقا جوهره وهو يرشي ويرتشي تاني يوم الصبح

بعد 25 يناير: المصري أصبح
بيعرف رغم أنفه .. بيتكلم بسيولة تستلزم لاصق أمير .. يأمل لكن بحذر
يخلد للأرض غالبا
يستسلم لأي حد يحكمه ويمني نفسه إنه الخير إن شاء الله وكان فيه حاجة إن شاء الله
الحكم فيها لمن غلب .. الحكم فيها لمن غلب
ومؤخرا يطبق أغنية سهير الباروني وأنا عاملة نفسي نايمة وأنا عاملة نفسي نايمة



قبل 25 يناير: كان عدو مبارك هم كفاية .. الجمعية الوطنية للتغيير .. 6 إبريل

بعد 25 يناير: عدو الشعب كله هم كفاية .. الجمعية الوطنية للتغيير .. 6 إبريل
الشهيرين حاليا "بالطرف الثالث"



قبل 25 يناير: كانت المُغتَصَبة ملومة وخائفة وحزينة ومنكسرة ومتخفية

بعد 25 يناير: مازالت ملومة وخائفة وحزينة ومنكسرة ومتخفية



قبل 25 يناير: كان فيه رشوة وكذب وتدليس وشهادة زور
وتدين مظهري وشغل حكومي من قفا الإيد وعلى أد فلوسهم
وجهل وفقر ومرض

بعد 25 يناير: زي ما إحنا
الثورة مبتغيرش نفوس