إسم الله عليكي يا مصر

لما دول ينزلن في ثورة 1919
ثم يعشن زمنا طويلا لمحاولة الحصول على حقوق بديهية وحريات آدمية

ولما دول يصدقن عبد الناصر
وينزلوا يقاوموا المعتدي في بورسعيد 1956
وياخدوا ضرب نار في المدارس
ويدخلوا جامعات ويتعينوا في الحكومة ويبقى منهن سفيرات ووزيرات

مينفعش حد يقول لي المعيدة إيه نزلها
مينفعش حد يقول لي مين يهتم بقضايا الوطن ومين لأ
مينفعش حد يزايد على حد في الوطنية ومطالب التحرر

ومينفعش إن بنت بلدي تتكلبش في سرير وهي متكسرة
لأنها بائعة شاي ومن ملح أرض مصر
هي و17 مصري يتكلبشوا في سراير مستشفى باب الشعرية
وحسني مبارك يرفل في حرير المركز العالمي
دي جيوش الأعداء معملتهاش
ده الإستعمار معملهاش

ومينفعش الإتنين دول يؤخذ منهم
ومينفعش يكون بتاع معهد الخدمة الإجتماعية بدرجة مقبول
وبتاع ياواد يا مؤمن
هما وجهي الثقافة والدين للشعب المصري

كلما نزلت للشارع واتوجع قلبي في المناهدة مع الناس أقول ها أكبر دماغي
لا دماغي بنت اللذين بتطاوعني
ولا قلبي بيجمد على بني وطني

يا ناس بنكلمكم على حق ها تحتاجوه بكرة
بنقول لكم إن الإنسان "كما خلقه الله وكرمه" له حق المعاملة الكريمة
لا يوجد دين ولا عرف ولا قانون يسمح بضرب الناس
بتكسير عظامهم
بخرطشتهم
بقتلهم
بعدم علاج مريضهم
باحتقار فقيرهم
بانتهاك طفولة أطفالهم
لا يوجد
ده حتى العدو مطالب باتباع القوانين الدولية
وفي ديننا ماهو أرقى من أي قانون دولي

مينفعش متقدرش تكسر إرادة فتاة فتهددها "وهي الشرقية" بالإغتصاب
عيب لما تخليها تسب نفسها بأقذع الشتائم بسادية
عيب لما تخلع حجابها في مجلس الشورى وفي الشارع وفي السجن
مينفعش كشعب أن لا تؤازر أختك لأنك
1- تخليت عن إحساسك بآدميتك
2- خايف تؤازر فتضطر أن تدافع عن الشرف والعرض

مينفعش عزة ذات ال48 ربيعا تكون أكثر نخوة منك وانت بكامل الصحة والشباب
مينفعش نرجع تاني نقول البنت تخرج إمتى وتخرج ليه
وتاخد من غطرستك وجهلك بتاريخ بلدك الإذن حتى تتضامن معها بعد خروجها
فشرت إنت وشيوخ السلطان واللي يتشدد لكم

أخيرا
عندما قالت المرأة وامعتصماه
لبى ندائها المعتصم لأنه
1- عارف إنها أيدلوجيا تبعه؟
2- لأن عنده غيرة ونخوه وهي أخته دون دفع اشتراك الجماعة الشهري؟
3- لأن البرهامي وعاصم عبد الماجد مكنوش صاحيين؟

يكفيها شرفا أنها مسلمة
ويكفي المعتصم فخرا أن يُذكر في التاريخ حتى قيام الساعة
ويفتح الله الأرض له في الدنيا
ويشكر له في الآخرة

أنا على يقين أن البنت "مصر" مش ها تعلن عن شخصيتها
مش علشان خايفة
اللي بينزل هناك ربنا - بشكل إعجازي - بينزع من قلبه كل معاني الخوف
هي لن تظهر لأن اللي أعتدى عليها مش مستعمر
واللي قذفوها وخاضوا في عرضها مش أجانب
دول غالبية مؤلمة من شعبها
حقا لها أن تحتقر الوجوه وتندم على النصرة وتحزن على ثورة أمل