صعود إلى الحرية

لن أمل وضع فيديوهات لكم
مش علشان عاوزة أوجع قلبكم
لكن خايفة عليكم جدا
من لا ينكر منكر ولا يحق حق ولا يحمي حمى أوشك أن يُخسف به
من لا ينكر منكر ولا يحق حق ولا يحمي عرض يعرض نفسه لذات الفعل
كل منا لا يخرج ولا يثور ولا يغضب إلا إذا مست النار حماه
خايفة عليكم وكتاب الله

في اللحظة دي ناس بتحب مصر رايحة تستقبل الدكتور أحمد حرارة
كان نفسي أكون معاهم لكن كالعادة في الوقت ده من الترم لازم أكون مع ابني
حزينة جدا على فشل عملية أحمد حرارة
سافر لفرنسا وعمل عملية لكن قدر له الله أن يفقد عينيه فداكِ يامصر
زاره عبد المنعم أبو الفتوح علشان يرفع روحه المعنوية قبل السفر
فخرج عبد المنعم هو مشحون بالأمل
ده الشيء الموجود في الحالمين المصريين واللي كتير مش فاهمينه
الناس دي مش خلايا تمشي على قدمين إن أتلفت الخلايا ذهبت الفكرة
الناس دي يقين ماشي على قدمين .. مين يقدر يحارب يقين؟؟؟
صعود


رضا عبد العزيز خرج ألمانيا يعمل عملية في عيونه
عملوا له عملية في عينه الشمال
وقالوا له - في بلاد الإفرنجة - عينك اليمين مش موجودة
أه وكتاب الله المجيد
الراجل فوجع
الموجود مكانها عين صناعية!!!
خدوا عينه في الدمرداش
عملوا له عملية ومحدش قال له وضعنا لك عين صناعية
ولا قالوا لأبوه ولا كتبوا تقرير ولا أعلنوا عن تصفية عينه
دول يعاملون الناس دوكهم في بلادنا على أنهم صفر كبير
لأن دول أوباش عندهم كرش كبير
في بلدنا ناس تاخد عينك برصاصة
وناس - لو أحسننا النية - تاخد حقك في المعاملة الآدمية بفظاظة لا يُعاقبها قانون
دول ناس في بلدك لم يصلهم بعد إن مصر بتتغير
هبوط





النهاردة الصبح خرج علاء عبد الفتاح
وتحية للضغط الإلكتروني
والمسيرات
والبرامج الشريفة اللي مسمينها الآن برامج سكب البنزين على ولاد ما يربط بالأبزيم
لا يموت حق إلا بكسر الروح
والروح لا تموت .. ولا تشيخ
مش كنا قلنا لقد هرمنا؟
طب ضحكنا عليكم فلفل شطة
صعود


أكثر من 12 ألف مسجون بمحاكمات عسكرية
لا نعرف مين فيهم الثوار ولا مين البلطجية
أغلبهم ناس غلابة نادرا ما نعرف كينونتهم
ولا نعرف بشكل يقيني تهمتهم
وبالمناسبة حتى لو مجرمين أرفض محاكمتهم عسكريا
المخلوع مبارك نايم في اللوج
والعادلي بينضرب له تعظيم سلام
المسجونين بأحكام عسكرية مين وكام؟
طالما فاكرين العدد
وفاكرين القضية
يبقى كلهم علاء عبد الفتاح
تعرية فتيات .. وسحل شباب .. وسجن ناشطين .. وإطلاق كلاب إعلامية ودينية تُعلم الناس الخنوع والدياثة
كل ما سبق ثبت أنه لا يكسر إرادة.. فهل أنتم منتهون؟ أيوه بكلمكم إنتم يا جدو
ولك ياجدو كل إشمئزاز وإشمئناط وسب و...................... هبوط



إمبارح لميس جابر كتبت تسقط حقوق الإنسان
تسقط فين؟ تروح فين يعني؟ ده إحنا في بير السلم
الدبة وقعت في البير ومعاها تابوهات كتير
أين قتلة الثوار من يوم 28 يناير وإحنا طالعين؟
عيون المصريين؟
أعراض البنات؟
مين راكب على ضهر البلد؟ مين ماسك إعلامنا العرة؟
حقوق إيه يا أم حقوق اللي ها تسقط؟
وبطريقة عبلة كامل
نسيت تاكل نسيت تشرب نسيت تعمل الهوم ورك؟
نسيتي الصحة نسيتي التعليم نسيتي الإعلام نسيتي الفقر؟
يكفينا شرف إن لو لميس جابر وتوفيق عكاشة سلكوا جحر فار لم نتبعهم
أه والله يكفينا شرف
الناس دي لما يقولوا قول
"وهم من هم في الضحالة وبوس الإيد والتخبط"
نحمد الله أننا على نقيض تماما
صعود صعود صعود

الثورة لم تموت