- إيه اللي لسه
- ياعم لسه
بيقيمونا في سوق البني آدمين ولسه مش لاقيين حاجة تساوينا
- طب ما ده كويس يا ولية
ماهو البني آدم أغلى الكائنات والكون مسخر لخدمته وهو مسخر لإعماره
- يادي اللوك لوك .. مش لاقيين حاجة تساوينا في الرخص مش العكس
- يادي السفطسة والنيلة المنيلة .. الأخبار أسرع من سماع أي سفطسة
- أخبار إيه يا أبو أخبار
قضية خالد سعيد مر عليها سنة ونصف والمجرمين المباشرين خدوا 7 سنين
والنيابة العامة ها تفتحها النهاردة تاني..والأم صامدة زي إيزيس
هي وأخت البطران شبه إيزيس .. دول حتى شبه بعض
هي وأخت البطران شبه إيزيس .. دول حتى شبه بعض
المخبرين القتلة خدوا 7 سنين يا عم المستعجل
طب واللي سلطهم؟
- هسسسسسسسسسسسسس الحيطان لها لجان إلكترونية
- هو لسه فيه حد ها يخاف؟
- الله هو الجين المزروع من عهد سدنة الفرعون حور بتاع بيتغير بالثورات؟
- طب ما اللي يخاف ها يحصل اللي ماخفش قريب
وبعدين لو قاتل واحد - للي قاموا بالثورة ووارى الثرى أجسادهم - كان اتحاكم
كنا قلنا كله في الكلتش وفي التمام وتمن ابن آدم المصري بيغلى على مؤشرات حقوق الإنسان
وقضية خالد سعيد استثناء
الثورة بتتم عام .. ومفيش بني آدم إتحاكم .. لا اللي إدى الأمر الكبير ولا اللي خد الأمر الكبير
ولا اللي اتقسم عليهم الأمر الكبير ولا اللي سمعوا الأمر الكبير ولا اللي نفذوا "أمر الكبير"
انت فاكر يعني كنت عايش في دولة ديكتاتورية بها شلحة من الحريات المزيفة
وكنت في خطر دائم نتيجة للطواريء 30 سنة متواصلة
وإن دولة عسكر + تحالف ديني = الجنة ونعيمها إن شاء الله؟
- يا شيخة تفائلي بالخير تجديه.. وإنتي شبه الكحيت كده
ما تقلبي شويتين لعزيز بيه الأليت
مين قال عسكرية + دينية؟
جبتي منين الحلف الفاشي الديكتاتوري الهوى ده؟
يا مونشير اللي ماتوا معملوش ثورة
دول تبعوا اللي اتدربوا في صربيا.. دوسي هنا
الشعب للأسف انضحك عليه
كان عايش في الرخاء والصحة والكرامة وهو اللي جاب الفوضى لنفسه
الشعب للأسف انضحك عليه
كان عايش في الرخاء والصحة والكرامة وهو اللي جاب الفوضى لنفسه
وأغلبهم أطفال شوارع كخة .. بيسيئوا لسمعة مصر الشريفة الطاهرة
وبعدين هم ارتاحوا من الدنيا وبلاويها واللي بيجرى فيها
وأهلهم اتحينوا .. كل عيلة خدت لها بتاع 30 ألف لحلوح يعملوا بيه مشروع استثماري
دول حتى بيقولوا بيبعتوا عيالهم هناك علشان "يموتوا" وهم يقبضوا
وبعدين مصر أهم
- أهم من مين؟
- أهم من قاطنيها
- وهي مصر إيه غير شوية قاطنين فوق بعض
يعني لو فرغت مصر من قاطنيها يتبقى فيها إيه مما ذكره التاريخ؟
هو إنت مصدق إن مصر هبة النيل؟ ولا مصر هبة أهلها؟
- مصر هبة رؤوف هع هع هع
- آخر سؤال يا عزيز بيه الأليت
بالنسبة للمقال الحلزوني من الكاتب الحلزوني في الجريدة الحلزونية
هي الأخت الرفيقة نجاة دي .. "واللي بتظهر اليومين دول مع سانتا كلوز في نفس توقيت السنة اللي فاتت"
وكأن التاريخ ابن الصرمة يعيد نفسه بغباء مع مصريين الزهايمر
هي بعد ما اتكشفت واعترفت على المحرضين الكخة بتوع 6 إبريل
لسه بتجيب معلومات إزاي؟
محدش عنده بقايا خلايا نفوخ يسأل
البنت دي لو كانت متآمرة سابقة ومش أمن وطني
تجيب منين معلومات عن الحدث قبل ما يحصل؟
ألا تعقلون؟
وإشمعنى عم الشيخ أحا هو المتلقي الوحيد لوسوسة العرافة نجاة؟
علشان التعليق الصحيح الوحيد على المقال
"ثورة 25 يناير الماضية كانت في مصلحة إيقاظ المارد الإسلامي..
وثورة 25 يناير القادمة ستكون إن شاءالله في مصلحة تولي المارد الإسلامي القيادة! إن الله ينصر دينه بالبر والفاجر"
بس وأجتمع فاجر وصاحب مصالح وشاطر وأشطر ومصر بينهما
إمضاء الكحيت دائما وأبدا..أحمد خليل من البكابورت لنادر سيف الدين قناة "الحقيقة"
6 التعليقات:
دكتورة
بجد مش عارف اعلق
تسمحى لى اقول بدون تعليق
واضح ان البلد غرقت فى المستنقع خلاص
و كل اللى يجى ينقذها ياخدوه معاهم لنفس المستنقع
تحياتى
من ناحية التاريخ اللي بيعيد نفسه فالتاريخ بيعيد نفسه في كل حاجة ومش من دلوقت مثلا استراتيجية المجلس هي نفس الاستراتيجية اللي تتبعها زمان مجلس قيادة الثورة سنة 54 لما قضى على تأييد الشعب لمحمد نجيب عن طريق استمالة احد قادة الاخوان المسلمين وبعد ما قدر يقنع المتظاهرين يمشوا انقلب ناصر عليه ودبرله حادث المنشية وتم اعدامه
بعدها مظاهرات 25 مارس علشان يقضي السادات على المظاهرات وعد بعمل دستور ينص على ان مجلس قيادة الثورة ميعملوش في اي عمل سياسي
https://www.facebook.com/groups/197311623645925/?notif_t=group_activity#!/photo.php?fbid=2939785735751&set=a.2105825167258.2128084.1294400837&type=1&theater
التاريخ بيعيد نفسه بنفس الاستراتيجيات بنفس الطريقة اللي بيتم تدريسها في كليات اركان الحرب مع اختلافات بسيطة جدا .. ايه الاختلاف؟
الاختلاف ان في كل اللي فات كان الشعب على قلب رجل واحد يعني تأييد لنجيب الكل يؤيد صحيح الاخوان قادوها بس الكل كان مؤيد .. مظاهرات 25 مارس نفس القصة
دلوقت والجديد استعمال دور الاعلام من جرايد وقنوات لمحاولة السيطرة على الشعب وتغيير وجهة نظره وايحاء ان المتظاهرين خونة وعايزين يولعوا في البلد على فكرة برضه حكاية توليع البلد عملها قبلهم السادات وقال كده على المعارضين ضده
الاعلام اكبر سلاح دلوقت وزي ما انت مصور فيديو انا هافبركلك فيديو وشوف مين اللي له مصداقية
هل انا كمجلس عسكري حاربت وقتلت واتقتلت علشان البلد دي ولا انت يا بتاع صربيا
بالنسبة للاسلاميين لو قسمناهم اخوان وسلفيين علشان مينفعوش يتحطلهم نفس القياس
اللي شايفه ان الاخوان عايزين المقاعد وبس عايزينها بسرعة وفاكرين ان الاغلبية اللي اخدوها وان الشعب معاهم وهيحميهم ميعرفوش ان النتيجة خادعة
اما السلفيين امثال بكار وقادة حزب النور رايي انا اللي شايفه انهم ناس معاهم اجندات خارجية تابعة لملك السعودية قالهم مش عايز مبارك يتحاكم فمصلحتي ان المجلس وقراراته تفضل التالي ابقوا دلاديل المجلس وادهسوا كل مبادئكم واقذفوا المحصنات في سبيل ان المجلس العسكري وملك السعودية يبقاله 30% من المقاعد حاجة تانية كمان هتلاقوها في المستقبل السلفيين هايهدموا الازهر علشان تبقى اكبر مرجعية اسلامية هي السعودية وعلشان يوحدوا المذاهب في مذاهب واحد هو المذهب الحنبلي وهتلاقوا الكلام ده بيحصل على قناة الناس من فترة بس محدش مخلي باله لاهيانا السياسة لما يسبوا ويلعنوا الشيخ سعد الدين الهلالي استاذ دكتور الفقه المقارن علشان بيجاوب على كل سؤال بأنه يصيغ اجابات على كل المذاهب يتقاله انك بتعبد هواك وجاوب على السؤال باجابة واحدة
ربنا يصلح الاحوال ويهدي البشر
تحياتي
القضاء الل اعطى 7 سنين للمخبرين هو اللي اعطى افراج بالامس لعلاء عبد الفتاح . مش عارف ليه الناس بتنسى بسرعه وليه مش عاوزين نهدى شويه. عارفه يا دكتوره.. انا نفسي نهدى شهر واحد بس ونشوف النتيجه بعدها. هو شهر واحد
دكتورة والله العظيم احس بثورة مصر كابن لي اخاف عليه وادعوا الله ان يحفظه فلا تخذلوني
لمعلومات من يتكلم
علاء خرج بضمان محل اقامته فى قضية هابلة يجب تقديم من ابلغ بتهمة البلاغ الكاذب
مشكلة القضاء فى توصيف النيابة اى التكييف القانونى للقضية
ربنا يهدى الجميع
كنت لسه بقول لبنتي
انا زعلانة اني شاركت في الثورة
وزعلانة علي الشباب اللي مات
بعد ده كله
تيارات اسلامية متشدده
ناس خرجت من الشقوق
واشخاص متلونون ومتحولون بقوا في الصورة تخافي تفتحي التلاجة تلاقيهم
يعني بعد ده كله يحصل كده
بس برضوا انا متفائلة
ومصر هتبلع ده كله
إرسال تعليق