نادي عدم لوم الضحية

عاوزين نعمل نادي زي "نادي القلوب الوحيدة"
مش فاكرة الإسم ده كان باب في حواء ولا صباح الخير ولا أكتوبر ولا الإذاعة والتلفزيون
مش مهم
المهم عاوزين نعمل "نادي عدم لوم الضحية"

اللي تتخطف في الشارع - تحت أي بند - لا تُلام ولو في الخيال المريض
ماما خديجة خرجت من بيتها تؤازر ناس في المحكمة بسلام .. من حقها ترجع بيتها بسلام

اللي تنضرب من جيش بلدها - تحت أي بند - لا تُلام ويقال لها أجندة
لو كانت بنت خلاصة واختطفت العصا من ضاربها ونزلت بيها على أم رأسه فهذا ليس ضد سلمية الثورة

اللي يرمي مولوتوف "بعد رمي كسر مراحيض عليه" - تحت أي بند - لا يُلام على رد الأذى
ومينفعش يلبس قضية في الوقت اللي مفيش مخلوق معتدي بيحاكم..سواء ضرب أو قتل المتظاهرين أو تبول عليهم

اللي ينام في خيمة ويتاخد ينضرب حتى تُغلق عيناه - تحت أي بند - لا يُلام لأن شكله مش جان
ومش كل يومين تقولوا الثوار اساسا بلطجية - سرسجية - يستاهلوا محاكمات استثنائية


مصر محتاجة بشدة وبإلحاح
نادي عدم لوم الضحية

صعب إنك تعيش وسط شعب "مرتبك" حتى أنه لا يعرف أن قاتل فاعل - آثم - بارد - متآمر
ومقتول مفعول به - رد فعل - منصوب على الفلكة